Isaya 49 - Bhiblia Yo Sawuleka

Txithumi txa Txizimu: Liwoningo ka vathu

¹ Ni engiseni anu sitondolo, pfisisani anu vathu va kule! Mkoma a ni dhani, kukhukhela mndani ka mame wangu, kukhukhela msembeni ka mame wangu, a ni rayile ditina.

² Txisofu txangu a txi mahile txi fanana ni ditxhari do hinda, se a ni fenengetile ngu mtsudi wa dianza dakwe e ni maha lingove lo khetima, e ni sisa amu ka msava wakwe.

³ Se a ti khene kwangu: “Awe Israyeli u txithumi txangu, awe ni no dhumiswa ngu ngawe.”

⁴ Aniko ani ni ti khani: Ni thumile walo, ni sakani ngu mtamo wangu, ngu so mbi vhuna txilo; hambi keto, fanelo yangu yi masoni ka Mkoma, ni hakhelo yangu yi masoni ka Txizimu txangu.

⁵ Se konkuwa, kuwomba Mkoma, wule a nga ni wumba khukhela mndani, kasi kuva txithumi txakwe, ti to ni wuyisa Jakobe kwakwe, aniko Israyeli kha ti pata; hambi keto masoni ka Mkoma ni na dhumiswa, ni Txizimu txitxhavangu txi na va mtamo wangu.

⁶ A to khene kambe: Ndidotho taku uva txithumi txangu dwe, kasi kuwusa tihunzu ta ka Jakobe, ni kuwuyisa misalelwa ya ka Israyeli; kambe ni ku vekile ku uva liwoningo ka vamatiko, kuva m'hulukisi wangu kala magwito ka mafu.

⁷ Mkoma a womba tiya, Mtiruli wa Israyeli, Msawuleki wakwe, ka dihika do eyiswa, do yenywa ngu matiko, ka txithumi txa vale va fumako: Vafumeli va na mu wona va txi khukha, ve ema; vathangeli va na nama masoni kwako, ngu lirando la Mkoma, i ku wo thembeka, ni Msawuleki wa ka Israyeli, a nga kusawula.

Jerusalema a na aketwa

⁸ Mkoma a womba tiya: Ni ku engisile ngu mbimo ya yinene, ni kuvhuni ngu ditshiku da kuhanyiswa, ni na kuxayisa, ni na kumaha txitumelelano ka vathu kasi ku u na wusa ditiko ni kuvaninga kuva tithomba tawe tile ti nga xaselwa;

⁹ kasi ku txi khawe ka vale vo sungwa: Humani; se ni ka vale va ku txidemani, u txi khawe: Ti wonekiseni. Vona va na dyisela tinzilani, ni ka otshe makhalo o guleka va na mana wudyiselo wawe.

¹⁰ Kha va na mbiswa va txi pfa nzala, mwendo ditora, hambi txiwunda mwendo ditambo, kha si na mbi va xanisa, nguko awule a ku ni wumbilu navo, a na va tsimbitisa, e va yisa ngu kuthutha sisimani ka mati.

¹¹ Se ni na maha tinzila ka yotshe mimango yangu; ni sinzilana sangu si na kuliswa.

¹² Wonani, taku va nata ngu kule, wonani taku avale va wuphemba ni va mswa-ditambo, ni vale vamwani va ditikoni ka Sinimi.

¹³ Giya awe nzuma, se tsaka nawe mafu, kambe anu mimango kulungelani ngu kutsaka ka hombe, nguko Mkoma a thavelete vathu vakwe, a na pfela wusiwana vaxaniseki vakwe.

¹⁴ Aniko Siyoni a khene: “Mkoma se a ni lekile; Mkoma wangu a ni divate.”

¹⁵ Ina wamsikati a nga sikota kudivalisa eto mwanana wu a m'wunjako, asi mxanisekeli, mwanana wa mndani kwakwe kani? Aniko hambi i diku o m'divala, ani koko kha ni na mbi kudivala.

¹⁶ Wona taku ni ku bhate hagari ka dianza dangu; ni maguma ako ma masoni kwangu yotshe mbimo.

¹⁷ Vanana vako va nata ngu kukuluveta, aniko vahaxuli vako ni valovisi vako va ya kule ni nawe.

¹⁸ Gula maso u wona madhawani; votshe va va sengeletanako, vata kwako; na hanya ani, kuwomba Mkoma, taku u na ti ambeka ngu vona u ti bombisa, se u na ti ambeka ngu vona kufana ni txitekwa.

¹⁹ Nguko siwulani kwako, ni marumbini kwako, ka ditiko dako do hoxotwa, u na ti wona, konkuwa u di kamilwe ngu vaaki, ni vale va nga ku kakatxula va na ya kule ni nawe.

²⁰ Hambi ni vanana vo velekwa kufelwani kwako ngu vaveleki, va na kha vona tinzeveni kwako: Wukhalo wuwa kha wu hi dingani, wu songile ngutu, khukha hawa, kasi ku ani ni zumba kona.

²¹ Se u na khawe mbiluni kwako: I mani a nga ni velekela wuwa kani? Nguko ni ti si nga ni vanana, ni di nokha; ni ti ti khumbi, ni khukha; sekoko, i mani a ngani wunjela vava kani? Wona taku ani ni ti sate nokha; se avava va ti ti hani kani?

²² Mkoma a womba tiya: Wonani taku, ni na guleta dianza ka matiko, ni na gwimbela m'jeke wangu vathu; sekoko va na tisa vanana vako mawokoni, ni vanana vako vamahorana va na va pakata hamakata.

²³ Se vafumeli va na va vaxayise va vona, ni vasikati va kona va na va vamamisi vawe; va na namisa tikhohe hahatshi masoni kwako, ve dazela lithulu la mikondo yako, se u na tiziva ti to ani ngani Mkoma, ni ti to avale va ni thembako kha va na mbi wiswa tingana.

²⁴ Ina ndena yi nga honyolwa sile yi nga handa kani? Mwendo tikhumbi ti nga huluka kani?

²⁵ Aniko Mkoma a womba tiya: Ngu ditshuri, tikhumbi ti nga thaviswa ka ndena, se sile si nga handwa ngu wa mtamo si na huluka; nguko ani ni nalwa ni vale valwako ni nawe, Kambe ani ni na hulukisa vanana vako.

²⁶ Se vaxanisi vako ni na va dyisa nyama yawe vapune, va na leviswa ngu mnoha wawe vapune, ku nga vhinya, se nyama yotshe yi na tiziva tito, ani ngani Mkoma, Muhanyisi wako, mtiruli wako, Nyamitamo wa Jakobe.