Isaya 40 - Bhiblia Yo Sawuleka

Mahungu o thavelela

¹ Thavelelani, thavelelani vathu vangu, kuwomba Txizimu txanu.

² Wombawombani ngu wumbilu ka Jerusalema, kambe kwangulani mi m'zivisa ti to wukhumbi wakwe wu gumile, ti to sionho sakwe si divaletwe, ni ti to ka sotshe sionho sakwe a amukete hakhelo kumbidi ngu ka dianza da Mkoma.

³ “Dipswi da wu a kwangulako txiwulani di kha dona: Longiselani nzila ya Mkoma; lulamiselani amu ka ligwangwa magondo a Txizimu txathu.”

⁴ Yotshe mikova yi na guletwe, yotshe mimango ni sotshe simangwana si na khundumuselwa; makhalo o gomboyeka ma na lulamiswa, ni makhalo a mikova ma na tatiselwa.

⁵ Se wudhumo wa Mkoma wu na wonekiswa, kambe yotshe nyama yi na ti wona tito, txisofu txa Mkoma txi wombile tiya.

⁶ Dipswi di kha dona: “Kwangula.” Se wokari a nje khene: Na kwangula ni txi khani txani kani? Yotshe nyama yi fana ni mwasi, ni kotshe kutshura ka yona kufana ni siluva sa txitinga.

⁷ Mwasi wa oma, se siluva sa mora, ngako moya wa kuhefemula ka Mkoma wu di pindile txitimwi ka sona. Ngu ditshuri, vathu i mwasi.

⁸ Mwasi wa oma, se siluva sa mora, aniko dipswi da Txizimu txathu da zumba kala kupinduka.

⁹ Awe u m'zivisi wa mahungu amanene ka Siyoni, kwela ka mmango wo guleka. Awe u m'zivisi wa mahungu amanene ka Jerusalema, guleta dipswi ngu mtamo; di gulete, u nga thave, womba ka madhoropa a ka Judha, u txi khawe: Wonani, nditxe hawa Txizimu txanu.

¹⁰ Wonani taku Mkoma Txizimu a nata, kufana ni ndena, se diwoko dakwe di na fuma; wonani taku, ata ni txhatxhazelo yakwe, ni hakhelo, masoni kwakwe.

¹¹ A na dyisa mtxhambi wakwe kufana ni m'dyisi; a na sengeleta sinvutana mawokoni kwakwe, e si khutarela hakhana kwakwe; a na gola kha kwati ati ti mamisako.

Wuhombe wa Txizimu txa ka Israyeli

¹² I mani a nga pima linene ngu dianza dakwe, awu a nga teka lipimo la nzuma ngu manza akwe, se e sengeleta lithulu la mafu, ka mpimo wokari, ni kupima mimango ni simangwana txikaloni kani?

¹³ I mani a nga tsimbitisa Moya wa Mkoma kani? I mani a ngava mlayeli wakwe kani?

¹⁴ A mahile ni mani txikungo, kasi ku e mninga mapimo, ni ku mkomba tinzila to lulama, kambe e m'gondisa wutxhari, ni ku mmaha e wona nzila ya wutxhari kani?

¹⁵ Wonani taku matiko ma fana ni dithotho da mati, di thothoketelako mu ka dibhaketi, ni ku nga lithulu la lidotho la sikaloni; sitondolo si fana ni tximaha txatxidotho ngutu.

¹⁶ Hambi txitinga txotshe txa Libhanoni, kha txi eneli kudhivela mndilo wa txiluvelo, ni sifuyo sa kona kha si eneli kumaha mhamba yo hiswa.

¹⁷ Otshe matiko hi nga txilo masoni kwakwe; a ma wona i si nga txilo, kufana ni txa kwa mbi va txilo.

¹⁸ Mi nga txi fananisa ni mani koko Txizimu, mwendo mi nga txi fananisa ni txani kani?

¹⁹ Mthumi wa vata txithombe, se mtshuli e nameketela nzalama ka txona, ni ku txi mahela liketani la silivhela.

²⁰ Txisiwana txi sisikotiko kuninga so tala, txi sawula dipulango di di si siniko; se mthumi wo txhariha e di teka, kasi ku ta m'vatela txithombe txi txi si zinginikiko.

²¹ Ina kha mi tizivi kani? Ina kha mi ti pfi kani? Mwendo kha ma ziviswa mhaka yiya makhatoni kani? Hambi kupima makhato a mafu kani?

²² Ngene wule a nga khalahatsha txitimwi ka txiwumbulutwa txa mafu, awule kwakwe, ava va zumbako ha mafuni va fanako ni tihumbi; ngene a nawulutako nzuma yi txi nga m'jiyo, e yi gwimba ku nga ditenda, kasi kuve zumba ka dona;

²³ awu a tshumetako vathangeli ve maneka i si nga va txilo, kambe a maha ti to valamuli va ditiko va si vhuni txilo.

²⁴ Se kha va phawi, hambi kuxwaywa, hambi kuzima mikoloti mafuni, ya txitsha txi txi nga sala; wa futeta txitimwi kwawe, se va txi oma; se moya wu na va purumisa kufana ni mthungu.

²⁵ Mi na ni fananisa ni mani koko, kasi ku ni txi fana nayo kani? Kuwomba Msawuleki.

²⁶ Gulani maso mi wona txitimwi, mi wona taku i mani a nga vanga sona siya. I mani a nga ti vangela so talisa tiya, i mani asi dhanako sotshe ngu matina a sona; ngu mhaka ya wuhombe wa mtamo wakwe, ni kutsana ka mtamo wakwe, kha ku na mbi pwateka ni txa tximwetxo.

²⁷ Ngu kutxani koko, u wombako, awe Jakobe, ni nawe Israyeli u ku khawe: Nzila yangu yi tsivilwe ka Mkoma, ni kulamulwa kwangu ku kule ni Txizimu txangu kani?

²⁸ Khu ti zivi, khwa tipfa taku, Txizimu txa yotshe mbimo, Mkoma, M'vangi wa magwito a mafu, kha karali, hambi kurereka kani? Mapimo akwe kha ma na mpimo.

²⁹ A ninga mtamo ka wule a nga karala, kambe engetela mtamo ka wule asi ngako ni mtamo ni wa wudotho.

³⁰ Vavaphya va na karala, ni kurereka, kambe vavaphya, ngu ditshuri va na wa.

³¹ Aniko avale va emako ka Mkoma, va na wuseta mitamo yawe, se va na kwelela ngu tibhapi kufana ni magama; va na tutuma va si karali, va na tsimbila va si rereki.