Genesisi 10 - Bhiblia Yo Sawuleka

Liveleko la vanana va Nowa

¹ Atiya koko ndiveleko ta vanana va Nowa, Semi, Kame ni Jafete; ngu ka vona ku velekilwe vanana msana ka ndambi.

² Vanana va Jafete ngu vava: Gomeri, ni Magoge, ni Madhayi, ni Javhani, ni Tubhali, ni Mexeki, ni Tirasi.

³ Vanana va Gomeri ngu vava: Asikenazi, ni Rifati, ni Togarime.

⁴ Vanana va Javhani ngu vava: Elixa, ni Tarxixi, ni Kitimi, ni Dhodhanima.

⁵ Kukhukhela ka vava, ku tumbulukile votshe vathu va va zumbako sitondoloni, na mazumbelo awe ma txi ya ngu tixaka tawe, ni tidimi tawe, ni mafumelo awe.

⁶ Vanana va Kame ngu vava: Kuxe, ni Mesirayime, ni Pute, ni Kanana.

⁷ Vanana va Kuxe ngu vava: Sebha, ni Havhila, ni Sabhita, Rahama, Sabhiteka; se vanana va Rahama ngu vava: Sabha, Dhedhani.

⁸ Kuxe a to veleka Namrodhe a nga va i di ndena yo khata ya mtamo ha mafuni.

⁹ I ti ndena ya mxoti masoni ka Mkoma. Ngu mhaka yeto, kuhumile divingu di diku: “A fana ni Namrodhe, ndena ya mxoti, masoni ka Mkoma.”

¹⁰ Se Namrodhe a txi khata kufuma, a fumile madhoropa a Bhabheli, Ereke, Akadhe, madhoropa awa otshe ma ku ditikoni ka Senari.

¹¹ Nimrodhe a khukhete ka dona ditiko dile, eya Asiriya, a nga aka Ninivha, ni Rehobhoti-Iri, ni Kala

¹² ni Reseni, hagari ka Ninivha, ni Kala, i nga ti Didhoropa da Hombe.

¹³ Mizarayime a velekile Ludhime, ni va Anami, ni va Lehabhimi, ni va Nafetu

¹⁴ ni va Patrosi, ni va Karelu, ni va Kafitori, ahale va nga humela kona Vafilista.

¹⁵ Se Kanana a velekile Sidhoni, matiwula akwe, ngu msana e veleka Heti,

¹⁶ Kanana ngene tate wa Vajebhusi ni Vaamori, Vagirigasi,

¹⁷ Vahevhi, ni Vaaraki, ni Vasini,

¹⁸ Vaarivhadhi, ni Vazemari, ni Vahamate; msana keto va hangalakile va lixaka la Kanana.

¹⁹ Muhingano wa Vakanana wu ti tiya ngu Sidhoni, wu txi komba kuya Gerara, kala Gaza, ni Sodhoma, ni Gomora, ni Adhama, ni Zebhoyimi, kala kuya gwitela Lasa.

²⁰ Ngu vona vava vanana va Kame, ngu tihunzu tawe, ni tidimi tawe, matiko awe, ni mifumo yawe.

²¹ Se ngu ka Semi, ku to velekwa vanana, ngene tate wa votshe Vahebheru, kambe ene mkomwa Jafete.

²² Vanana va Semi ngu vava: Elame, Asuri, Arifaxadhe, Ludhe ni Aramu.

²³ Vanana va Aramu ngu vava: Uzi, Hule, Geteri, ni Masi.

²⁴ Arifaxadhe a to veleka Sala, Sala e veleka Ebheri.

²⁵ Ngu ka Ebheri ku velekilwe vanana vambidi i ku vava: Wo khata ti ti Faleza, nguko ka mbimo yakwe vathu va hangalakile ni ditiko; mwanawe a ti dhanwa ku i Jokitani.

²⁶ Jekitani a velekile Elimodhadhe, Salefe, Asarimoti, Jera,

²⁷ Hadhoramu, Uzali, Dhekila,

²⁸ ni Obhali, Abhimayeti, Sabha,

²⁹ Ofiri, Hevhila, Jobhabhi, votshevo mbanana va Jekitani.

³⁰ Vona va ti ti akile kukhukhela ditikoni ka Meza, kala ditikoni ka Sefare, mmangoni ka wutxani.

³¹ Evo mbanana va Semi, ngu tihunzu tawe ni tidimi tawe, ngu tihunzu ta matiko awe ni mifumo yawe.

³² Ngu yiya mimwaya ya vanana va Nowa, ngu tiveleko tawe ni mifumo yawe; se yi khukhete ka vava yotshe mifumo yi yi nga hangalaka ha mafuni, msana ka ndambi.