Genesisi 14 - Bhiblia Yo Sawuleka

Abramu e hulukisa Loti

¹ Ka mbimo ya Amurafeli, mfumeli wa Sinari, ni Ariyoki, mfumeli wa Elasari, ni Kedhorolawomeri, mfumeli wa Elame, ni Tidhali, mfumeli wa Goyimi,

² vafumeli vava va to xoma yimbi va txi yalwa ni Bhera, mfumeli wa Sodhoma, ni Bherisa, mfumeli wa Gomora, ni Senahabhi, mfumeli wa Adhama, ni Semebheri, mfumeli wa Zebhoyimi, ni mfumeli wa Bhela, i ku Segori.

³ Votshe vafumeli vava, va to tshangana mkovani ka Sidhime, i ku Linene la Mnyu.

⁴ Mndani ka digumi da malembe ni mambidi, va manekile va di fumetwe ngu Kedhorolawomeri, aniko ka dilembe da digumi ni mararu, va to tereka.

⁵ Ka dilembe da digumi ni mune, mfumeli Kedhorolawomeri ni vafumeli va a nga ti pfana navo, va to ya khozisa Varefayime, ditikoni ka Astaroti-Karinayimi, ni Vazuzimi, ditikoni ka Kame, Vaemimi, libalani ka Kariyatayimi,

⁶ va to khozisa Vahorewu, mimangoni ka Seyiri, kala kuhoka Eli-Farane, hafuhi ni txiwula.

⁷ Vona va to tshumela va txi ta ka Mlonga wa Kuthethiswa, i ku Kadhesi, ve khozisa dotshe ditiko da Vaamaleki ni da Vaamori, va nga ti akile ditikoni ka Azazani-Tamari.

⁸ Sekoko mfumeli wa Sodhoma, ni mfumeli wa Gomora, ni mfumeli wa Adhama, ni mfumeli wa Zebhoyimi, ni mfumeli wa Bhela, ene wuwa i ku Segori, va to xoma yimbi ve yalwa navo, libalani ka Sidhime,

⁹ va txi lwa ni Kedhorolawomeri mfumeli wa Elame, Tidhali mfumeli wa Goyimi, Amurafeli mfumeli wa Sinari, ni Ariyoki mfumeli wa Elasari. Vafumeli va mune va txi wukela mtxhanu wa vona.

¹⁰ Ngu ti taku, libala la Sidhime li ti ni sisima sasingi si nga ti tate ni ndope, kuthavani kwawe mfumeli wa Sodhoma ni mfumeli wa Gomora, va to hojomela ka sona, avale va nga sala va to thavela mmangoni.

¹¹ Vakhozisi va to teka totshe tithomba ta Sodhoma ni ta Gomora, ni sotshe sakudya sawe, ve tsula.

¹² Va to mñola nene Loti, awule a nga ti ti zumba Sodhoma, mwanana wa mwanawe wa Abramu, ni tithomba takwe, ve tsula naso.

¹³ Sekoko mmweyo wa vale va nga huluka, a to ya zivisa Abramu, Muhebheru; Muamori a nga ti akile mikusuni ka Mambre, dixaka da Esikole ni Aneri vona va ti ti pfana ni Abramu.

¹⁴ Mbimo yile a nga ziva ti to Loti, mwanana wa mnanda wakwe a ñotwe, a to tshanganisa 318 wa tindena, ka va a nga ti zumba navo, e va londeta kala Dhani.

¹⁵ Se ene a to abanisa vathu vakwe ngu mitxawa, va txi dayela valala vawe ni wusiku, ve va khozisa, ni kuva hinga kala Hobha, wuphemba ka Dhamasku.

¹⁶ A va honyote sotshe si va nga ti handile, kumweko ni Loti, mwanana wa mnanda wakwe, ni vavasikati, ni vathu votshe va nga ti ñotwe.

Melkisedheki e katekisa Abramu

¹⁷ Mbimo yi Abramu a nga wuya, msana ka kuva a di khozisile Kedhorolawomeri ni vafumeli vale a nga ti pfana navo, mfumeli wa Sodhoma a to m'hingeta libalani ka Savhe (i ku libala la mfumeli.)

¹⁸ Melkisedheki, mfumeli wa Salema, a to tisa dipawu ni vhinya, ene i ti mphaxeli wa Txizimu Nyatxitimwi.

¹⁹ Ene a to katekisa Abramu, a txi khene: “A na katekiswe Abramu ngu Txizimu Nyatxitimwi, M'vangi wa nzuma ni mafu!

²⁰ Txi na bongwe Txizimu Nyatxitimwi txi nga ningela valala vako manzani kwako!” Se Abramu a to ninga Melkisedheki sa wugumi ka sotshe si a nga ti si mani.

²¹ Sekoko mfumeli wa Sodhoma, a to khene ka Abramu: “Ni ninge vathu dwe, u teka tithomba ti maha tako.”

²² Aniko Abramu a xamute ka mfumeli wa Sodhoma, a txi khene: “Na xambanya ngu kugula dianza dangu masoni ka Txizimu Nyatxitimwi, i ku M'vangi wa nzuma ni mafu,

²³ ti to kha ni na mbi teka txilo txi txi kulumbako, hambi ndrima, mwendo ngoti yo sunga ngu yona tikathula. Nguko u nga thuka u womba ku khawe ni humelelisile Abramu.

²⁴ Kha ni na mbi teka txilo, hahanze ka sile vathu vangu va nga dya, ni sile va no avelwa avale va nga ta ni nani, Aneri, Esikole ni Mambre. Evo va na teka txyavelo txawe.”