Genesisi 21 - Bhiblia Yo Sawuleka

Kuvelekwa ka Isaake

¹ Mkoma a to alakanya Sara, nga ti a nga womba, se e maha kwakwe ati a nga ti thembisile tona.

² Sara a to mana txirumbu ka Abrahamu na a ti kumbile, e veleka mwanana wa m'zambi, ka mbimo yi Txizimu txi nga ti thembisile.

³ Mwanana wu a nga velekwa ngu Sara, Abrahamu a mrayile ditina daku i Isaake.

⁴ Abrahamu a to yisa wukwera mwanana wakwe Isaake mbimo yi a nga va ni mtxhanu wa masiku ni mararu, nga ti ti nga leletiswa tona ngu Txizimu.

⁵ Abrahamu a ti ni tanga ya 100 wa malembe, mbimo yi Isaake mwanana wakwe a nga velekwa ngu Sara.

⁶ Se Sara a to womba, a txi khene: “Txizimu txi ni ningile kuseka, se votshe va va no yi engisa mhaka yiya, va na seka ni nani.”

⁷ Sara a to ya masoni ngu kuwomba, a txi khene: “I mani a nga ti womba ka Abrahamu ti to Sara a na mamisa mwanana kani? Aniko ni m'velekete mwanana wa m'zambi, kukumbani kwakwe.”

⁸ Se mwanana a to kula, e lekiswa kumama; sekoko Abrahamu a to maha m'buso wa hombe, ka ditshiku di Isaake a nga lekiswa kumama.

Kututumiswa ka Hagari ni Ismayeli

⁹ Ngako Sara a txi wona Ismayeli, mwana Hagari, Muegipta, awu a nga veleka ni Abrahamu, na a txi sakana ni Isaake mwanakwe

¹⁰ a to womba ka Abrahamu, a txi khene: “Tutumisa khumbiyo ni mwanana wa yona, nguko mwanana wa khumbi kha na kusikota kudya thomba ni Isaake, mwanana wangu.”

¹¹ Dipswi diya di to khuvekisa Abrahamu ngu mhaka ya Ismayeli, mwanana wakwe.

¹² Aniko Txizimu txi to kha txona ka Abrahamu: “U nga pandiseke ngu mhaka ya mwanana wako, i mhaka ya txithumi txako: Awe maha totshe ti Sara a ku kombelako, nguko ka Isaake ku na huma liveleko li li no kulisa ditina dako.

¹³ Aniko ngu ka mwanana wa txithumi, ani ni na tumbulukisa mfumo wa hombe, nguko nene mwanana wako.”

¹⁴ Sekoko Abrahamu a to wuka ni mixo, e teka sakudya ni txibhembe txa mati e rweka Hagari, se a to m'belekisa mwanana, ngu msana a to mu humisa. Hagari a to huma e pepeseka mu txiwulani ka Bherisebha.

¹⁵ Mbimo yi mati ma nga guma mu ka txibhembe, a to otelisa mwanana hahatshi ka dikhukhu.

¹⁶ A to siya mwanana wakwe e tsimbila mnava wa mpimo wa kukhwinzwa ka lingove, a txi ya khalahatsha, nguko a ti ti khene: “Kha ni lavi kuwona mwanana wangu a txi fa.”

¹⁷ Txizimu txi to engisa kudila ka mwanana, se Ngelozi ya Txizimu, yi di nzumani, yi to dhana Hagari yi txi kha yona: “Njitxani u ku natxo awe Hagari kani? U nga thave, nguko Txizimu txi engisile kudila ka mwanana, txi di ka wukhalo wa txona.

¹⁸ Khukha u txi ya teka txifanyana, u txi ñoleta ngu dianza dako, nguko ani ni na tumbulukisa ngu ka txona, ditiko da hombe.”

¹⁹ Txizimu txi to tula maso a Hagari, se ene e wona txisima txa mati. A to ya reka mati e tata txibhembe, a txi ya ninga txifanyana txi sela.

²⁰ Txizimu txi ti kumweko ni mfana wule, ene a to kula a txi aka txiwulani, ahawa a nga ziva kufula ngu wulaho.

²¹ Ene a to zumba txiwulani ka Parani, se mame wakwe a to mtekela msikati wa ditikoni ka Egipta.

Txitumelelano txa Abrahamu ni Abhimeleki

²² Se ku to maheka taku, ka yona yile mbimo, Abhimeleki ni Fikoli, mthangeli wa dibutho dakwe da yimbi, e womba-womba ni Abrahamu, a txi khene: “Txizimu txi ni nawe, ka totshe ti u ti mahako.

²³ Konkuwa, xambanya ngu Txizimu kwangu kona hawa, ti to khu na mbi womba makuhu, hambi ni mwanana wangu, mwendo mtukulu wangu; aniko u na thembeka kwangu ni ka dona ditiko diya u ku muwuyi ka dona, nga kule nani ni nga wona kuthembeka kwako.”

²⁴ Abrahamu a to khene: “Na xambanya.”

²⁵ Abrahamu a to sola Abhimeleki ngu mhaka ya txisima txiya sithumi Abhimeleki si nga ti m'honyote ngu txieyiso.

²⁶ Sekoko Abhimeleki a to mxamula, a txi khene: “Ani kha ni tizivi ti to i mani a nga maha toneto; awe khwa ni gela timhaketo, hambi ku tipfa va txi womba, kha na tipfa kala nyamsi.”

²⁷ Abrahamu a to teka tinvuta ni tihomu e ninga Abhimeleki, se ngu wumbidi wawe va to maha txitumelelano.

²⁸ Abrahamu a to phawusa mtxhanu wa sinvutana ni simbidi sa mikati sa mtxhambi, e si veka ngu phuho.

²⁹ Abhimeleki a to wotisa ka Abrahamu, a txi khene: “U phawusela txani sinvutana siya sa mtxhanu ni simbidi kani?”

³⁰ Abrahamu a to xamula a txi khene: “Amukela sinvutana siya sa mtxhanu ni simbidi ni ku ningako ngu manza angu, kasiku si maha txikombiso txa ku ni fakazela ku ngani ni nga kela txisima txiya.”

³¹ Ngu mhaka yeto wukhalo wule va to wu dhana ku i Bherisebha, nguko va xambanyile koneho ngu wumbidi wawe.

³² Va to maha txitumelelano kona Bherisebha; Abhimeleki a to khukha, kumweko ni Fikoli, mthangeli ya dibutho dakwe da yimbi, ve tshumelela ditikoni ka Vafilista.

³³ Abrahamu a to phaya mndonga wa mtamargera, kona Bherisebha, se koneho a to dhumisa ditina da Mkoma Txizimu txo mbi na magwito.

³⁴ Abrahamu a zumbile malembe amangi ditikoni ka Vafilista.