Ezra 8 - Bhiblia Yo Sawuleka

Ava va nga wuya ngu Bhabhilona

¹ Avava koko, mbathangeli va vatate vawe, ngu tihunzu tawe, ava va nga kwelela ni nani ngu Bhabhilona, kufumani ka mfumeli Aritasasta:

² Ka vanana va Finiyasi, i Jersoni; ka vanana va Itamari, i Dhaniyele; ka vanana va Dhavhidha i Hatusi;

³ ka vanana va Sekaniya, ni ka vanana va Parosi i Zakariya, kumweko ninene va batwe kala 150 wa vavamna;

⁴ ka vanana va Pathate-Mowabhe i Eliyohenayi mwana Zakariya, kumweko ni 200 wa vavamna;

⁵ ka vanana va Sekaniya mwana Jahaziyeli kumweko ni 300 wa vavamna;

⁶ se ka vanana va Edhimi, i Ebhedhi mwana Jonatani, kumweko ni mtxhanu wa magumi a vavamna;

⁷ ngu ka vanana va Elamu, i Josaya mwana Ataliya, kumweko ni mtxhanu wa magumu ni magumi mambidi a vavamna;

⁸ se ngu ka vanana va Sefatiya, i Zebhadhiya, mwana Mikayeli, kumweko ni mtxhanu wa magumi ni magumi mararu a vavamna;

⁹ ka vanana va Jawobe, i Obhadhiya, mwana Jeyeli, a ti ni 218 wa vavamna;

¹⁰ se ka vanana va Selomite, mwana Josifiya, ene, ni 160 wa vavamna;

¹¹ se ngu ka vanana va Bhebhayi, i Zakariya, mwana Bhebhayi, ni magumi mambidi a vavamna ni mtxhanu ni vararu;

¹² se ngu ka vanana va Azigadhe, i Jowanani, mwana Hakatani, kumweko ni 110 wa vavamna;

¹³ se ngu ka vanana vo gwitisa va Adhonikamu, matina awe i ti ti awa: Elifeleti, Jeyeli ni Semaya, kumweko ni mtxhanu wa magumi a vavamna ni digumi dimwedo;

¹⁴ se ngu ka vanana va Bhigvhayi, i Utayi, ni Zabhudhi, kumweko ni mtxhanu wa magumi a vavamna ni magumi mambidi.

Ezra e ruma kulondeta va ka Levhi

¹⁵ Ni to va tshanganisa hafuhi ni mnambo wu wuyako Ahavha, hi to zumba konaho masiku mararu; ni to xola vathuni ni ka vaphaxeli, kha na mana ni wammweyo mwanana wa ka Levhi.

¹⁶ Sekoko ni to rumela Eliyezeri, Ariyeli, Semaya, Elinatani, Jaribhe, Elinatani, Nathani, Zakariya ni Mesulamu, vathangeli, kufana ni Joyaribhe ni Elinatani, i nga ti titxhari.

¹⁷ Se ni to va ruma kutsimbila ve lava Idho, mthangeli wa wukhalo wa Kasifiya, ni va ningile mapswi kuya womba ka mwanawe Idho ngu txisofu txawe, ni ka vanetine wukhaloni ka Kasifiya, kasi kuva txi hi tisela vathumi Nyumbani ka Txizimu txathu.

¹⁸ Ngu dianza da dinene da Txizimu, va to hi tisela wamwamna wo ziva ngu ka vanana va Mali, mwana Levhi, mwanana wa Israyeli, i ku Serebhiya, ni vanana vakwe, ni vanawe, votshe digumi ni mtxhanu ni vararu.

¹⁹ Se ni Hasabhiya, kumweko ni Jesaya, ngu ka vanana va Merari, ni vanana vakwe ni vanawe, i ti ti magumi mambidi.

²⁰ Ngu ka vanetine vale va nga ningelwa ngu Dhavhidha ni madhota kumaha mthumo wa va ka Levhi, i ti ti 220 wa vanetine, va nga dhanetelwa ngu matina awe.

Kutitona ni kukhongela ka vathu

²¹ Sekoko ni to huwelela kutitona hafuhi ni mnambo wa Ahavha, kasi hi txi ti namisa masoni ka khohe ya Txizimu txathu, hi txi txi kombela nzila ya yinene yathu, ya vanana vathu, ni ya totshe tithomba tathu.

²² Nguko ni vile ni tingana kukombela masotxhwa ka mfumeli, ni vagadhi va mahantxhi ku hi vhikela ka valala nzilani, ngako hi nga ti ti wombile ka mfumeli ku khathu: Dianza da Txizimu txathu di txitimwi ka votshe vale va txi lavako ngu ta tinene, aniko mtamo wa txona ni txiviti txa txona, si txitimwi ka vale va txi lekako.

²³ Athu koko, hi to ti tona, ni kukombela totsheto ka Txizimu txathu, se txi to pfisisa mikombelo yathu.

Kuningelwa ka miningelo

²⁴ Sekoko ni to phawusa digumi da vaphaxeli ni vambidi vahombe: I ku Serebhiya ni Hasabhiya, kumweko ni vanawe va digumi.

²⁵ Se ni to va pimela silivhela ni nzalama, i nga ti siningo so lumba Nyumbani ka Txizimu txathu, asile si nga ningilwa ngu mfumeli ni madhota, ni vathangeli vakwe, ni votshe va ka Israyeli, va nga ti maneka koneho.

²⁶ Ni to va pimela manzani kwawe 650 wa titalenta ta silivhela, se ngu siya sa silivhela dizana wa titalenta, ni dizana wa titalenta ta nzalama.

²⁷ Ni magumi mambidi a majingo a nzalama ya 1.000 wa madhariko, ni mikamba yimbidi ya sikete sa sinene so phatima, so dhundeka kufana ni nzalama.

²⁸ Se ni to khani kwawe: Anu mi misawulwa ya Mkoma, ni mikamba yiya yi sawulekile, kumweko ni silivhela yiya ni nzalama yiya, sa kuningelwa ngu kutilava ka Mkoma, Txizimu txa vatate vanu.

²⁹ Se si woneleleni, ni ku si xayisa, an'ze mi txi ya si pimela masoni ka vahombe va vaphaxeli, ni va Valevhi, ni va misungo ka vatate va ka Israyeli, kona Jerusalema, sibhiyani ka Nyumba ya Mkoma.

³⁰ Sekoko vaphaxeli ni Valevhi va to amukela kunemela ka silivhela ni ka nzalama, ni ka mikamba, va txi si wuyisa Jerusalema, Nyumbani ka Txizimu txathu.

Kutshumela veya Jerusalema

³¹ Se hi to khukha mnamboni ka Ahavha, ngu ditshiku da digumi ni mambidi ka mtxima wo khata, hi tsula Jerusalema; dianza da dinene da Txizimu txathu di ti txitimwi kwathu, di hi hulukisa manzani ka valala vathu, ni vale va nga ti hi riyela milawu tinzilani.

³² Se hi tile Jerusalema, hi ta humula kona, masiku mararu.

³³ Se ngu ditshiku da mune, ku to pimwa silivhela, ni nzalama, ni mikamba, Nyumbani ka Txizimu txathu, ngu dianza da Meremote, mwanana wa mphaxeli Uriya; a ti ti ni Eleyazari mwana Fineya, kumweko ni Jozabhadhi mwana Jesuwa, ni Nowadhiya mwana Bhinuyi, va ka Levhi;

³⁴ Madingano ni mtengo ni kunemela ka sotshe sile; se sotshe si to pimelwa ngu mbimo yimweyo.

³⁵ Sekoko avale va nga wuyiswa ngu wukhumbini va ningete miphaxo yo hiswa ka Txizimu txa ka Israyeli: Digumi da marole ni mambidi, ngu mhaka ya votshe va ka Israyeli, mtxhanu wa magumi ni mune a tihambana ni mtxhanu ni yimweyo, mtxhanu wa magumi ni mambidi a tinvuta, ni digumi da vamabhongwe kota mningelo ngu mhaka ya txionho; sotshe si txi hiselwa Mkoma.

³⁶ Sekoko txileleto txa mfumeli txi to gelwa vaxayisi va wukoma, ni ka vafumeli va mtxhatuko ka mnambo; va to vhuna vathu ni Nyumba ya Txizimu.