Isaya 24 - Bhiblia Yo Sawuleka

Mkoma a na tsayisa mafu

¹ Wonani taku Mkoma wa maha ti to mafu meva txiwula, kambe wa ma kona, wa hindula zumbelo ya ona, e hangalasa vaaki va ona.

² Se ati ti no maheka ka vathu, ti na maheka ni ka vaphaxeli; ka txithumi txa wamwamna ni ka nyamne wa txona wa wamwamna; ni txithumi txa txisikati ni ka nyamne wa txona wa wamsikati; ka mxavi, ni ka msavisi, ka wule a lombako, ni ka wule a lombisako; ka m'vili, ni ka wule a vilwako.

³ Otshe mafu ma na sala i di txiwula, otshe ma na handwa, nguko Mkoma a wombile dipswi diya.

⁴ Mafu ma dila, kambe ma wuna; ditiko da guma mtamo, kambe da wuna; vahombe va vathu va ha mafuni va guma mtamo.

⁵ Kha ditshuri, mafu ma nyetilwe ngu vaaki va ona, nguko va ndaka milayo, ve txitxelela sileleto, kambe va funya txitumelelano txa kala kupinduka.

⁶ Ngu mhaka yeto, txiruko txa heta mafu, se avale va hanyako ka ona, va na koneka; ngu mhaka yeto, vaaki va ha mafuni, va na hiswa, mbadotho ava va no sala.

⁷ Dosi ya dila, ni m'vhinya wa guma mtamo, se votshe vale va tsakako timbiluni kwawe, va na keta.

⁸ Diguwa da misakano ya singomana di gumile, di gumile diguwa da vale va ndakandakako ngu kutsaka, kambe li gumile litsako la haripa.

⁹ Kha va na mbi sela vhinya, va txi embelela, wusuke wo vila wu na bava, ka vale va no sela.

¹⁰ Didhoropa da txiwula di khundumusilwe, totshe tinyumba ti vhatwe, kha ku na mbi wulela m'thu ni wammweyo.

¹¹ Ku ni tihuwa amu ka tinzila ta hombe, ngu mhaka yo lava vhinya; kotshe kutsaka ku phumile, ni misakano ya mafu yi gumile.

¹² Didhoropani ku to sala kukoneka dwe, ni matimba a dona ma fayetetwe.

¹³ Nguko ku nava ngu mndani ka mafu, hagari ka vathu vava, kufana ni kuzuzwa ka muolivha, ni sizangwa sa sidotho, na ku di gumile kuhaphelwa ka mauvha.

¹⁴ Avava va na guleta mapswi awe, ve embelela ngu kutsaka; ngu mhaka ya wudhumo wa Mkoma, va na huwelela kukhukhela lineneni.

¹⁵ Ngu mhaka yeto, dhumisani Mkoma, amu mikovani, ni sitondoloni ka linene, ka ditina da Mkoma, Txizimu txa ka Israyeli.

¹⁶ Kukhukhela magwito ka mafu, hi pfite kuembelala, kaku: Wudhumo ka wule wo lulama; aniko ani ni khani: Na goma, na goma, dikhombo kwangu! Vakanganyisi va kanganyisa, ina, vakanganyisi va kanganyisa.

¹⁷ Kuthava, ni diphala, ni mlawu, si ku emete, awe muaki wa ha mafuni.

¹⁸ Se ku na maheka taku, wule a no tutuma ngu mhaka ya dipswi do dhukisa, a na wela diphalani; ni wule a no huma ngu diphalani, mlawu, wu na m'bzweta; nguko mafasitela a txitimwi ma tulekile, ni makhato a mafu ma zinginika.

¹⁹ Mafu otshe ma na bhandelelwa, otshe ma na abaneka ngu hagari, se otshe mafu ma na zinginika.

²⁰ Mafu otshe ma na dhedhereka kufana ni didevi, kambe ma na zinginiswa, me thaviswa ni wusiku, nga mtxhatxha; se wuhambunyeti wa ona wu na ma nemelela, ma nawa, ma si wuki kambe.

²¹ Se ku na maheka taku, ka ditshiku dileya, Mkoma a na endela mabutho a txitimwi nzumani, ni vafumeli va mafu, txitimwi ka mafuni.

²² Se ma na tshanzuketelwa kufana ni vo ñolwa, amu diphalani, kambe ma na khotelwa mkorani, ma na tsayiswa msana ka masiku amangi.

²³ Se mtxima wu na va ni tingana, ni ditambo di na kanganyiseka, mbimo yi Mkoma wa Mabutho a Tiyimbi, a no fuma mmangoni ka Siyoni ni Jerusalema; sekoko, masoni ka vathangeli vakwe, ku nava ni wudhumo.