Genesisi 39 - Bhiblia Yo Sawuleka

Josefa nyumbani ka Potifari

¹ Se Josefa a to tekwa e yiswa ditikoni ka Egipta. Potifari, mthenwa wa Faro, mthangeli wa vawoneleli, wamwamna wa Muegipta, a to xava Josefa, ka va ka Ismayeli, vale va nga mteka veya mningela kwakwe.

² Mkoma a ti ti ni Josefa, ngu mhaka yeto, totshe takwe ti ti tsimbila kha kwati, e zumba a txi thumela nyumbani ka nyamne wakwe wa Muegipta.

³ Nyamne wakwe a to khata ku ti wona ti to Mkoma a ti ti kumweko ni Josefa, ni ti to wa mninga mathomo ka totshe ti a ti mahako.

⁴ Josefa a to mana kusizeka masoni ka Potifari, se e mahwa txithumi txa kuthumela ene. Potifari a mmahile mthangeli wa nyumba yakwe, ni wa sotshe si si nga ti mlumba.

⁵ Kukhukhela ka txikhati txi Josefa a nga vekwa ha wukhaloni ko xayisa m'ti wa Potifari ni sotshe si si nga ti mlumba, Mkoma a to katekisa nyumba ya Muegipta, ngu mhaka ya mathomo a Josefa. Kateko ya Mkoma yi to hokela sotshe si a nga ti naso ha m'tini kwakwe, ni thembweni kwakwe.

⁶ Konaho Potifari a to ningela manzani ka Josefa, sotshe si a nga ti naso, kambe a siswi a txi khatala ngu txilo, hahanze ka si a nga ti fanela kudya. Josefa a ti ti ni txiemo txo khaleka, kambe a ti ni khohe yo tshura.

⁷ Msana ka totshe tiya, msikati wa Potifari, nyamne wakwe, a to khata kuwonetela Josefa ngu ku mnavela, e m'gela tiya: “Otela ni nani!”

⁸ Kambe Josefa a to lamba, a txi gela wule wamsikati wa kata nyamne wakwe, a txi khene: “Ngako ni diho hawa, nyamne wangu kha vileli txilo ka totshe ti ti mahekako m'tini hawa kwakwe, asi vekile manzani kwangu sotshe asi si mlumbako.

⁹ Kha nga ho mmwani i ku wa hombe ha m'tini kwakwe, hahanze kwangu: Kha txi nga ho txi a ni tsimbako ku txi gwesa, hahanze kwako awe dwe, nguko u msikati wakwe. Ni nga sikotisa kutxani kumaha to biha ta hombe to ngeto ni kuonhela Txizimu kani?”

¹⁰ Hambiko ene a nga ti wuyelela, ku m'dhana ditshiku ni ditshiku, kambe Josefa kha nga tumela kuotela nayo.

¹¹ Ngu dimwani ditshiku, Josefa a to wulela nyumbani kasi kuthuma mthumo wakwe wa txiheno, kambe ku ti si nga ho mmwani m'thu ha m'tini.

¹² Msikati wa Potifari a to ñola Josefa ngu dibhaji dakwe, a txi khene: “Otela ni nani!” Aniko Josefa a to leka dibhaji dakwe manzani ka msikati wa Potifari, e thava a txi huma hahanze.

¹³ A di woni ti to Josefa a lekile dibhaji dakwe manzani kwakwe, a to thava,

¹⁴ e dhana vathu va ha m'tini kwakwe a txi va gela tiya: “Wonani! Potifari a hi wuyisete Muhebheru wuwa, se wa maha tawalo. Ene a tile kwangu e lava kuotela ni nani, aniko ni pekile huwa ya hombe,

¹⁵ se ngako a di ni engisile ni txi peka huwa, a to siya dibhaji diya dakwe manzani kwangu a txi huma, e thava ngu kututuma.”

¹⁶ A to veketa dibhaji da Josefa kala kuza e wuya mwamna wakwe ha m'tini.

¹⁷ Sekoko a to m'geletela ona mapswi ale, a txi khene: “Txithumi txiya txa Muhebheru u nga ni wuyisela hawa ha m'tini, txi tile kwangu, txi ta ni ruketela.

¹⁸ Se ngako ni di kwangute ni txi peka huwa, txona txi to leka dibhaji da txona kwangu, txi txi thava.”

¹⁹ Mbimo yi Potifari a nga engisa ti mkatakwe a nga m'geletela, ta ku khene: “Wona ati txithumi txiya txako txi nga maha kwangu,” a to henya ngutu.

²⁰ Nyamne wa Josefa a to rumela ti to e ñolwa a txi khotelwa, amu ku nga ti ni sibotxhwa sa mfumeli, eya khotelwa naso kona,

²¹ Mkoma a ti ti kumweko ni Josefa, a txi telwa ngu wumbilu ngu ngene, a txi maha ti to e mana mathomo, masoni ka mxayisi wa mkora.

²² Mxayisi wa mkora a to khata kuthemba Josefa, e mninga mtamo txitimwi ka sibotxhwa sotshe, asi si nga ti mkorani mule, ni totshe ati ti nga txi fanela kuthumwa mkoranimo.

²³ Mxayisi wa mkora a ti si karateki ngu txilo, totshe ti ti manzani ka Josefa, nguko Mkoma a ti ti kumweko nayo, a txi katekisa mithumo yotshe yile a nga ti yi maha.