Isaya 22 - Bhiblia Yo Sawuleka

Txiziviso txo wukela Jerusalema

¹ Mahungu a mkova wa Txiwoniso. Wo va ni txani konkuwa, koza u kwela txitimwi ka tinyumba kani?

² Awe didhoropa do tala ngu tihuwa; Didhoropa da tipfilupfilu, didhoropa do ndaka-ndaka ngu litsako, vafi vako hi nga vafi vo dawa ngu ditxhari, kambe kha va fela yimbini.

³ Votshe vathangeli vako va tutumile kumweko, va ñotwe ngu va nyamalaho; votshe vale va nga manwa kwako, va sungilwe kumweko, aniko va tutumile veya kule.

⁴ Ngu toneto, ni khani: Mi nga ni woneteleni, ni na dila ngu txiviti; mi nga karaleni ngu ku ni thavelela, ngu kuhaxulwa ka mwanana wa muhorana wa vathu vangu.

⁵ Nguko ditshiku da xomulo, ni da tingana, ni da pfilu-pfilu, ngu dona diya da kuta ngu ka Mkoma, Txizimu txa Tiyimbi, mkovani ka Txiwoniso: Kukhundumuswa ka maguma, ni huwa yo hoka ni mimangoni.

⁶ Nguko Elamu a tekile wulaho, ni sikotxikani sa vavamna ni vagadhi va mahantxhi; se Kiri a humisa sitxhavangu.

⁷ Se ku na maheka taku, mikova yako yo tshura ngutu, yi tala ngu sikotxikani, se vagadhi va mahantxhi va na txhatxhamela ha txikeni.

⁸ Se ku na thaviswa txivhikelo txa ka Judha. Ka ditshiku dileya, u na wonetela matxhari a nyumba ya txitingani.

⁹ Mi na wona tifa ta didhoropa da Dhavhidha i ku tatingi; se mi na sengeleta mati a txisima txa hahatshi.

¹⁰ Kambe mi na bala tinyumba ta Jerusalema, mi khundumusa tinyumba, kasi kutsanisa maguma.

¹¹ Kambe mi mahile sisima hagari ka maguma mambidi txo thela mati a txisima txa kale, aniko kha ma wona txitimwi, kambe kha ma khatala ngu wule a nga va nga sona, hambi kukhatala ngu wule a nga si va nga kukhukhela kaleko.

¹² Se Mkoma, Mkoma wa Mabutho a Tiyimbi, a na mi dhana ka ditshiku dile, kuya dila, ni kuya peka huwa, ni ku kuyula misungo, ni ka muambalisi wa masaka.

¹³ Aniko wonani m'buso litsako; ka dawa tihomu ta mikati, ni tinvuta; kudyiwa nyama ni kuselwa vhinya, aniko kuwombwa tiya: He dyeni, hi sela, nguko mangwana hi na fa.

¹⁴ Aniko Mkoma wa Mabutho a Tiyimbi, a wombile tinzeveni kwangu a txi khene: Ngu ditshuri, wubihi wuwa kha wu na mbi thaviswa, an'ze kuza mifa, kuwomba Mkoma, Txizimu txa Mabutho a Tiyimbi.

Txiziviso txo wukela Sebhina

¹⁵ Mkoma, Txizimu txa Mabutho a Tiyimbi, a khene: Tsula u ya wonana ni Sebhina, mxayisi wa timale, mxayisi wa tithomba, u txi m'gela ku khawe:

¹⁶ U ni txani hawa kani? Mwendo i mani u ku nayo hawa, aku u kelako dithitha, u kela ka wukhalo wo guleka dithitha dako, u ti mahela dizumbo upune amu ka dirigwi!

¹⁷ Wona taku, Mkoma a na kurinza ngu mtamo ngutu, kufana ni wamwamna wa mtamo, a txi ku phutela do gwita.

¹⁸ Ngu ditshuri a na ku rindilitela kufana ni bhola ka wukhalo wo anama, wa hombe ngutu; koneyo u na fela kona, kambe koneyo si na gumela kona sikotxikani sa wudhumo wako, i ku tingana ka nyumba ya nyamne wako.

¹⁹ Kambe ni na kuthavisa mthumoni kwako, ni ku kuthavisa ha txikhaloni kwako.

²⁰ Se ka dona ditshiku dile ku na maheka ti to ni dhana txithumi txangu Eliyakimu, mwana Hilikiya.

²¹ Se ni na muambeka dibhaji dako, ni mtsanisa ngu libhande lako, ni ningela manzani kwakwe mfumo wako, se ene a na va tate ka vaaki va Jerusalema, ni ka nyumba ya ka Judha.

²² Se ni na veka khiya ya nyumba ya Dhavhidha ha dikatani kwakwe, se a na tula, ku si maneki ni wammweyo wo seka, a no seka, ku si maneki ni wammweyo wo tula.

²³ Se ni na m'bethela kufana ni txipikiri ka wukhalo wo tsana, a na fana ni txikhalo txa wukoma wa lisima, ka nyumba ya tate wakwe.

²⁴ Va na hayeka txitimwi kwakwe wotshe wudhumo wa nyumba ya tate wakwe, makhukhu ni tiveleko, sotshe sikadyana, kukhukhela ka majingo kala ka mabhojela.

²⁵ Ka ditshiku dile, kuwomba Mkoma wa Mabutho a Tiyimbi, txipikiri txi txi nga bethelwa ka wukhalo wo tsana, txi na thaviswa; txi na gwandwa txi txiwa, ni sotshe sile si nga ti hayekilwe ka txona, si na pshwitimuka, nguko Mkoma a wombile.