Isaya 41 - Bhiblia Yo Sawuleka

Txizimu txa thembisa kuhanyisa vathu va ka Israyeli

¹ Malalani masoni kwangu anu sitondolo; anu vathu wusetani mitamo, tshuketani, sekoko wombawombani; a hi tshuketeni hotshethu hafuhi ka mlamuli.

² I mani a nga wusa mlulami ngu Wutxani, e m'dhana eta hafuhi kwakwe kani? I mani a nga ningela matiko masoni kwakwe, ni ku mmaha e khozisa vafumeli kani? A va ningete ka ditxhari dakwe, va txi nga lithulu, va txi nga lingove lo pengiswa ngu moya, ka wulaho wa lona.

³ Wa va tutumisa, e pinda ngu kudikha, ka nzila yi asi khaliko kutsimbila ngu yona.

⁴ I mani a nga thuma e maha timhaka tiya, e dhana matiko kukhukhela kukhatani kani? Ani Mkoma, wo khata ni kugwita, ani nipune.

⁵ Sitondolo si ti woni, si thava; mafu otshe ma to zinginika, si to tshuketa, si txi ta.

⁶ Mmwani ni mmwani a to vhuna mkwawe, se ka mngana wakwe a txi khene: Tsana!

⁷ Se mthumi a tsanisa mtshuli, ni wu a thumako ngu hamela, ka wule a khandako txithombe, a txi khene ngu txile txi nga tshulwa: Njinene. Sekoko e txi tsanisa ngu sipikiri, kasi ku txi si dekadeki.

⁸ Aniko awe Israyeli, txithumi txangu. Awe Jakobe, awe ni nga kusawula, liveleko la Abrahamu, mngana wangu.

⁹ Awe ni nga kuteka kukhukhela magwito ka mafu, ni txi kudhana ngu hagari ka makhalo ako amanene ngutu, ni txi khani: Awe u txithumi txangu, ni kusawute, kha na kuleka;

¹⁰ u nga thave, nguko ani ni ni nawe; u nga gume mtamo, nguko ani ni Txizimu txako; na kutsanisa, kambe na kuvhuna, na kuseketela ngu dianza dangu da txinene da kululama.

¹¹ Wona taku, votshe vale va ku henyelako, va na wiswa tingana ni ku khulumetelwa; kambe kha va na mbi va va txilo; ni vale va kulwisako, va na lova.

¹² U na va lava, aniko khu na mbi va mana, ni vale va no lwa ni nawe, kha va na mbi va va txilo, kufana ni tximaha txo mbi va txilo, avale va no lwa ni nawe.

¹³ Nguko ani, Mkoma, Txizimu txako, ni kuñola ngu dianza dako da txinene, ni txi khani kwako: U nga thave, ani na kuvhuna.

¹⁴ U nga thave, awe txipungwana txa Jakobe, sivathwana sa ka Israyeli; ani na kuvhuna, kuwomba Mkoma, kambe Mtiruli wako Msawuleki wa Israyeli.

¹⁵ Wona taku, ni ku mahete txigayo txa txiphya, txi ku ni makwasa o hinda; u na hula ni kugaya mimango; se simangwana u na si maha si txi nga mwasi.

¹⁶ Awe u na si tsetseta, se moya wu na si purumisa, txihuhuri txi na si hangalasa; aniko awe u na tsaka ka Mkoma, u na ti dhumisa ka Msawuleki wa Israyeli.

¹⁷ Vaxaniseki ni vale vo pwata va lava mati, kambe kha ma ngaho, se tidimi tawe ta oma ngu ditora; aniko ani Mkoma, ni na va engisa, ani Txizimu txa ka Israyeli kha ni na mbi va leka.

¹⁸ Ni na tula minambo ka makhalo o guleka ni sisima hagari ka mikova; txiwula txi na hunduka txi maha maziva a mati, ni mafu a kuoma ma na humisa sisima sa mati.

¹⁹ Ni na phaya mindonga ya mikedhari txiwulani, ni mindonga ya misita ni ya murta, ni ya miolivha; amu ka ligwangwa ni na veka faya, ni miolimo, ni seringa,

²⁰ kasi ku votshe ve ti wona, se ve tiziva, ve tumela, ni kupfisisa kumweko tito, dianza da Mkoma di nga maha tiya, ni Msawuleki wa Israyeli a nga si vanga.

²¹ Txhamuselani mhaka yanu, kuwomba Mkoma; tisani wufakazi wanu wo tsana, kuwomba Mfumeli wa Jakobe.

²² Tisani mi ta hi gela timhaka ti ti no humelela, hi ziviseni timhaka ti ti nga pinda, kasi ku hi na ti pfisisa, ni kuziva magwito a tona; mwendo hi geleni ati titako.

²³ Hi ziviseni timhaka ti ti nota, kasi ku hi na ziva ti to anu mi sizimu; mi maha ta tinene, mwendo mi maha to biha, kasi ku hotshethu hi na ti wona hi xamala.

²⁴ Wonani taku ma pindwa ngu kuva mi si nga txilo, ni mthumo wanu wa pindwa ngu kuva i si nga txilo; kunyenyeka ngu kona ku mi sawulako.

²⁵ Na wusa mmweyo ngu Wuphemba, se ene a nata; kukhukhela kuhumani ka ditambo; a na khumbuka ditina dangu; kambe a nata txitimwi ka vathaviseki, ku nga txitimwi ka ndope; ni kufana ni muwumbi a kandetelako dibumba, ngu toneto, a na va kandetelisa toneto nene.

²⁶ I mani a nga zivisa toneto kukhukhela kukhatani, kasi ku hi sikota kuziva; mwendo ka yimwani mbimo, kasi ku hi na khathu: Ina ti lulamile kani? Aniko kha nga ho wu a zivisako, mwendo kukombekisa, hambi kuengisa mapswi anu ni ka kudotho.

²⁷ Ani ngani ni no khata ni txi khani ka Siyoni: Wona taku vaho hale! Ni ka Jerusalema ni na ninga m'zivisi wa mahungu amanene.

²⁸ Se mbimo yile ni nga wona, ku si nga ni m'thu; hambi hagari ka madhota, ku si nga ni wa ku muwotisa, mwendo wa ku ni xamula dipswi.

²⁹ Wona taku votshe kha va vhuni txilo, mithumo yawe hi nga txilo, sithombe sawe so wumbwa i moya, hi txilo.