Genesisi 45 - Bhiblia Yo Sawuleka

Josefa e ti zivekisa ka vanawe

¹ Sekoko, Josefa kha sikota kutiñola masoni ka vathu votshe, vale va nga ti mrandete, a to kwangul, a txi khene: “Humani motshe mi ku hawa!” Kutisa sala ni wammweyo wa walo, mbimo yi Josefa a nga ti zivanekisa ka vanawe.

² Se ene a to guleta dipswi a txi dila ngutu ahawa ka kuza Vaegipta vavangi ve mu engisa, dipswi di pfala ni m'tini ka Faro.

³ Se Josefa a ti khene ka vanawe: “Ani ngani Josefa. Tate wangu a ngadi a txi hanya kani?” Aniko vanawe kha va sikota ni kuxamula, nguko va ti dhukile ngutu masoni kwakwe.

⁴ Se Josefa a to womba kha kwati ka vanawe, a txi khene: “Tshuketani hafuhi kwangu!” Se vona va to tshuketa. Sekoko ene a to womba kambe, a txi khene: Ani ngani Josefa mwananu, awu mi nga mxavisa a txi tiswa kheno Egipta,

⁵ aniko konkuwa mi nga xanisekeni, mi nga thaveni ngu kuwa mi nga ni xavisa, ni txi tiswa kheno, nguko eto ti mahekile kasiku ni ta mi lulamisela wutomi wanu, ngu kurumwa ngu Txizimu, ti to ni thangela masoni kwanu.

⁶ Nguko se malembe mambidi, ku di humelete paya ha mafuni, kambe ku ngadi sate mtxhanu wa malembe a nzala, ahawa ku no mbi phaywa txilo, hambi kuelulwa txilo.

⁷ Txizimu txi ni rumete masoni kwanu ka ditiko diya, kasi ku ta lulamisa txikungo, txo hulukisa lihunzu lanu ha mafuni, mi txi huluka, mi simama mi hanya ngu nzila yo xamalisa.

⁸ Ngu mhaka yeto, hi nganu mi nga ni rumela kheno, aniko Njizimu txi nga ni veka ni txi nga no va tate wa Faro, ni mthangeli wa nyumba yakwe yotshe, ni mfumeli wa ditiko dotshe da Egipta.

⁹ Tsulani ngu kukuluveta m'tini ka tate wangu mi txi ya m'gela ku khanu: Josefa mwanako a khene: “Txizimu txi ni mahile mfumeli wa ditiko dotshe da Egipta. Ngono kheno kwangu, u nga swele!”

¹⁰ Mi na ya zumba Goseni, hafuhi ni nani, awe, ni vanana vako, ni vatukulu vako, tinvuta tako ni tihomu tako, ni sotshe si si kulumbako.

¹¹ Koneyo ani ni nata kuxayisa, nguko paya yi ngadi yi txi na vaho amu ka mtxhanu wa malembe, kasiku u si zumbi wusiwanani, awe ni ngamu yako, ni sotshe si si kulumbako.

¹² Ma ti wona ngu maso anu, ni mnanda wangu Bhenjamini wa ti wona nene ti to ngani ngu txisofu txangu ni wombawombako ni nanu.

¹³ “Xawutelani ka tate wangu wudhumo wotshe awu ni ku nawo amu ditikoni ka Egipta, ni totshe ti mi nga ti wona, kambe kuluvetani mi txi ya teka tate wangu a txi wuya kheno.”

¹⁴ Konako Josefa a to khutarela mnanda wakwe Bhenjamini ngu thamo, a txi dila. Nene Bhenjamini a to dila, a di khutarela ka thamo ya Josefa mkomwakwe.

¹⁵ Josefa ngu msana ka kona a to pswopswa vanawe votshe, a txi va khutarela ngu diganda, na a txi dila. Msana keto, ngu kona vanawe va nga sikota kuwombawomba nayo.

¹⁶ Mhaka ya kubwaka ka vanawe Josefa ditikoni ka Egipta, yi to hoka ka Faro, se ene Faro ni manganakana akwe otshe, va to yi tsakela mhakeyo.

¹⁷ Faro a to womba ka Josefa, a txi khene: “Gela vananu u txi khawe: Mahani tiya: Rwekani timbongola tanu, mi txi tsula ditikoni ka Kanana,

¹⁸ mi na ya teka tate wanu, ni timwaya tanu, mi txi wuya kheno kwangu; ani ni nata mi ninga wukhalo wa wunene ditikoni ka Egipta, kasiku mi txi dya mihando ya kupfuna ka ditiko diya.

¹⁹ Awe Josefa, va gele kambe u txi khawe: Mahani tiya: Tekani sikotxikani sa ditikoni muwa ka Egipta, mi na ya sikota kuwuya ni vanana vanu ni vasikati vanu, ni tate wanu,

²⁰ mi nga karatekeni ngu si mi no si siya kheyo, nguko sotshe si i ku sa sinene ditikoni ka Egipta nzanu.”

²¹ Vanana va ka Israyeli va to maha toneto. Josefa a va lulamisete sikotxikani madingano ni kuruma ka Faro, e va ninga ni timbuva ta nzila.

²² Mmwani ni mmwani kwawe a mningile syambalo sa siphya, aniko Bhenjamini a mningile mazana mararu a male ya maxekele silivhela, ni syambalo sa mtxhanu so txitxa ngu sona.

²³ Ka tate wakwe, Josefa a rumete digumi da timbongola ta vamatune ti di rwate simaha sa lisima sa Egipta, ni digumi da timbongola ta mikati ti di rwate fulaho, ni sakudya, ni mbuva ya nzila.

²⁴ Se ngako a di salisanile ni vanawe, vona va to teka nzila, na Josefa a di va gete ku khene: “Mi nga henyisaneni hanzila!”

²⁵ Ti di ngeto, vona va to khukha ditikoni ka Egipta ve tsula Kanana, m'tini ka Jakobe, tate wawe.

²⁶ Sekoko va to m'gela va txi kha vona: “Josefa a ngadi a txi hanya, ngene a fumelako ditiko dotshe da Egipta!” Se mbilu ya Jakobe yi to dhuka, nguko a ti si kholwi ka tile va nga txi ti womba.

²⁷ Kambe vona va to xawutela otshe mapswi ale Josefa a nga va gela, se mbimo yi a nga wona sikotxikani si Josefa a nga si rumela kasi kuya mteka, ngu kona moya wa tate wawe wu nga sala kuwuka.

²⁸ Israyeli a to womba, a txi khene: “Basi! Mwanana wangu Josefa a ngadi a txi hanya! Ni na tsula ni txi ya mu wona ni sanzi kufa!”