Isaya 10 - Bhiblia Yo Sawuleka

¹ Dikhombo ka vale va vekako milayo yo mbi lulama, ni vabhali vale va bhalako milayo yo xanisa vathu.

² Kasi kuonha mhaka ya sisiwana, ve pela sisiwana sa ditiko dangu, kasi kuhanda tinoni, ni kupela vale vo felwa ngu vaveleki.

³ Mi na maha txani anu vamwani ngu ditshiku da txitsayiso, ni da kulovisa kule ku nota ngu kule kani? Mi na tutumela ka mani kuya lava kuvhunwa kani? Tithomba tanu mi na ti veka hani kani?

⁴ Mi na sikota kunama hagari ka vale va nga ñolwa, mwendo kuwa hagari ka sirumbi sile si nga dawa kani? Hambi keto txiviti txakwe kha txa guma, aniko dianza dakwe di ngadi nawulutilwe.

Mfumeli wa Asiriya, njiya txa Txizimu

⁵ Dikhombo ka Asiriya, ndonga ya kuhenya kwangu! Nguko txiviti txangu txi fanana ni ndonga manzani kwakwe.

⁶ Ni na mruma ku yalwa ni ditiko da wubihi, ni mleleta kuya wukela vathu vale ni nga va henyela, ku va handa ni ku va honyola siya sawe, se ni va veka ti to ve kandetelwa ku nga ndope ya tinzilani;

⁷ hambiko ene a singako ni mhaka nito, hambi mbiluni kwakwe, kha alakanyeli eto; Aniko mbilu yakwe yi navela kuhoxota, ni kulovisa matiko o tala.

⁸ Nguko a khene: Vathangeli vangu votshe hi nga vafumeli kani?

⁹ Ina Kalino hi nga ku nga Karkemisi kani? Hamati hi nga ku nga Aripadhe kani? Se Samariya, kha fani ni Dhamasku kani?

¹⁰ Dianza dangu di tekile mifumo ya sithombe, hambi ku sithombe sa kona si pindako sa Jerusalema ni sa Samariya.

¹¹ Ina tile ni nga maha Samariya ni sithombe sakwe, kha ni na ku ti maha ka Jerusalema ni sithombe sakwe kani?

¹² Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe.

¹³ Nguko a khene: Ni mahile eto ngu mtamo wa dianza dangu, ni wutxhari wangu, nguko ni txharihile; Ani ni thavisile mihingano ya vathu, ni handa tithomba tawe, kufana ni ndena, ni wisile vale va nga ti situluni ka wukoma.

¹⁴ Dianza dangu di mani tithomba ta vathu, di txi nga do rola txisaka; se ni sengeletile mafu otshe ku nga no sengeleta manda o lekwa; ku si nga ni wo nawuluta tibhapi, mwendo kutula txisofu, mwendo kungunguruka.

¹⁵ Ina ditxhapu di nga ti dhumisa ka wule a gangako ngu dona kani? Ni disaho di nga ti kulisa ka wule a sahako ngu dona kani? Ku txi nga mtxheketelo wu nga zinginisa avale va wu guletako, mwendo ndonga yi nga guleta wule i singako phande!

¹⁶ Ngu toneto, Mkoma wa Mabutho a Tiyimbi, a na gomisa vale i ku vo ena hagari kwawe, se hahatshi ka wudhumo wa kona ku na tura, kufana ni kutura ka mndilo.

¹⁷ Nguko Liwoningo la Israyeli li na maha mndilo, se Msawuleki wa kona a na nga dikala da mndilo, di na tura di hisa mipa ni txitinga ngu ditshiku dimwedo.

¹⁸ A na fuvisa wudhumo wa txitinga txakwe ni wa thembwe yakwe yo nona, kukhukhela ka muhefemulo kala ka mmidi; a na fana ni kutsivala ka mrwali wa m'jeke.

¹⁹ Se mindonga yi yi salako txitingani kwakwe, yi na va ya yidotho, ti to hambi mwanana a nga sikota kubala.

Vokari va na wuya

²⁰ Ka ditshiku donedo, ku na maheka taku, miboti ya ka Israyeli, ni vale va nga huluka va nyumba ya ka Jakobe, kha va na mbi ngadi ve themba wule a nga va peka; va na themba Mkoma, Msawuleki wa Israyeli, ngu ditshuri.

²¹ Miboti yi na hunduluka, ina, miboti ya ka Jakobe yi na tshumelela ka Txizimu txa mtamo.

²² Nguko hambi ku vathu vako, awe Israyeli, va fanako ni mtxhefa wa lineneni, miboti yokha ngu yona yi no hulukiswa; kulovisa kutsanisilwe, ka thekelela ngu kululama.

²³ Nguko kukhundumuswa ku di tsanisilwe, Mkoma, Txizimu txa Mabutho a Tiyimbi a na kutatisa hagari ka dotshe ditiko diya.

²⁴ Ngu kumaha keto, Mkoma, Txizimu txa Mabutho a Tiyimbi, a khene: Mi nga thaveni anu vathu vangu, mi zumbako Siyoni, Asiriya hambi a txi mi peka ngu ndonga, ni kuguleta m'gomba wakwe e mi wukela, ngu mamahelo a Vaegipta;

²⁵ nguko i si nga kuswela, ku na tatiseka kuhenya kwangu ni txiviti txangu, kasi ku ni va heta.

²⁶ Nguko Mkoma wa Mabutho a Tiyimbi, a na guleta ndonga yakwe txitimwi kwawe, kufana ni kudawelwa ka Midhiyani, hafuhi ni dirigwi da Orebhi, kufana ni kule a nga guleta ndonga yakwe txitimwi ka linene, a na yi guleta kambe kufana ni tile ti nga maha ka Vaegipta.

²⁷ Se ti na maheka ka dona ditshiku dile taku, mrwalo wanu wu thaviswa makatani kwako, ni dikange dako ha thamoni kwako; se dikange di na funyeletelwa ngu mhaka ya kutotwa.

Kulwisa ka Vasiriya

²⁸ Se wa hoka ka didhoropa da Ayate, wa pinda ngu Migroni, ni kutshotsha thundu yawe kona Mikimasi.

²⁹ Se va pinda, kambe va gova Gebha; se Rama wa dhudhumela, Gibheya wa Sawule wa tutuma.

³⁰ Kwangula ngutu, awe mwanana wa muhorana wa Galimi, engisa awe Layisi, O awe, txisiwana Anatote!

³¹ Se Madhimena a hangalakile, ni vahanyi va Gebhini va tutuma ngu mitxawa.

³² Ka ditshiku donedo, a na hoka Nobhe, e kombisa txibhakela mmangoni ka dihorana da Siyoni, ni ka mmango wa Jerusalema.

³³ Se wona taku, Mkoma, Txizimu txa Mabutho a Tiyimbi, a na dunguruta madhavi ngu kuthisa, se ale o lapha ma na gangwa, vale vo ti guleta va na wiswa.

³⁴ Se a na gangela ngu simbi txitinga txo txhuma, se Libhanoni a na wiswa ngu dianza da wule wa mtamo.