Ezra 5 - Bhiblia Yo Sawuleka

¹ Se mprofeti Hagayi, ni Zakariya, mwanana wa Idho, va to profeta ka Vajudha vale va nga ti ti zumba Judha, ni Jerusalema; ve profetela ngu ditina da Txizimu txa Israyeli.

² Sekoko ku to khukha Zorobhabheli mwana Salatiyeli, ni Jesuwa, mwana Jozadhake, ve khata kuaka Nyumba ya Txizimu, txi txi zumbako Jerusalema; va ti ti vhunwa ngu vaprofeti va Txizimu.

³ Ka yona yile mbimo a tile kwawe Tatenayi, mfumeli wa mtxhatuko ka mnambo, ni Setari-Bhozenayi, ni vangana vakwe va txi ta kha vona: I mani a nga mi ruma kuaka nyumba yiya, ni kuwusa diguma kani?

⁴ Sekoko hi lava kuziva tiya: Se mbamani matina a vavamna vava va nga aka nyumba yiya kani?

⁵ Ngako maso a Txizimu ma nga ti ti txitimwi ka madhota a Vajudha, kha va nga va tsimba, kala kuza mhaka yi hoka ka Dhariyo, sekoko mhakeyo va to xamula ngu dipasi.

⁶ Dipapilo da Tatenayi mfumeli wa mtxhatuko ka mnambo, ni Setari-Bhozenayi, ni vangana vawe, Vafarsaki, va nga ti ti mtxhatuko ka mnambo, va to di heleketa ka mfumeli Dhariyo.

⁷ Va to mrumela matina, na ku ti bhatwe taku: Ku naveho kotshe kuthutha ka mfumeli Dhario.

⁸ Ti na zivaneke ka mfumeli taku athu hi tsute ka ditiko da ka Judha, ka Nyumba ya Txizimu txa hombe, yi akwako ngu marigwi a hombe, se ka vekwetelwa mapulango txitimwi ka maseta; se mthumo wa kuluvetiswa ngu manza awe.

⁹ Sekoko hi to wotisa madhota ku khathu: I mani a nga mi ruma kuaka nyumba yiya, ni kuwusa diguma diya kani?

¹⁰ Hahanze ka tiya, hi wotisile matina awe, kuva hi ta kugeletela, ni kubhaletela matina a vale i ku vathangeli hagari kwawe.

¹¹ Vona va hi xamute va txi kha vona: Athu hi sithumi sa Txizimu txa nzuma ni mafu, ho aketa nyumba yi yi nga akwa kale ka malembe; nguko mfumeli wokari wa hombe wa ka Israyeli a yi akile e heta.

¹² Aniko msana kakule vatate vathu va nga wusela txiviti Txizimu txa nzuma, txi to va ningela manzani ka Nebhukodhonosori, mfumeli wa Bhabhilona, Mkaldheya, awule a nga khundumusa nyumba yiya, vathu va kona e va tsulisa Bhabhilona.

¹³ Ngu konaho, dilembe do khata da Siro mfumeli wa Bhabhilona, mfumeli Siro a rumile ti to Nyumba yiya ya Txizimu yi akwa.

¹⁴ Hambi siya sa nzalama ni sa silivhela sa Nyumbani ka Txizimu, Nabhukodhonozori a nga teka ka dithepele di di nga ti tiho Jerusalema, e si wuleta ka dithepele da Bhabhilona, mfumeli Siro asi thavisile dithepeleni ka Bhabhilona, si ningelwa ka wamwamna wule ditina dakwe i ku Sesbhazari, e m'veka kuva mfumeli.

¹⁵ A to khene kwakwe: Teka siya si u tsula naso ka dithepele di di kuho Jerusalema, u ya akisa Nyumba ya Txizimu, kha wukhalo wa yona.

¹⁶ Sekoko a to bwaka Sesibhazari e ta maha makhato a Nyumba ya Txizimu, txi zumbako Jerusalema; se kukhukhela ka koneho kala kuwa, ya akwa, kambe kha yi se guma.

¹⁷ Konkuwa, ti txi woneka kha kwati ka mfumeli, ku na xolwe ka tithomba ta mfumeli, atile ti ku Bhabhilona, ngako i ti ditshuri kuruma ka mfumeli wa Siro, kasi kuaka yiya Nyumba ya Txizimu kona Jerusalema; se ka mhakeyo, mfumeli a na hi zivise kuranda kwakwe.