Genesisi 30 - Bhiblia Yo Sawuleka

¹ Ngako Rakeli a di woni ti to kha velekela vanana Jakobe, a to khata kulusa ka Leya, se e womba ka Jakobe, a txi khene: “Nihe vanana, hahanze keto, ndinene ku ni txi fa.”

² Sekoko Jakobe a to henyela Rakeli, a txi khene: “U pimisa ti to ani ni ha wukhaloni ka Txizimu, txi txi nga kulambela liveleko kani?”

³ Ene a to xamula a txi khene: “Ndiyo Bhiliha txithumi txangu. Otela nayo, ti to a na velekela vanana txitimwi ka mazolo angu, se ni na mana vanana ngu kwakwe.”

⁴ Ti di ngeto, ene a to mninga Bhiliha txithumi txakwe, a txi va msikati wakwe. Se Jakobe a to mteka.

⁵ Bhiliha a to mana txirumbu, a txi velekela Jakobe mwanana, wa mfana.

⁶ Sekoko Rakeli a to khene: “Txizimu txi ni lamute, txona txi ni engisile, txi txi ni ninga mwanana wa m'zambi.” Ngu mhaka yeto, a mrayile ditina daku i Dhani.

⁷ Bhiliha, txithumi txa Rakeli, a to engeta e mana txirumbu, e velekela Jakobe mwanana wa wumbidi, wa mfana.

⁸ Sekoko Rakeli a to khene: “Ni lwite ni mkomwangu, kulwa ka Txizimu, kambe se ni xute.” mwanana a mrayile ditina daku i Naftali.

⁹ Leya, ngu kuwona ti to a emile, khaswi a txi veleka, a to teka Zilpa, txithumi txakwe, e txi ningela ka mwamna wakwe Jakobe, kasi ku e maha msikati wakwe.

¹⁰ Zilpa, txithumi txa Leya, a to velekela mwanana wa mfana, Jakobe.

¹¹ Sekoko Leya a to khene: “Ni katekile!” Se e mraya ditina daku i Gadhi.

¹² Msana keto, Zilpa, txithumi txa Leya, a to velekela Jakobe mwanana wa wumbidi, wa mfana.

¹³ Sekoko Leya a ti khene: “Ni katekile! Vavasikati va na ni dhana ku ni m'thu wo kateka.” Se mwanana a mrayile ditina daku i Aseri.

¹⁴ Se ngu mbimo yo elula fulaho, Rubheni a to ya mana maranga a lirando thembweni, e wuya nawo ka Leya, mame wakwe. Sekoko Rakeli a to khene ka Leya: “Hi nga niha maranga awa a nga wuya nawo mwanako.”

¹⁵ Aniko Leya a mxamute a txi khene: “Ina u alakanya taku ndidotho aku u nga ni tekela mwamna kani? Sekoko u lava ku ni tekela kambe maranga a lirando a mwanana wangu kani?” Sekoko Rakeli a to khene: “Jakobe a na va ni nawe wusiku wuwa, kasi kudihela maranga a lirando a mwanako.”

¹⁶ Ni minova, Jakobe a txi wuya ngu thembweni, Leya a to mu hingeta e m'gela tiya: “Kulaveka ti to u otela ka wusiku wa nyamsi ni nani, nguko ni ku xavile ngu maranga a lirando a mwanana wangu.” Se ene a to otela nayo ka wona wusiku wule.

¹⁷ Txizimu txi to engisa mkombelo wa Leya, ene a to mana txirumbu, e velekela mwanana wa wutxhanu Jakobe, wa mfana.

¹⁸ Sekoko Leya a to khene: “Txizimu txi ni ningile txhatxhazelo, ngu ku ni nga ningela txithumi txangu ka mwamna wangu”; se mwanana a to mraya ditina daku i Isakari.

¹⁹ Sekoko Leya a to mana txirumbu kambe, e velekela mwanana Jakobe, wa wutxhanu ni mmweyo, wa mfana.

²⁰ Se a nje khene kha Leya: “Txizimu txi ni ningile txihiwa txo tshura, konkuwa mwamna wangu a na ni ninga lisima, nguko ni m'velekete mtxhanu wa vanana ni mmweyo.” Se a to mraya ditina daku i Zebhuloni.

²¹ Msana keto, a to veleka mwanana wa dihorana, e mraya ditina daku i Dhina.

²² Txizimu txi to alakanya Rakeli, txi mu engisile, txi mninga fanelo yo veleka vanana.

²³ Ene a to mana txirumbu e veleka mwanana wa mfana, a txi khene: “Txizimu txi thavisile tingana tangu.”

²⁴ Se a to mraya ditina daku i Josefa, a txi khene: “Mkoma a na ni ninge mmwani mwanana wa mfana!”

Jakobe ni Labhani ve maha txitumelelano

²⁵ Mbimo yi Rakeli a nga veleka Josefa, a to khene kha Jakobe ka Labani: “Ni tumelele ni txi tshumelela mwani kwathu, i ku ditikoni kwathu.

²⁶ Ni ninge vasikati vangu, ava ni nga va thumela kwako, ni vanana vangu, ni txi tsula, nguko awe wa yi ziva mithumo yangu.”

²⁷ Sekoko Labhani a to mxamula a txi khene: “Ngako ni di mani mathomo masoni kwako, zumba ni nani. Ni zivisilwe ngu txiwoniso ti to Txizimu txi ni katekisile ngu mhaka yako.

²⁸ A txi khene kambe: Ni gele hakhelo ya kona, ni na kudihela.”

²⁹ Sekoko Jakobe a to mxamula, a txi khene: “Awe wa tiziva ti ni nga kuthumelisa tona, ni ti sifuyo sako ni nga si xayisisa tona.

³⁰ Nguko asi sa sidotho u nga ti naso ni sinzi kuta, si engetetwe ngutu; ni Txizimu txi kukatekisile ngu mhaka yangu. Se konkuwa, ngu yihi mbimo ni no khata ngu yona kuthumela mwaya wangu kani?”

³¹ Se Labhani a to khene: “Ni nga kuninga txani kani?” Sekoko Jakobe a to mxamula, a txi khene: “Khu na mbi ni ninga txilo; ngako u txi maha ati ni no kukombela, ni na simama ni dyisa ni kuxayisa mitxhambi yako.”

³² Nyamsi ni na tsimbila ngu ka yotshe mitxhambi, ni na thavisa ka yona sihari sotshe sa matshakatshaka ni midenda, hagari ka tinvuta, ni thavisa ati i ku ta mindenda, ni na thavisa ati i ku ta matshakatshaka ni mixowo, hagari ka tiphongo.

³³ “Mangwana wa kutxa, mbimo yi u nota u ta wona asi u nga ni dihela ngu sona, kuthembeka kwangu ku na tikomba: Txihari txi txi no va i si nga txa mindenda mwendo matshakatshaka, hagari ka tiphongo, ni txile txi no va i si nga txa mindenda hagari ka tinvuta, m'tini kwangu, eso si na mangala ti to nza kupiwa.”

³⁴ Sekoko Labhani a ti khene: “Ngu tona, ti na maheke nga kuwona kwako.”

³⁵ Ka donedo ditshiku, a to thavisa vamabhongwe va matshakatshaka ni va mindenda, totshe tiphongo ta matshakatshaka ni ta mindenda, sotshe si si nga ti ni divalavati do basa; se hagari ka tinvuta a thavisile totshe ti i ku ta mtima. Ene a to si ningela ka vanana vakwe, ve si xayisa.

³⁶ Se Labhani a to ya zumba kule ni Jakobe, ngu mnava wa kudingana dipfhumba da masiku mararu. Se Jakobe a to simama a txi dyisa mitxhambi ya sifuyo sa Labani.

³⁷ Sekoko Jakobe a to ganga tindonga to hanya ta m'julamethi, ta msululwani, ni mkanju wa txilungu, e ti kwamula mabanzi, ti maha timhika to basa, ku txi woneka kubasa ka timhika.

³⁸ A to veka tindonga ti a nga kwamula makamba masoni ka tinvuta, amu ka mathange ni ka mikawu yo selela ka yona mati.

³⁹ Mbimo yi sona si nga ti landelana, masoni ka tindonga, si txi veleka vanana va madhowo a misesa ni a matshakatshaka, ni mavalavati.

⁴⁰ Sekoko Jakobe a to teka sinvutana siya e si veka ngu phuho, a txi tshumeta mtxhambi wu txi wonetela ka didhawa da sifuyo sa mindenda ni sa matshakatshaka ni ka sotshe si i ku sa mtima ka txibala txa Labani. Ngu toneto, a nga hambanisisa tona mitxhambi yakwe, asi yi patanisi ni mitxhambi ya Labani.

⁴¹ Mbimo yi si nga txi landelwa sihari sa mtamo, Jakobe a txi veka tindonga masoni ka sihari, hafuhi ni mikawu, kasi ku si txi landelwa masoni ka tindonga.

⁴² Aniko, mbimo yi sihari i nga ti si nga sa mtamo, ene asi ti veki, ngu toneto asi i nga ti so mbi na mtamo, si ti lumba Labani; ani si i nga ti sa kuena si txi va i di sa Jakobe.

⁴³ Ngu mhaka yeto, Jakobe a to maha nyatithombe wa hombe ngutu, a txi va ni mitxhambi yo tala, ni sithumi sa txisikati ni sa txiwamna, ni makamelu ni timbongola.