Hoseya 8 - Bhiblia Yo Sawuleka

Txizimu txa sola kukhozelwa ka sifananiso ngu vathu

¹ Veka mpundu ha txisofu kwako. Ene wata kufana ni digama ku ta wukela Nyumba ya Mkoma, nguko va lekile txitumelelano txangu, kambe ve wukela mlayo wangu.

² Se va na dila kwangu, va txi kha vona: “Txizimu txangu! Athu va ka Israyeli, ha kuziva.”

³ Israyeli a lambile wunene; mlala a na mtutumisa.

⁴ Vona va ti mahete vafumeli, kambe na i si nga ngu kuranda kwangu, va ti emisete vathangeli, aniko ani kha na tiziva; va ti mahete sithombe ngu silivhela ni nzalama yawe, kasi kuva txi loviswa.

⁵ Dirole dako, awe Samariya, di lambilwe; kuhenya kwangu kuturile txitimwi kwawe; Va na pwata mnandu kala ditshiku muni, kani?

⁶ Nguko edo ngu dona dirole do mahwa ngu Israyeli; mtshuli a ngadi maha, hi nga Txizimu. Aniko dirole da Samariya di na funyetelwa di maha sihwika.

⁷ Nguko va phayile mimoya, se va na funyela singulu, kha ku na thembwe; fulaho kha yi na mbi veleka mafaka; kambe ngako yi txi veleka mafaka, ona ma na dyiwa ngu vamatiko.

⁸ Israyeli a khadamutwe; konkuwa, hagari ka matiko a wonekisa ku nga txi maha txi txi si tsakisiko ni wammweyo.

⁹ Nguko vakwelete veya Asiriya, ku nga mbongola ya txitinga, yi ku yokha; kambe Efrayime a xavile sirandwa.

¹⁰ Hambi keto, hambi va txi rumela sihiwa ka mamwani matiko, ani ni na va sengeleta; se va khatile kuguma ngu mhaka ya mrwalo wa mfumeli wa vathangeli.

¹¹ Nguko Efrayime a engetete siluvelo; aniko siluvelo si va mahile ve onha ngutu.

¹² Ni va bhalete wuhombe wa mlayo wangu, aniko kwawe eto ndimhaka ta kwa mbi vhuna txilo.

¹³ Madingano ni miphaxo ya siningo sangu, va ningela tinyama ve tshumela vedya, aniko Mkoma kha amukela; konkuwa a na alakanya kuwekela kwawe, e tsayisa sionho sawe, vona va na tshumelela Egipta.

¹⁴ Nguko Israyeli a divate M'vangi wakwe, kambe a ti akete tinyumba ta wukoma, se Judha a andisile madhoropa o tsana; aniko ani ni na rumela mndilo txitimwi ka madhoropa awe, ni kutshokomisa tinyumba tawe ta wukoma.