Isaya 38 - Bhiblia Yo Sawuleka

Kuhanyiswa ka mfumeli Ezekhiya

¹ Ka masiku ale, Ezekhiya a lwate ngu malwati o daya; se a tota kwakwe Isaya, mwana Amosi, mprofeti, a txi ta khene kwakwe: Mkoma a khene: Lulamisela nyumba yako, nguko u nafa, khu na mbi hanya.

² Sekoko Ezekhiya a to jikisa khohe e wonetela disetani, e kombela ka Mkoma.

³ A txi khene: Awe Mkoma, alakanya, na ku kombela, ti to ni tsimbite ditshurini masoni kwako, ngu kuthembeka, kambe ni mahile to lulama masoni kwako. Se a to dila ngutu Ezekhiya.

⁴ Sekoko di tota dipswi da Mkoma ka Isaya, di txi ta kha dona:

⁵ Tsula u ya gela Ezekhiya, u txi khawe: Mkoma, Txizimu txa Dhavhidha, tate wako, a khene: Ni engisile mkombelo wako, ni woni mirongo yako; wona taku ni na engetela masiku ako, digumi da malembe ni mtxhanu.

⁶ Ni na ku hulukisa manzani ka mfumeli wa Asiriya, awe ni didhoropa diya, kambe ni na lwela didhoropa diya.

⁷ Txikombiso txa Mkoma, txo txanisa ti to, Mkoma a na maha ti a nga thembisa kwako, ngu txiya:

⁸ Wona taku ni na wuyisa mtsudi wa tipimo, wule wu nga pinda ni ditambo ngu mipimo wa diwatxhi da Akazi, wu txi tshumelela msana, ngu digumi da mipimo. Ngu kumaha keto, ditambo di to tshumelela msana ngu digumi da mipimo, ngu digumi mipimo yile di nga ti tsimbite da mazambo ale di nga ti wekete ngu ona.

⁹ Ndando ya Ezekhiya, mfumeli wa ka Judha, ka mbimo yile a nga lwala, se e kalamuka ka wulwati wakwe.

¹⁰ Ka masiku a kutsaka kwangu, ni naya ha txikeni ka dithitha; se ni tsivetwe malembe angu ale ma nga sala.

¹¹ Ani ni ti ti khani: Kha ni na mbi ngadi ni wona Mkoma ditikoni ka vo hanya, kha ni na mbi ngadi ni wona m'thu, ni vahanyi va ha mafuni.

¹² Mbimo ya kuhanya kwangu yi tsute, se yi thavisilwe kwangu, kufana ni m'dhuti wa m'dyisi; ni wite kufana ni mluki wutomi wangu; ku nga no wilwa ka txo lukwa; kukhukhela ni mixo kala minova, u na ni heta.

¹³ Ani ni thuthile kala mabimbi-kutxa, kufana ni ngonyamo, u funyile otshe marambu angu; kukhukhela ka mixo kala minova u na ni heta.

¹⁴ Ku nga mbeluvelu ni nyawukolwe, ni ti ti foma, ni keta kufana ni mmbaha wa txituvani, ni ti ti gula maso txitimwi; awe Mkoma, ni maneka kupandisekani! Ni lamulele.

¹⁵ Ni na khani txani kani? Ati Txizimu txi nga ni thembisa tona, txi mahile; ni na mahisa toneto ngu kuthutha, ka otshe malembe angu, ngu mhaka ya kupandiseka ka muhefemulo wangu.

¹⁶ Mkoma, vathu va hanya ngu sona siya, se ka sotshe siya wutomi wa kuhanya kwangu wu konemo; ngu toneto, ni kalamukilse u ni hanyisa.

¹⁷ Wona taku kuthuthani kwangu ni ti ti ni kupandiseka ka hombe; awe koko, wa lirando ngutu, u to khutarela muhefemulo wangu, kha wawa diphalani ka kusina, nguko u tshotshile msana kwako sotshe sionho sangu.

¹⁸ Nguko dithitha kha di sikoti ku kudhumisa, hambi kufa kha ku na ku kupfalisa, kambe kha va na mbi verela ditshuri dako, avale va relelako diphalani.

¹⁹ Ava va hanyako, va va hanyako, evo va na ku dhumisa, kufana ni ti ni mahako nyamsi; tate a na gondisa ditshuri dako ka vanana.

²⁰ Mkoma a tile e ta ni hanyisa, ngu koneho, ni gwesa sivetaveta sangu, hi na kudhumisa ka otshe masiku a kuhanya kwathu, Nyumbani ka Mkoma.

²¹ Se Isaya a txi khene: “Tisani tximbwanda txa makuwu, mi txi sungelela ha ka txilonda, se txi na hola.”

²² Kambe Ezekhiya a to khene: Ngu txihi txikombiso txaku ni na kwelela Nyumbani ka Mkoma kani?