Genesisi 3 - Bhiblia Yo Sawuleka

Kwa mbi engisa ka mwaya wo khata

¹ Se mnyoka wu ti txharihile ngutu kupinda sotshe sihari sa txitinga, asi Mkoma Txizimu a nga ti si mahile. Mnyoka wu wombile ka wamsikati, wu txi kha wona: “Ina Txizimu txi wombile to mi nga dyeni muhando ni wawumwewo, ka yotshe mindonga yi yi ku thembweni muwa kani?”

² Se wamsikati a to khene ka mnyoka: “Athu hi nga sikota kudya mihando ya mindonga ya thembweni,

³ aniko, mihando ya mndonga wu wu ku hagari ka thembwe, Txizimu txi wombile ti to kha mi na mbi dya, hambi ni ku wu gwesa, kasi ku mi si fi.”

⁴ Sekoko mnyoka wu to kha wona ka wamsikati: “Lambi! Kufa kha mi na mbi fa!”

⁵ “Nguko Txizimu txa tiziva tito, ka ditshiku di mi no dya, mi na tuleka maso, mi fana ni Txizimu, mi ziva ta tinene ni to biha.”

⁶ Se wamsikati a to wona tito, mndonga wule mbwa wunene kuwudya, ni ti to wa tsakisa ku wu wona, mndonga wa kunavetisa, wo dingana kuninga wuzivi; a to hapha muhando wa mndonga, e dya; se ngu msana a to ninga mwamna wakwe, a nga ti nayo hafuhi, nene a to dya.

⁷ Sekoko maso awe ngu wumbidi wawe, ma to tuleka, se va to tiziva ti to i ti ti simbwiri; konaho va to runga sitshapa sa mkuwu, ve ti mahela syambalo sawe.

⁸ Se va to engisa dipswi da Mkoma Txizimu, a nga ti tsimbila-tsimbila amu thembweni, ngu mbimo ya minova; wamwamna ni wamsikati va to sisala hagari ka mindonga ya thembweni, ngu kuthava khohe ya Mkoma Txizimu.

⁹ Se Mkoma Txizimu a to dhana Adhamu, a txi khene: “U hani kani?”

¹⁰ Se Adhamu a to khene: “Ni to engisa dipswi dako thembweni muwa, se ni telwa ngu dizowa, nguko ni ti tximbwiri, se ni sisala.”

¹¹ Se Txizimu txi ti kha txona: “I mani a nga kugela ti to u tximbwiri kani? U to dya sa mndonga wule ni nga kutsimba kudya sa wona kani?”

¹² Sekoko Adhamu a to khene: “Msikati wu u nga ni ninga ti to e zumba ni nani, ngene a nga ni ninga sa mndonga wule, se nidya.”

¹³ Se Mkoma Txizimu a to wotisa ka wamsikati a txi khene: “U mahile txani kani?” Se wamsikati a txi khene: “Ni to xengwa ngu mnyoka se ni dya.”

Txitsayiso

¹⁴ Sekoko Mkoma Txizimu a to khene ka mnyoka: “Ngako u nga maha tiya, u ruketetwe ngutu kupinda sotshe sihari sa txitinga; u na tsimbila ngu dibindi, udya lithulu la mafu, otshe masiku a kuhanya kwako.

¹⁵ Se ni na veka livengo hagari kwako ni wamsikati, hagari ka liveleko lako ni liveleko lakwe; aliya li no ku ganyata msungo, se awe u txi li luma txizenende.”

¹⁶ Se ka wamsikati, Txizimu txi ti kha txona: “Ni na engetela kuxupheka kwako, ngako u di ni txirumbu, vanana vako va na velekwa hagari ka kupanda. Kunavela kwako ku na kuyisa ka mwamna wako, aniko ene a na kufuma.”

¹⁷ Se ka Adhamu, Txizimu txi ti kha txona: Ngako u nga engisa dipswi da msikati wako, u txi dya muhando wa mndonga wule ni nga ku gela ku khani: U nga dye muhando wa mndonga wuwa, ngu mhaka yako, ma ruketetwe mafu. U na dya mihando ya wona ngu kuxupheka otshe masiku a kuhanya kwako.

¹⁸ Mafu ma na ku milisela mipa ni maxexo, kambe u na dya mwasi wa txitinga.

¹⁹ “U na dya sakudya ngu mnyuko wa khohe yako, kala u txi tshumelela mafuni ahale u nga thaviswa kona; nguko awe u lithulu kambe u na tshumela u txi maha lithulu.”

²⁰ Se wamwana a to raya msikati wakwe ditina daku i Evha, nguko i ku mame wa votshe va va hanyako, mame wa kuhanya.

²¹ Se Mkoma Txizimu a to mahela Adhamu ni msikati wakwe, tinguwo ta madhowo, a txi va ambeka.

Adhamu ni Evha ve tutumiswa thembweni

²² Sekoko Mkoma Txizimu a to khene: “Wonani, m'thu a hindukile, a txi nga athu, kuziva ta tinene ni to biha. Konkuwa, kulaveka ku ene a si nawuluti dianza kasiku nene a txi hapha muhando wa mndonga wa wutomi edya, e hanya kala kupinduka.”

²³ Mkoma Txizimu koko, a to mtshotsha hahanze ka thembwe ya Edheni kasi ku e dima mafu ale a nga thaviswa ka ona.

²⁴ Se Txizimu txi di tshotshile Adhamu hahanze ka thembwe ya Edheni, txi to veka makerubhima ni ditxhari do tura, di nga txi ndiwitelwa khe ni khe, kasi kutsimbisela nzila ya mndonga wa wutomi.