Isaya 29 - Bhiblia Yo Sawuleka

Mahungu o wukela Jerusalema

¹ Dikhombo ka Ariyeli, ka didhoropa da Ariyeli, adile Dhavhidha a nga veka ka dona wugovelo! Engetelani dilembe ni dilembe, kambe yi na ningetane mibuso.

² Hambi keto, ni na veka Ariyeli kuxanisekani, se ku nava ni kudila ni kupandiseka; kambe dona di na va didhoropa dangu kufana ni Ariyeli.

³ Nguko ni na kuranganyeta ngu wugovelo wangu, ni ku kurandela ngu masotxhwa, kambe ni na aka maguma o kuwukela.

⁴ Sekoko u na wiswa hahatshi, u na womba-womba u di hahatshi ka mafu, se kuwombawomba kwako ku na huma ngu lithuluni, ku si nga ni mtamo, ni dipswi dako di na huma ngu hahatshi ka mafu, kufana ni dipswi da mloyi, ni kuwombawomba kwako ku na veta mloti kukhukhela lithuluni.

⁵ Se kutala ka valala vako, ku na fana ni lithulu lo hehuka, ni kutala ka sidayi, nga m'vhutunga wu wu pindako; eto ti na maheka ngu mbimo ya txikavikavi.

⁶ U na endelwa ngu Mkoma wa Mabutho a Tiyimbi, ngu kudhinda, ni kuzinginika ka mafu, ni diguwa da hombe, ni kupeka ka txihuhuri, ni txingulu, ni m'dhikila wa mndilo wo tshokomisa.

⁷ Se kufana ni mloro ni txiwoniso txa wusiku, i nava kutala ka otshe matiko, ale ma no lwa me wukela Ariyeli, ni votshe vale va no lwa ve muwukela, ve wukela maguma akwe, ve mxanisa.

⁸ Se va na fana ni m'thu wa nzala, wo lora a txidya, aniko a txi wuka, epfa m'hefemulo wakwe i ti diphanga; mwendo ku nga m'thu wo pfa ditora, a lorako a txi sela mati, aniko a txi wuka, e maneka a di tsivate, kambe muhefemulo wakwe wu ti ni ditora; ma nava toneto otshe matiko amangi, ale ma no lwa me wukela mmango wa Siyoni.

⁹ Swelani, se mi xamala, mi humula, ni kukwangula; va levile, aniko i si nga ngu vhinya; va tsimbila va txi dhedherekela, aniko na i si nga ngu sopa.

¹⁰ Nguko Mkoma a mi thete moya wa wukohe wa hombe, kambe a tsivile maso anu, i ku vaprofeti, a fenengetile vathangeli vanu, i ku vahuti.

¹¹ Ngu toneto, siwoniso sotshe kwanu, yi fana ni mapswi a dibhuku do lemwa, di ningelwako ka wu a zivako kugonda, va txi kha vona: “Wona, hi nga gonda tiya”; se ene a na khene: “Kha ni sikoti, nguko di lemilwe.”

¹² Mwendo ku txi ningelwa dibhuku ka wule asi ziviko kugonda, va txi kha vona: “Wona, hi nga gonda tiya; se ene a na khene: Kha ni tizivi kugonda.”

¹³ Nguko Mkoma a ti khene: Vathu vava koko va tshuketa hafuhi ni nani, se va ni dhumisa ngu sisofu, aniko timbilu tawe ti kule ni nani, ni txithavo txawe kwangu, nja kulondeta milayo ya vathu dwe, ayi va nga gondiswa yona;

¹⁴ Wona taku, ni na simama ni maha mthumo wo xamalisa hagari ka vathu vava; i ku mthumo wo xamalisa, kambe wo thisa, nguko wutxhari wa titxhari tawe, wu na fuva, ni mapimo a vathu vawe vo ziva, wu na sisala.

¹⁵ Dikhombo ka vale va lavako kusisela Mkoma makungo awe! Va maha mithumo yawe txidemani, va txi kha vona: I mani a hi wonako kani? Niku i mani a hi zivako kani?

¹⁶ Anu totshe mo vhinganyisela, ku nga muwumbi ayako ka dibumba, se atxi txi nga mahwa txi txi kha txona, ka wule a nga txi maha: “Khwa ni maha”; ni khadi yile yi nga wumbwa, yi txi kha yona ngu muwumbi wa yona: “Kha zivi txilo.”

Txithembiso txa kuhanyiswa

¹⁷ Ina Libhanoni kha na kuhunduluka, ngu mbimo yayidotho, eva thembwe yo nona kani? Se thembwe yo nona kha yi na kumaha txitinga kani?

¹⁸ Se ka ditshiku dile, maphanzeve ma napfa mapswi a dibhuku, ni mabhofu ma na thaviswa mphume me wona txidemani.

¹⁹ Se avale vo dikha va na tsaka txitimwi ka kutsaka ka Mkoma, ni sisiwana si na tsakela Msawuleki wa Israyeli.

²⁰ Nguko mxanisi kha na mbi va txilo, se mtseketseli a na ti lovisa, ni votshe vale va ti ningelako ka wubihi, va na thaviswa,

²¹ avale va ningisako mnandu m'thu ka mhaka yokari, avale va riyako mlawu ka wule a kawukako ha txikeni, ni vale va vekako walo didhawa wule wo lulama.

²² Ngu toneto, Mkoma wu a nga hulukisa Abrahamu, a khene ngu nyumba ya ka Jakobe: Jakobe kha na mbiswa e wiswa tingana, hambi ni konkuwa kha yi na mbi wuna khohe yawe.

²³ Aniko mbimo yile vanana vanu va no wona mthumo wa manza angu, hagari kwawe, va na sawulekisa ditina dangu, ni kusawulekisa Msawuleki wa Jakobe, se va na thava Txizimu txa ka Israyeli.

²⁴ Se vale va nga wekela moyani, va na tava ni mapimo, ni vale vo ngungurukela, va na tumela kugondiswa.