Hoseya 11 - Bhiblia Yo Sawuleka

Txizimu txa randa vathu va txona va txieyiso

¹ Mbimo yile Israyeli i nga ti ti mfana, ani ni mrandile; se ni dhani mwanana wangu e huma ngu Egipta.

² Kambe ngako ni txi va dhana vona va ti nitshuralela; va ti ti phaxela ka va ka bhahali, ve hisela dibaselo sithombe so vatwa.

³ Hambi keto, ani ni m'dhedhisile Efrayime; ni va ñote ngu mawoko awe, kambe kha va tiziva ti to ani ni na va kalamukisa.

⁴ Ni va ndindete kwangu ngu majoke a wuthu, ngu majoke a lirando; se ni tsute kwawe kufana ni va va thavisako dikange ka tithamo tawe, kambe ni va ningile sakudya.

⁵ Kha va na mbi tshumelela ditikoni ka Egipta, kambe Asiriya a na va mfumeli wawe; nguko va lamba kuhunduluka.

⁶ Se ditxhari di nata txitimwi ka madhoropa awe, di nata fuvisa sikhweketo sa tisimbi, kambe di na va lovisa, ngu mhaka ya makungo awe.

⁷ Nguko vathu vangu va wekelela ku ni leka, hambiko va dhanako Nyatxitimwi, kha ngaho kwawe a m'guletako.

⁸ Ni ndi na kulekisa kutxani, awe Efrayime kani? Ni ndi na kuningelisa kutxani, awe Israyeli kani? Ni ndi na kumahisa kutxani ku nga Adhama kani? Ina ni ndi na kuveka ku nga Zebhoyimi kani? Mbilu yangu yi txitxile mndani kwangu, kotshe kunavela kwangu ka tura.

⁹ Na mbi londetela ta kupanda ka kuhenya kwangu; kha ni na mbi wuya ku ta hoxota Efrayime, nguko ani ni Txizimu, kha ni nga m'thu, Msawuleki hagari kwako; ani kha ni na mbi wulela didhoropani.

¹⁰ Mi na tsimbila ngu msana ka Mkoma; se ene a na bhonga ku nga ngonyamo; ene a txi bhonga, vanana va Mswa-ditambo va na dhudhumela.

¹¹ Va nata va txi dhudhumela ku nga txinyana, va Egipta, ni ku nga txituvani va ditiko da Asiriya, kambe ni na va maha ve zumba tinyumbani kwawe, kuwomba Mkoma.

¹² Efrayime ani randete ngu makuhu, ni nyumba ya ka Israyeli ngu wukanganyisi; kambe Judha a ngadi a txi fuma ni Txizimu kumweko ni Msawuleki wo thembeka.