Genesisi 25 - Bhiblia Yo Sawuleka

Limwani liveleko la Abrahamu

¹ Abrahamu a to teka mmwani msikati, a nga ti dhanwa ku i Ketura.

² Ketura a to m'velekela vanana vava: Zamirani, Jokisani, Madhani, Midhiyani, Jesibhoke ni Xuwa.

³ Jokisani a velekile Sabha ni Dhedhani; vanana va Dhedhani ngu vava: Asurime ni Latorime ni Lowomime.

⁴ Vanana va Midhiyani ngu vava: Efa, ni Eferi, ni Enoki, ni Abhidha, ni Elidha. Votshe vava mbanana va Ketura.

⁵ Kambe Abrahamu a to ninga Isaake sotshe si a nga ti naso.

⁶ A ningile simaha sokari ka vanana va sikaba sakwe, a txi ngadi e hanya, a to va hambanisa ni mwanana wakwe Isaake, a txi va rumela ka ditiko da wutxani.

Kufa ka Abrahamu

⁷ Kuhanya ka Abrahamu, nga 175 wa malembe.

⁸ Abrahamu a to ningela muhefemulo wakwe, a fite a di kumbile ngutu, i di txikhovana, a to ya tshangana ni va ka kwawe.

⁹ Isaake ni Ismayeli, vanana vakwe, va to mtshotsha diphalani ka Makipela, thembweni ka Efroni, mwana Zowari, Muheti, diphala di di ku masoni ka Mambre.

¹⁰ I thembwe yi Abrahamu a nga xava ka vanana va Heti, amuwa a nga tshotshwa kona Abrahamu ni msikati wakwe Sara.

¹¹ Msana ka kufa ka Abrahamu, Txizimu txi katekisile mwanakwe Isaake; Isaake a ti ti akile hafuhi ni Bheheri-Lahayi-Royi.

Liveleko la Ismayeli

¹² Ngu tiya tiveleko ta Ismayeli, mwana Abrahamu, a nga velekwa ngu Hagari, Muegipta, txithumi txa Sara.

¹³ Matina a vanana va Ismayeli, madingano ni tiveleko tawe, ngu awa: Matiwula ngu Nabhayoti, ku txi gameta Kedhari, Adhibheli, ni Mabhisani,

¹⁴ Misima, Dhuma ni Masa,

¹⁵ Hadhadhe, Tema, Jeturi, Nafisi ni Kedhime.

¹⁶ Ngu vona vava vanana va digumi ni vambidi, matina awe ma rayilwe sidhoropana sawe ni mikhokhola yawe: Mmweyo ni mmweyo i ti ti mthangeli wa lihunzu la ka kwawe.

¹⁷ Ngu yiya tanga ya kuhanya ka Ismayeli: 137 wa malembe, se a to ningela muhefemulo wakwe, efa, eya ti patanisa ni va ka kwawe.

¹⁸ Vanana va Ismayeli va ti ti akile hagari ka Hevhila ni Suri, ngu diphambo da wutxani ka Egipta, ka nzila yi yiyako Asuri.

Kuvelekwa ka Esawu ni ka Jakobe

¹⁹ Ngu tiya tiveleko ta ka Isaake, mwana Abrahamu. Abrahamu a to veleka Isaake.

²⁰ Isaake a ti ni mune wa magumi a malembe, mbimo yi a nga tekana ni Rebheka, mwana Bhetuweli, muaramu, wa Padhani-Aramu, ndiya ya Labhani, muaramu nene.

²¹ Isaake a to khongela ka Mkoma, a txi kombelela mkatakwe Rebheka, nguko i ti txifule. Mkoma a engisile mkombelo wa Isaake, se Rebheka a to mana txirumbu.

²² Se vanana va ti ti lwa mndani kwakwe; sekoko a to khene: “Ngako i di tona tiya, ni ngava ni txi hanyela txani kani?” Konako a to ya wotisa ka Mkoma;

²³ se Mkoma a to mxamula a txi khene: “Mndani kwako ku ni matiko mambidi, se tihunzu timbidi ti na abaneka mndani kwako: Lihunzu limwelo li nava ni mtamo kupinda limwani, mkoma wa kona a na khoziswa ngu mnada wakwe.”

²⁴ Ngako ku di hokile mbimo ya kuhefemula, ku to huma mahasa.

²⁵ A to velekwa wo khata: I ti wo bhilivila, kambe a ti ti ni mapfhepfheleti o nga matoya a didhamba, va to mraya ditina daku i Esawu.

²⁶ Ngu msana a to huma mnanda wakwe, dianza dakwe di ti ñote txizenende txa Esawu, e raywa ditina daku i Jakobe. Isaake a ti ti ni tanga ya mtxhanu wa magumi ni digumi dimwedo a malembe, mbimo yi Rebheka a nga veleka vanana.

Esawu e xavisa wutiwula wakwe

²⁷ Vanana va manekile va txi kula. Esawu i ti ti mxoti wa hombe, a txi zumbela txitingani; Jakobe i ti ti m'thu wo thutha, a ti ti zumbela matendani.

²⁸ Isaake a txi dhunda ngutu Esawu, nguko a txi tsakiswa ngu nyama yi a nga ti mxotela, kasi Rebheka a txi randa Jakobe.

²⁹ Jakobe a ti ti bhikile sakudya, Esawu a to wuya ngu txitingani, a di karate.

³⁰ Se Esawu a to khene ka Jakobe: “Na ku kombela nihe sakudyeso so bhilivila ni txi dya, nguko ni wuya ni di karate.” Ngu toneto, Esawu a nga ningwa ditina daku i Edhomi.

³¹ Sekoko Jakobe a to khene: “Khata ngu ku ni xavisela fanelo ya wutiwula wako.”

³² Se Esawu a to khene: “Eko ni no fa ngu nzala; wu na ni vhuna txani wutiwula kani?”

³³ Sekoko Jakobe a to khene: “Khata ngu kuxambanya.” Esawu a to xambanya, e xavisa wutiwula wakwe ka Jakobe.

³⁴ Jakobe koko a to ningela dipawu, ni sakudya so bhilivila ka Esawu; a to dya e sela, a txi khukha e tsula. Ngu kumaha keto, Esawu a to txhipisa fanelo ya wutiwula wakwe.