Isaya 35 - Bhiblia Yo Sawuleka

Kutsaka ku kutako ka Jerusalema

¹ Txiwula ni makhalo a kuoma si na tsaka; se ligwangwa li na peka mikulungwani, kambe li na rumbuka nga txiluva.

² Li na rumbuka ngutu ni kundakandaka ngu litsako, kambe li na peka mikulungwani; li na ningwa wudhumo wa Libhanoni, kufana ni kunona ka Karmeli, ni ka Xaromi; vona va na wona wudhumo wa Mkoma, ni kuphatima ka Txizimu txathu.

³ Tsanisani manza o karala, ni kutsanisa mazolo o rereka.

⁴ Gelani va va pandisekako timbiluni, mi txi khanu: Tsanani, mi nga thaveni! Wonani taku Txizimu txanu txi nata, ku ta mi photela, ni txhatxazelo ya Txizimu; txona txi nata, txi ta mi hanyisa.

⁵ Sekoko maso a mabhofu ma na tulwa, ni tinzeve ta maphanzeve ti na tuleka.

⁶ Sekoko silima si na ndaka-ndaka kufana ni timbavala, se tidimi ta siduma ti na embelela, nguko mati ma na pfukula txiwulani, ni sinambwana ligwangwani.

⁷ Se mafu a kuoma ma na hinduka me maha sisima, ni mafu a ditora ma nava sisima sa mati; se mazumboni ka maxolwa ku na mila mwasi, ni titshava, ni tiwungu.

⁸ Se, ahale ku nava ni nzila ya lisima, nzila yi yi no dhanwa ti to i Nzila yo Sawuleka; m'bihi kha na mbi tsimbila ngu yona, aniko yi na lumba vathu va Txizimu; ava va no tsimbila ngu yona, hambi siphukuphuku kha si na mbi timela.

⁹ Eho kha ku na mbi va ni ngonyamo, hambi txihari txa tshofu, kha txi na mbi tsimbila ngu yona, kambe kha txi na mbi maneka ka yona; aniko vale va nga tirulwa, va na tsimbila ngu yona.

¹⁰ Se ava va nga tirulwa va Mkoma, va na tshumela veya Siyoni ngu kutsaka; kambe kutsaka ko mbi gwita ku nava txitimwi ka misungo yawe; va na mana mathomo ni litsako, kambe kupandiseka kwawe ni miketo si na tutuma.