Genesisi 8 - Bhiblia Yo Sawuleka

Kugwita ka ndambi

¹ Se Txizimu txi to alakanya Nowa ni sotshe sihari sa txitinga ni sotshe sifuyo si a nga ti naso ngalavani; Txizimu txi to maha diphuho di txi futeta txitimwi ka ditiko, se mati ma to khata kuphwa.

² Minambo ya kuhuma hahatshi ka mafu yi to ema kukhulunga; mafasitela a nzumani me vhaleka; se mati a nzuma ma to leka kuwa.

³ Se kudotho-kudotho mati ma to khata kuphwa ha mafuni, ma to phwa msana ka 150 wa masiku.

⁴ Se ka mtxima wa wutxhanu ni yimbidi, ngu ditshiku da wugumi ni mtxhanu ni mambidi ka mtxima, ngalava yi to ya txhekama txitimwi ka mmango wa Ararati.

⁵ Se mati ma to ya masoni ngu kuphwa, an'ze ka mtxima wa wugumi; ka ditshiku do khata ka mtxima wa wugumi, ku to woneka txitimwi ka mimango.

⁶ Ku to maheka taku msana ka mune wa magumi a masiku, Nowa a to tula difasitela di a nga ti di mahile ha ngalavani,

⁷ Se a to tulela digwana, adi di nga huma di puruma-puruma hahanze, di tshumela di wuya, kala kuza mati mephwa txitimwi ka mafu.

⁸ Msana keto, a to humisa txituvani, a nga ti natxo kasi kuwona, taku mwendo mati ma hungulekile txitimwi ka mafu.

⁹ Txituvani kha txa ya mana ko khandama kona, txi to wuya ka Nowa, txi ta wulela ngalavani, nguko ku ti ni mati txitimwi ka otshe mafu; ene a to nawuluta diwoko, e ñola txituvani e txi wuleta ngalavani amu a nga ti kona.

¹⁰ Aniko Nowa a to engeta e rinzela mtxhanu wa masiku ni mambidi, a to humisa kambe txituvani hahanze ka ngalava.

¹¹ Se txituvani txi to tshumela txi wuya kwakwe ni minova, txi di ñote ngu mrotho ditshanzu litshambwati lo nakana la muolivha. Ngu kona Nowa a nga tiziva taku mati ma phwite txitimwi ka mafu.

¹² Sekoko ene a to engeta e rinzela mtxhanu wa masiku ni mambidi, e humisa kambe txituvani, aniko kha txa tshumela txi wuya kwakwe.

¹³ Sekoko ngako Nowa a di ni 601 wa malembe a kuhanya kwakwe, ka mtxima wo khata, ngu ditshiku do khata da mtxima, ku to phwa mati ha mafuni. Nowa a to thavisa lyangwa la ngalava; a di solete, a to wona taku mafu a ditiko ma omile.

¹⁴ Ka ditshiku da wugumi ni mambidi, ka mtxima wa wumbidi, mati ma to maneka ma di phwite.

¹⁵ Sekoko Txizimu txi to womba ka Nowa, txi txi kha txona:

¹⁶ “Huma ngalavani, awe ni msikati wako, ni vanana vako ni vasikati va vanana vako.

¹⁷ Sotshe sihari si si ku kumweko ni nawe, sotshe si i ku nyama, sinyana, sifuyo, ni sotshe si si tsimbilako ngu dibindi ha mafuni, huma naso, si na velekele ha mafuni, si na veke mihando, si na ande ha mafuni.”

¹⁸ Sekoko Nowa a to huma, ni vanana vakwe, ni msikati wakwe, ni vasikati va vanana vakwe.

¹⁹ Sotshe sihari, sotshe so tsimbila ngu dibindi, sotshe sinyana, ni sotshe si si kasako ha mafuni, si to huma ngalavani, ngu tixaka ta sona.

Nowa e aka txiluvelo

²⁰ Nowa a to akela Txizimu txiluvelo, e teka sihari sokari ka sotshe so sawuleka, ni ka sotshe sinyana so sawuleka, a txi maha mningelo wo hiswa ha txiluveloni.

²¹ Se Mkoma a to hefemula, a txi pfa kubhumula, a txi khene kha Mkoma mbiluni kwakwe: “Ani kha ni na mbi ngadi ni ruketela ditiko ngu mhaka ya m'thu, nguko mipimiso ya mbilu ya m'thu njo biha, kukhukhela wananani kwakwe; kha ni na mbi ngadi ni daya kambe sotshe sivangwa si si hanyako, kufana ni ti ni nga ti maha.

²² Mafu ma di nga diho, kuphaya ni kuelula, malanga ni wuxika, wusiku ni mitshikari, kha si na mbi gwita.”