Biblia Todo Logo
Bib sou entènèt

- Piblisite -

Hoseya 12 - Bhiblia Yo Sawuleka

1 Efrayime a ti dyisa ngu moya, kambe a londeta moya wa wutxani: Ditshiku dotshe a andisa makuhu ni kuhoxota, a maha txitumelelano ni Asiriya, se mtona wa kona wu yiswa Egipta.

2 Mkoma wa lwa ni Judha, kambe a na tsayisa Jakobe, madingano ni tinzila takwe; madingano ni mithumo yakwe a na m'hakela.

3 A di ngadi mndani a ñote txizenende txa mwanawe, se ngu mtamo wakwe, ku nga mthangeli, a lwite ni Txizimu.

4 Ku nga mthangeli a lwite ni ngelozi, a txi yi xula; a dite, a txi yi kombela; kambe a to mana Txizimu kona Bheteli, se txona txi womba-womba ni nathu koneyo;

5 ina, ni Mkoma, Txizimu txa Mabutho a Tiyimbi; Mkoma ngene i ku txikhumbuliso txakwe.

6 Awe koko, hundulukela ka Txizimu txako; veka wunene ni kululama, kambe verela ka Txizimu txako, ngu ha ku si gwitiko.

7 Ene, mxavisi wokari, a ni txikalo txo kanganyisa manzani kwakwe; ene a dhunda kuxanisa.

8 Se Efrayime a khene: Hambiketo, ani na ti fumisa, kambe na ti manela tithomba ta hombe; Ka yotshe mithumo yangu, kha va na mbi mana wubihi ni wawumwewo, i ku txionho.

9 Aniko ani ngani Mkoma, Txizimu txako, kukhukhela ditikoni ka Egipta; ani ni ngadi ni txi na ku zumbisa matendani, kufana ni masiku a mitshangano ya kudikha.

10 Se ni na womba-womba ka vaprofeti, ni engetela siwoniso, kambe ngu ka mthumo wa vaprofeti, ni na va komba ngu sifananiso.

11 Ina Gileyadhi hi nga ene wubihi kani? Vona kha va vhuni txilo ngu ditshuri; Kona Giligali va daya tihomu; siluvelo sawe si fana ni mimumbu ya marigwi, madhawani ka tithembwe.

12 Jakobe a tutumete tithembweni ka Asiriya, se Israyeli a thumile ngu mhaka ya wamsikati, a xayisile sifuyo ngu mhaka ya wamsikati.

13 Se Mkoma ngu nzila ya mprofeti, a humisile Israyeli ngu Egipta, kambe a xayisilwe ngu mprofeti.

14 Efrayime a wusile ngutu kuhenya kwakwe; ngu toneto, a na mleka e zumba ni mnoha txitimwi kwakwe, kambe Mkoma wakwe a na m'wisela tingana takwe.

A Bíblia em Txitxopi © Bible Society in Mozambique, 2016.

Bible Society of Mozambique
Swiv nou:



Piblisite