Isaya 18 - Bhiblia Yo Sawuleka

Txizimu txi na tsayisa Etiyopiya

¹ Dikhombo ka ditiko di di mahako mtsudi ngu tibhapi ta dona, adi di ku mtxhatuko ka minambo ya Etiyopiya!

² Adi di rumelako mitumi ngu lineneni, ngu sitataru sa tiwungu txitimwi ka mati, di txi kha dona: Tsulani anu mitumi ya txikuluveta, ka ditiko da vathu vo lapha, vo tshura, ka vathu vo thisa kukhukhela kutumbunukani kwawe; ka ditiko da mtamo ni tingana, mafu a dona ma abaniswako ngu minambo.

³ Anu motshenu vaaki va matiko, ni nanu vahanyi va ha mafuni, mbimo yi m'jeke wu no gwimbwa mimangoni, mi na wu wona; se ngako ku txi vetwa mpundu, mi na wu engisa.

⁴ Nguko Mkoma a ni gete tiya: Ni na malala, ni wonetela ni di dizumboni kwangu, kufana ni kuhisa ka ditambo do phatima, nga mwando wa hunguva ka lisani la mbimo ya kuelula.

⁵ Nguko kusanzi kufunyelwa, mbimo yile makhukhu ma nga thunga, se mauvha amambisu ma txi vitwa, sekoko, Txizimu txi na wilela mindonga, kambe txi na thavisa madhavi, txi txi ma tshatulela.

⁶ Vona va na lekwa hafuhi ni sinyana sa mimangoni, ni ka sihari sa ha mafuni; se sinyana si na vadya ngu mbimo ya malanga, kambe sotshe sihari sa txitinga si na vadya ngu mbimo ya wuxika.

⁷ Ka yona yile mbimo, va na tisa txiningo ka Mkoma wa Mabutho a Tiyimbi, vathu vo lapha ni kutshura, i ku vathu vo thisa, kukhukhela ve tumbunuka; ditiko da vathu va mtamo ni tingana, ditiko da kona do abaniswa ngu minambo; ka wukhalo wa ditina da Mkoma wa Mabutho a Tiyimbi, mmangoni ka Sinayi.