Hoseya 14 - Bhiblia Yo Sawuleka

Israyeli a dhanwa kutshumelela ka Txizimu

¹ Awe Israyeli, hundulukela ka Mkoma, Txizimu txako; nguko u wite ngu sionho sako.

² Wombani mapswi anu, se mi hundulukela ka Mkoma, mi txi khanu: Thavisa wotshe wubihi, u amukela wunene; se hi na kuninga mphaxo wa sisofu sathu ku nga marole.

³ Asiriya kha na mbi hi hulukisa, kha hi na mbi tsula hi di gadhile mahantxhi, ka mithumo ya manza athu, kha hi na mbi womba kambe ku khathu: Awe u Txizimu txathu; nguko ngu ngawe, awule wo felwa ngu vaveleki, a na mahelwa wumbilu.

Wutomi wa wuphya ka Israyeli

⁴ Ani ni na holisa ku ni tshuralela kwakwe, ani ngu kutilava kwangu, ni na va randa; nguko kuhenya kwangu ku khukhile kwawe.

⁵ Ka Israyeli ani ni na fana ni mwando, ene a na tshura kufana ni siluva, kambe a na hangalasa mitwi yakwe kufana ni Libhanoni.

⁶ Ma na nava madhavi akwe a maphya, kambe wudhumo wakwe wu na fana ni wa muolivha, ni kunungela kwakwe ku na fana ni ka Libhanoni.

⁷ Ava va no zumba ka mtsudi wakwe va na wuya; va na hanya kufana ni fulaho kambe va na veka siluva ku nga m'vhina mialakanyo yawe yi na fana ni vhinyo ya Libhanoni.

⁸ Efrayime a na khene: Ni ngadi ni txani kambe ani ni sithombe kani? Ani ni khala ku tiengisa, se eto na ti pfisisa; ani ni fana ni mndonga wa faya wa mkungu; ngu kwangu ka manwa mihando yako.

Magwito

⁹ I mani i ku txhari, kasi ku e pfisisa timhaka tiya kani? Wo txhariha kasi ku e tiziva kani? Nguko tinzila ta Mkoma ndo lulama, se vo lulama va na tsimbila ka tona, kambe vo biha va nawa ka tona.