Hagayi 2 - Bhiblia Yo Sawuleka

Kutshura ka Dithepele da diphya

¹ Ka mtxima wa wutxhanu ni yimbidi, ka ditshiku da magumi mambidi ni dimwedo ka mtxima, kutota dipswi da Mkoma, ngu ka mprofeti Hagayi, di txi kha dona:

² Womba konkuwa ka Zorobhabheli, mwana Salatiyeli, mthangeli wa ka Judha, ni ka Joxuwa, mwana Jozadhake, mphaxeli wa hombe, ni ka vathu vale va nga sala, u txi khawe:

³ I mani a kuho hagari kwanu, waku a nga huluka, a nga wona nyumba yiya ka wudhumo wa yona wo khata kani? Se konkuwa mi yi wonisa kutxani kani? Ina ayiya kha yi maneki i si nga ya txilo masoni kwanu, ngako yi txi fananiswa ni yile yo khata kani?

⁴ Se konkuwa, tsanisela awe Zorobhabheli, kuwomba Mkoma, tsanisela awe Joxuwa, mwana Jozadhake, mphaxeli wa hombe, tsaniselani motshenu anu vathu va ha mafuni, kuwomba Mkoma, aniko thumani, nguko ani ni na ni nanu, kuwomba Mkoma wa Mabutho a Tiyimbi,

⁵ madingano ni dipswi di ni nga pfana ni nanu, mbimo yile mi nga huma ngu Egipta, se Moya wangu wu ti ti zumba hagari kwanu; mi nga thaveni.

⁶ Nguko Mkoma wa Mabutho a Tiyimbi a womba tiya: Msana ka mbimonyana, na i si nga kuswela, ni na maha ti taku nzuma, ni mafu, ni linene, ni mafu a kuoma, si txi zinginika;

⁷ ni na dekadekisa otshe matiko, se ti nata tithomba ngu ka matiko, ni na tata nyumba yiya ngu wudhumo, kuwomba Mkoma wa Mabutho a Tiyimbi.

⁸ Txangu i silivhela, ni nzalama txhangu, kuwomba Mkoma wa Mabutho a Tiyimbi.

⁹ Wudhumo wa nyumba yi yo gwitisa, wu na va wa hombe kupinda wa yile yo khata, kuwomba Mkoma wa Mabutho a Tiyimbi, kambe ka wukhalo wuwa ni na ninga kudikha, kuwomba Mkoma wa Mabutho a Tiyimbi.

Txizimu txa kawuka kuonha ka vathu

¹⁰ Ka ditshiku da magumi mambidi ni mune ka mtxima wa wutxhanu ni mune, ka dilembe da wumbidi da Dhariyo, kutile dipswi da Mkoma ngu ka mthumo wa mprofeti Hagayi, di txi kha dona:

¹¹ Mkoma wa Mabutho a Tiyimbi a womba tiya: Wotisa konkuwa ka vaphaxeli, madingano ni mlayo, u txi khawe:

¹² Ngako wokari a txi phutela nyama yo sawuleka ngu tshulo ya txyambalo txakwe, se ngu tshulo ya kona e gwesa dipawu, mwendo sakudya, mwendo vhinya, mwendo ka mafura, mwendo ka txihi tximwani txo dyiwa, ina a na va adi sawulekile kani? Se vaphaxeli va xamute va txi kha vona: Ahim-him.

¹³ Se Hagayi a to khene: Ngako wokari a di tinyenyezisile ngu kugwesa m'thu wo fa, e gwesa tximwetxo ka simaha siya, ina txi na va txi di nyenyezile kani? Se vaphaxeli va txi xamula va ti ti kha vona: Si nava si di nyenyezile.

¹⁴ Sekoko, Hagayi a to xamula, a txi khene: Ngu tona tiya vathu vava, ni ditiko diya masoni kwangu, kuwombile Mkoma; se ngu tona tiya yotshe mithumo ya manza awe; ni sotshe si va ningelako si nyenyezile.

Txizimu txa thembisa kukatekisa vathu

¹⁵ Sekoko, konkuwa, vekani timbilu tanu ka eto, kukhukhela ka ditshiku diya ni kuya masoni, na mi sanzi kuveka dirigwi txitimwi ka dirigwi, amu ka dithepele da Mkoma.

¹⁶ Msana ka mbimo yileya, kutile m'thu e ta lava mmumbu wa magumi mambidi a mipimo ya fulaho, aniko ku ti kova ni digumi dwe; a txi ta dipipani ku ta reka mtxhanu wa magumi a mipimo ya vhinya, ku ti kova ni magumi mambidi dwe.

¹⁷ Ni mi dayisile ngu wuhya, ni maralala ni kukura, ka wotshe mthumo wa manza anu; kambe kha ka ngava ni wammweyo hagari kwanu a nga tshumela kwangu, kuwomba Mkoma.

¹⁸ Sekoko vekani, ani na mi khongotela, kukhukhela ka diya ditshiku ni kuya masoni, kukhukhela ka ditshiku da magumi mambidi ni mune ka mtxima wa wutxhanu ni mune, kukhukhela ka ditshiku di ku nga khatwa kuakwa Dithepele da Mkoma, vekani timbilu tanu ka timhaka tiya.

¹⁹ Ina yi nga diho mbewu txisangalani kani? Hambi m'vhinya, hambi mkuwu, hambi mromani, hambi muolivha, kha si khali kuninga mihando ya sona, aniko kukhukhela ka ditshiku diya na mi katekisa.

Txithembiso txa Txizimu ka Zorobhabheli

²⁰ Dipswi da Mkoma di tile ka wumbidi ka Hagayi, amu ka magumi mambidi ni mune ka mtxima, di txi kha dona:

²¹ Womba-womba ka Zorobhabheli mthangeli wa Judha, u txi kha awe: Ni na maha ti taku nzuma ni mafu si txi dekadeka;

²² se ni na hoxota txikhalo txa wukoma txa mifumo, kambe ni na khundumusa mitamo ya mifumo ya matiko; ni khundumusa txikotxikani, ni vale va khalahatshako ka txona; se mahantxhi ni vagadhi va ona, va na wa, mmwani ni mmwani ngu ditxhari da mwanawe.

²³ Ka ditshiku dile kuwomba Mkoma wa Mabutho a Tiyimbi, ni na kuteka awe Zorobhabheli, mwana Salatiyeli, txithumi txangu, kuwomba Mkoma, kambe ni kumaha u txi fanana ni phera yo tsanisa ngu yona; nguko ni kusawute, kuwomba Mkoma wa Mabutho a Tiyimbi.