Isaya 28 - Bhiblia Yo Sawuleka

Mahungu o lumba Israyeli, Mfumo wa Wuphemba

¹ Dikhombo ka m'bhoti wa kutikulisa ka madevi a ka Efrayime, ava wudhumo wa kutitshurisa kwawe wu fanako ni txiluva txi txiwako, txi ku ha msungo ka mkova wo nona, wa ku ti guletako ngu wona, wa va va nga xulwa ngu vhinya!

² Wonani taku Mkoma a na rumela wamwamna wa ndena, wa mtamo ngutu, kufana ni kuwa ka maralala, kuxanisa ko khundumusa, ni ku nga txihuhuri txo karata ngutu, txa mati ya ma khulungako, a na va wisa ha mafuni.

³ M'bhoti wa kutikulisa ka madevi a Efrayime, wu na kandetelwa ngu mikondo.

⁴ Se txiluva txa kuwa ngu ka wudhumo wa ku ti tshurisela kwakwe, txi ku ha msungo ka mkova wo nona, txi na fana ni dikuwu, na ku si se hoka malanga, adi daku a txi di wona m'thu, na a ti nado manzani, wa di mita.

⁵ Ka ditshiku dile, Mkoma wa Mabutho a Tiyimbi, a na va i ti m'bhoti wa wudhumo, ni m'bhoti wo tshura ka misalelwa ya vathu vakwe.

⁶ Kambe ku nava ni moya wa wululamo, ka wule a khalahatshako e lamula, ni mtamo ka vale va tshumetako yimbi ngu msana, kala ha txikeni.

Mahungu o lumba Judha, Mfumo wa Wulambwe

⁷ Aniko ni vona vava, va onha ngu mhaka ya vhinya, va dhedherekiselwa ngu sopa. Hambi vaphaxeli ni vaprofeti va dhedherekela ngu mhaka ya sopa; va mitwa ngu vhinya, va dhedherekela ngu sopa, va tandeka ni kutxhamusela siwoniso, se ve onha wulamuli.

⁸ Nguko totshe timeza tawe ti tate ngu makosa, ni nzambwa; kha ku nga ni wukhalo ni wawumwewo wo basa.

⁹ I mani koko a ndi no gondiswa wutxhari kani? Niku i mani a ndi no pima ati a nga tipfa kani? Ka wule a nga lumulwa ni ka wule a nga thaviswa ha tshumbuni kani?

¹⁰ Nguko mlayo txitimwi ka mlayo, mlayo ni mlayo, njileleto txitimwi ka txileleto, njileleto ni txileleto, kudotho hawa, kudotho hale.

¹¹ Ngu toneto, ngu mawombawombelo a mamwani matiko, ni mawombawombelo a limwani lidimi, a na womba-womba ka vathu vava,

¹² nga kule ni nga khani: Akuwa nguhumula, ningani kuhumula ka kuhumula; se ayiya i mbimo yo ndinda moya; aniko kha va lava kuengisa.

¹³ Ngu toneto, dipswi da Mkoma, di na va mlayo txitimwi ka mlayo, mlayo ni mlayo, txileleto txitimwi ka txileleto, txileleto ni txileleto: Kudotho hawa, kudotho hale; Kasi kuve tsula va txiwa ngu msana, ve funyeka, ve bzetwa, ve ñolwa.

¹⁴ Engisani koko dipswi da Mkoma, anu vatseketseli, mi fumelako vathu vava, va manekako Jerusalema.

¹⁵ Nguko mi khanu: Hi mahile txitumelelano ni lifo, hi mahile txitumelelano ni wukhalo wa vafi; mbimo yi ku no pinda ndambi ya txitsayiso, kha yi na mbi hi hokela, nguko hi tekile makuhu hi ma maha wuthavelo wathu, se hi baramile hahatshi ka wukanganyisi.

¹⁶ Ngu mhaka yeto, Mkoma Txizimu a khene: Wonani taku ani ni vekile dirigwi Siyoni, dirigwi di koko di nga tumelwa, dirigwi da lisima da ha dikhonani, do tsana ngutu, kambe do tshima; awule a kholwako kha na mbi thava.

¹⁷ Se ni na lulamisa wulamuli ngu ngoti, ni wululami ngu txyemo, se maralala ma na hiyela wuthavelo wa makuhu, mati ma na fenengeta ko sisala kona,

¹⁸ Se txitumelelano txanu ni lifo, txi na guma; ni txitumelelano txanu ni wukhalo wa vafi, kha txi na mbi timisela. Mbimo yile ndambi ya txitsayiso yi no pinda, sekoko mi na fumwa ngu Mkoma.

¹⁹ Kukhukhela a txi khata kupinda a na mi ñola, nguko mixo ni mixo a na pinda, ni ka wotshe wusiku ni yotshe mitshikari; se ku na maheka taku, kupfa mhaka yo nga yiya dwe, ku na wusa kudhuka ka hombe.

²⁰ Nguko m'bhedhu wu na koma ngutu, aha ko ni wammweyo kha na kusikota kunavalata ka wona; ni didhamba di na songa, aha ko ni wammweyo kha na ku sikotako ku ti fenengeta ngu dona.

²¹ Nguko Mkoma a na khukha kufana ni mmangoni ka Perazimi, kambe a na henya, nga tile a nga maha mkovani ka Gibheyoni, kasi kumaha mthumo wakwe, mthumo wakwe wo mbi toloveleka, ni kumaha mthumo, mthumo wakwe wo xamalisa.

²² Konkuwa koko, mi nge ngadi mi tseketsela; kasi ku asi mi nga sungwa ngu sona si si pswitwi; nguko se ni pfite Mkoma, Txizimu txa Mabutho a Tiyimbi, a txi womba-womba ngu kuhoxota, se atiya ti tsanisilwe txitimwi ka otshe mafu.

Wutxhari wa Txizimu

²³ Riyani tinzeve, mi engisa dipswi dangu; pfisisani kha kwati, mi engisa dipswi dangu.

²⁴ Ina m'dimi, wa dima ditshiku dotshe, kasi kuphaya kani? Ni ku mwendo o lwela kudima ni kujengela mafu otshe masiku kani?

²⁵ Hi nga tona, a mahisa tiya: Mbimo yile a nga zuzela wusavi wakwe, sekoko wa xwaya mbewu ya maanetha ni kuphaya makumini; mwendo e rinzetela fulaho ya yinene, mwendo sevhadha yo sawulwa, mwendo mahila, ngu makhalo a tona kani?

²⁶ Txizimu txakwe txa m'gondisa, ni ku mkomba ati a dinganako kumaha.

²⁷ Nguko mbewu ya maanetha kha yi hulwi ngu txiya txo hula, hambi txitimwi ka makumini, kha ku pindi dithandani da txikotxikani; aniko maanetha ma zuzwa ngu ndonga, se makumini ma hulwa ngu mtshi.

²⁸ Fulaho yo hulwa, aniko kha yi sinzwi ngutu, mwendo kuhulwa ngu mathandani a txikotxikani txa m'dimi, hambi kubhandiselwa ngu mahantxhi akwe.

²⁹ Hambi tiya, tita ngu ka Mkoma wa Mabutho a Tiyimbi, nguko wa xamalisa ngu silayelo, kambe mbwa hombe ngu mithumo.