Isaya 20 - Bhiblia Yo Sawuleka

Asiriya a na khozisa Egipta ni Etiyopiya

¹ Ka dilembe di Taritani a nga ya Asidhodhi ngu kurumwa ngu Sargoni, mfumeli wa Asiriya, a to lwa ni ditiko da Asidhodhi, e di teka,

² Mkoma a to womba-womba ka mbimo yoneyo, ngu txisofu txa Isaya, mwana Amoni, a txi khene: Tsula u ya txhatxha syambalo sa mkhwasi txiwununi kwako, u thavisa tikathula mikondoni kwako. A to maha toneto, e tsimbila-tsimbila i di tximbwiri, na asi nga ni tikathula.

³ Sekoko Mkoma a to khene: Nga kule Isaya txithumi txangu, a nga tsimbila-tsimbite malembe mararu i di txibwiri, asi nga ni tikathula mikondoni, njikombiso txo xamalisa, txa dikhombo, txitimwi ka Egipta, ni txitimwi ka Etiyopiya,

⁴ ngu kumaha keto, mfumeli wa Asiriya, a na teka va va nga ñolelwa ditikoni ka Egipta ni Etiyopiya, majaha ni vo kumba, a txi va yisa wukhumbini, va na tsula i di simbwiri, va sa ambala txilo mikondoni, va sa ti pambiyeta txilo, njikombiso txa tingana ka Egipta.

⁵ Se va na xamala, veva ni tingana, ngu mhaka ya Vaetiyopiya, ava va va thembako, ni Vaegipta va va ti dhumisako ngu vona.

⁶ Sekoko ka ditshiku donedo, vaaki va txitondoloni, va na kha vona: Wonani ti ti humelelako vale hi nga va themba, avale hi nga ti ti tutumela kwawe, kasi ku hi huluka ka mfumeli wa Asiriya! Se athu koko, hi na hulukisa kutxani kani?