Isaya 50 - Bhiblia Yo Sawuleka

¹ Mkoma a womba tiya: Di hani dipapilo da kulekwa ka mame wanu, adi ni nga mtovela ngu dona kani? Mwendo i mani mxavi wangu, awu ni nga mi xavisa kwakwe kani? Wonani taku mi xavisilwe ngu mhaka ya wubihi wanu, ni mame wanu a tovetwe, ngu mhaka ya kuwekela kwanu.

² Ngu kutxani ni ngata ni si ta mana m'thu kani? Ngu kutxani ni nga mi dhana, ku si oroveli ni wammweyo kani? Ina dianza dangu di to khwanyela, niza ni si sikoti kutirula kani? Ni ku mwendo kha ni ngadi ni mtamo kasi kutxhatxhisa kani? Wonani taku, ngu kukawuka kwangu na omisa linene, ni maha ti to minambo yi hunduluka yiva siwula, kala kuza sihaka sa kona si nunga, nguko kha ku nga ni mati, se sa fa ngu ditora.

³ Ani na ambeka nzuma ngu txidema, ni yi fenengeta ngu nguwo ya disaka do dhimba.

Kuxaniseka ni kuthembeka ka txithumi txa Txizimu

⁴ Mkoma Txizimu a ni ningile lidimi lo gondisa, kasi ku ni ziva kuwomba ngu mbimo ya kona, dipswi da dinene ka wule wo karala. Ene wa ni wusa mixo ni mixo, wa ti tula tinzeve kasi ku ni engisa, kufana ni vale va gondako.

⁵ Mkoma Txizimu a ni tute tinzeve, se kha na mueyisa; kha ni tshumeleli msana.

⁶ Ni tshuralela vale va ni pekako, ni khohe yangu ka vale va ni xurulelako misisi; kha ni sisi khohe yangu, ka vale va ni poyilelako, ni ku ni thurela.

⁷ Nguko Mkoma Txizimu wa ni vhuna, ngu mhaka yeto kha ni kanganyiseki; ngu mhaka yeto ni khohe yangu ni yi mahile yi txi nga dirigwi, se na tiziva ti to kha ni na mbi wa tinganani.

⁸ Muemeli wangu a hafuhi; i mani a no ni wukela kani? A hi ti wonekelise ngu mbimo yimweyo; I mani i ku mlala wangu kani? A na tshukete hafuhi kwangu.

⁹ Wonani taku Mkoma Txizimu wa ni vhuna, mlamuli wangu ngu mani kani? Wonani taku votshe va na sakala kufana ni syambalo, se va na dyiwa ngu sumba.

¹⁰ I mani hagari kwanu a thavako Mkoma, kambe a engisako dipswi da txithumi txakwe kani? Ngako a txi tsimbila txidemani, ko pwata ni kuwonekela, a na thembe ditina da Mkoma, kambe a na tsane ka Txizimu txakwe.

¹¹ Anu motshenu mi dhivelako mndilo, se mi ti ranganyeta ngu titshatsha, tsimbilani hagari ka midhikila ya mndilo wanu, ni hagari ka titshatsha tile mi nga ti dhivela; eto ti ta ngu ka dianza dangu, kambe mi na zumba kuxanisekani.