Hoseya 13 - Bhiblia Yo Sawuleka

Kukhundumuswa ka Israyeli

¹ Mbimo yile Efrayime a txi womba-womba, ku ti ti dhudhumelwa; a guletilwe kona Israyeli; kambe ene a ti ningile m'nandu ngu Bhahali se a txi fa.

² Se konkuwa va engetete sionho, ngu silivhela yawe va mahile txifananiso txo tshulwa, i ku sithombe madingano ni wutxhari wawe, sotshe mithumo ya mtshuli, va ku kha vona ngu sona: Vathu vale vaphaxako va nyunta marole.

³ Ngu toneto, va na fana ni direfu da mixo ni ku nga mwando wa mabimbi-kutxa wu kuluvetako kutshatsheka, kufana ni mazokoro ale txihuhuri txi ma rinzako ngu txihuleloni, ni kufana ni wutshi wa txiroroni.

⁴ Hambi keto, ani ngani Mkoma, Txizimu txako, kukhukhela ditikoni ka Egipta; ngukonaho, khu na mbi ziva tximwani txizimu hahanze kwangu, nguko kha ku na Muhanyisi, na i si ngani.

⁵ Ani ni kuzivete txiwulani, ka mafu a kuoma.

⁶ Msana keto, va ti khurisile ngu sa wudyiseloni kwawe; mbimo yi va nga khura va tikulisile timbiluni kwawe; ngu kumaha keto, va ni divate.

⁷ Ni na fana ni ngonyamo kwawe, ni mbzingamela hanzila kufana ni yingwe.

⁸ Nga txikakanka txo mwalalelwa ngu vanana, ni na va mana, ni va bhenula misiha ya timbilu tawe; koneyo ni na va phatulela ku nga ngonyamo; sihari so leva sa txitinga si na va vharulela.

⁹ Kasi ku ni kukomba ti to u mwalate, awe Israyeli, u ni wukete, u wukete m'vhuni wako.

¹⁰ A hayi konkuwa mfumeli wako, kasi ku e kuxayisa, ka otshe madhoropa ako kani? Se valamuli vako ava ngu vona u nga khawe: Ni ninge mfumeli ni vathangeli kani?

¹¹ Ni ku ningile mfumeli ha kupandisekani kwangu, kambe ni ku thavisete kuhenya kwangu.

¹² Wubihi wa Efrayime wu sungeletwe, txionho txakwe txi vekisilwe.

¹³ Kupanda ko veleka ka wamsikati ku nata; ene mwanana wa kwa mbi engisa, nguko i mbimo, kambe kha nga ka wukhalo wu dingana kuvelekwa.

¹⁴ Ani ni na va tirula amu ko xaniswa ngu mndilo, ni va tekisa ka lifo. Awe lifo, yi hayi mitungu yako kani? Awe mndilo ku hayi kutimela kwako kani? Kutilaya ku na sisala amu ka maso angu.

¹⁵ Hambi ngako ene a txo ninga mihando ka vanawe, ku nata moya wa wutxani, Moya wa Mkoma, wu txi kwela ngu txiwulani, se ku na oma ni txibhuka txakwe, kambe ku na oma ni txisima txakwe, ene a handa thomba ka sotshe siya sawe sa lisima.

¹⁶ Samariya a na maha txiwula, nguko a wukete Txizimu txakwe; Va na dawa ngu ditxhari, vanana vawe va na phatulelwa, se vasikati vawe va sirumbu va na bhandiswa ngu hagari.