Hoseya 6 - Bhiblia Yo Sawuleka

Kutilaya ka wukanganyisi

¹ Ngonani, hi tshumelela ka Mkoma, nguko ene a hi phatulete, se a na hi kalamukisa; a hi lematile, aniko a na sungelela silonda sathu.

² Msana ka masiku mambidi, a na hi ninga wutomi; ngu ditshiku da wuraru a na hi wusa, hi hanya masoni kwakwe.

³ A hi m'ziveni, a hi yeni masoni ngu kuziva Mkoma, kuhuma kwakwe ku na fana ni kugwimba ka wuronga; se a nata kwathu ku nga kuwa ka mati, ku nga mati matshutshelako me nakanisa mafu.

⁴ Awe Efrayime ni na maha txani ngu ngawe kani? Na maha txani ngu ngawe, awe Judha kani? Nguko lirando lanu li fana ni direfu da mixo, ni ku nga mwando wa mabimbi-kutxa, wu kuluvetako kutshatsheka.

⁵ Ngu toneto, ni va pekile ngu vaprofeti; ni va date ngu dipswi da txisofu txangu; kambe kulamula kwako ku na humelela kufana ni kuwonekela.

⁶ Nguko ani ni lava wumbilu, kha ni lavi mphaxo; ni kuziva Txizimu kupinda miningelo yo hiswa.

⁷ Kambe vona va ndakile txitumelelano kufana ni Adhamu; se vona va tsimbite ngu nzila yo ni kanganyisa.

⁸ Gileyadhi didhoropa da vale va mahako wubihi, di tate ngu mnoha.

⁹ Kufana ni mitxawa ya sigevenga si solelako m'thu, ngu toneto, mtxawa wa vaphaxeli va daya vathu va vayako Sikemi; ina, va maha to nyenyeza.

¹⁰ Ni wona timhaka to thisa ngutu nyumbani ka va ka Israyeli: Efrayime a maha wugelegele konemo, Israyeli a ti nyenyezisile.

¹¹ Na nawe Judha kufunyelwa kwako ku emisetwe, mbimo yile ani ni no humisa vathu vangu ngu wukhumbini.