Isaya 47 - Bhiblia Yo Sawuleka

Kuxulwa ka Bhabhilona

¹ Txhika u khalahatsha ha lithuluni, awe wotuma, mwanana wa muhorana wa Bhabhilona; khalahatsha hahatshi; kha ku ngadi ni txitulu txa wukoma, awe mwanana wa muhorana wa Vakaldheya, nguko khu na mbiswa u dhanwa ku umnene, niku u tshurile.

² Teka txigayo u gaya mpupu; thavisa difaduku ha msungo, thavisa ni tikathula, kunya tinguwo tako u txhatuka minambo.

³ Tingana tako ti na vhunungulwa, se ku na wonaneka wumbwiri wako; ni na phota, kha ni na mbi siya m'thu ni wammweyo.

⁴ Ditina da Mtiruli wathu, Mkoma wa Mabutho a Tiyimbi, Msawuleki wa ka Israyeli.

⁵ Awe mwanana wa muhorana wa Vakaldheya, wulela txidemani, u khalahatsha u txi dwe, nguko khu na mbiswa u dhanwa taku, u mfumeli wa txisikati wa mifumo.

⁶ Ni va henyete ngutu vathu vangu, ni nyenyezisile thomba yangu, se ni va ningete manzani kwako; khwa va pfela wusiwana, hambi txitimwi ka sikosana, u nemetile ngutu dikange dako.

⁷ Se u ti ti khawe: “Ni na va mfumeli wa txisikati yotshe mbimo”; kala kuwa khwa veka timhaka tiya mbiluni kwako, hambi kualakanya magwito a tona.

⁸ Konkuwa koko, engisa tiya, awe u tsakelako kutiphina, u tipfako u di zumbisekile, u wombako mbiluni kwako, u txi khawe: Ani ngani, hahanze kwangu, kuwalo mmwani; kha ni na mbi va noni, hambi kufelwa ngu vanana.

⁹ Aniko ka totshe timhaka tiya ta timbidi, ti nata txitimwi kwako ngu mbimo yimweyo, ka ditshiku dimwedo: Kufelwa ngu vanana, ni kumaha noni; ngu mtamo wotshe ti nata txitimwi kwako, ngu mhaka ya wuloyi wako wo tala, ngu sixamaliso sako so tala ngutu.

¹⁰ Nguko u thembile wubihi wako, se u txi khawe: Kha ni wonwi ngu m'thu; wutxhari wako ni wuzivi wako, eso si ku hambukisile, se u ti khawe mbiluni kwako: “Ani ngani, hahanze kwangu, kuwalo mmwani.”

¹¹ Ngu kumaha keto, txitimwi kwako, ku nata dikhombo, di u no mbi ziva mu di tako ngu kona, se kuhaxulwa ko ngeko, ku nata txitimwi kwako, kambe khu na mbi sikota ku kuretha; nguko ku nata tximwi kwako ngu txidhukisa, kuxasela ka txihuhuri, kaku khu na mbi sikota ku kuziva.

¹² Zumba ni sixamaliso sako, ni mtalo wa wuloyi, wule u nga thuma ka wona kukhukhela wuphyani wako, mwendo u nga thuka u mana kuhumelela, ni ti to mwendo u nga dhuka u mana kutsana.

¹³ U ti karalisile ngu kuxaxuwa kotala; va na wuke koko konkuwa, avale va pimako nzuma, vale va nga ti wonetela tinyeleti, va va hutako kumeka ka mtxima, va na ku hulukise ka ti ti nota txitimwi kwako.

¹⁴ Wona taku va na fana ni mthungu, mndilo wu na hisa; kha va na mbi sikota kuhulukisa wutomi wawe ka mtamo wa m'dhikila; kha na mbi va dikala da mndilo kasi ku ti futumeta, mwendo mndilo woza e khalahatsha hafuhi ka wona.

¹⁵ Va na mahisa toneto kwako vale u nga thuma navo, vabhindulisi vako, kukhukhela wuphyani kwako; mmwani ni mmwani a na teka nzila yakwe; ni wammweyo kha na mbi kuhulukisa.