Esteri 7 - Bhiblia Yo Sawuleka

Kudawa ka Hamani

¹ A di tile koko mfumeli ni Hamani kasi ku ta sela kumweko ni msikati wa mfumeli Esteri,

² ngu ditshiku da wumbidi da m'buso wa vhinya, mfumeli a to khene ka Esteri: Ngu txihi txikombelo txako awe Esteri kani? Se u na ningwa. Ni ku ngu kuhi kuvilela kwako kani? Hambi hafu ya mfumo u na ningwa.

³ Sekoko msikati wa mfumeli Esteri a to xamula, a txi khene: Ngako awe mfumeli ni di mani dithomo masoni kwako, ni kungako ti txi woneka i di ta tinene ka mfumeli, ni na ningwe wutomi wangu nga ha ni kombelako, ni wutomi wa va ka kwathu, madinano ni kuvilela kwangu.

⁴ Nguko hi xavisilwe, ani ni va ka kwathu, kasi kuve hi lovisa, ve hi dayela ni ku hi maha hi luzekelwa; I ti ku va to hi xavisa kasi ku hive tikhumbi ta txiwamna ni ta txisikati, ni di na malala, hambi ku mxanisi a no tandeka kutshumetela kuluzekelwa ka mfumeli.

⁵ Sekoko mfumeli Asuwero a to womba, a txi khene ka msikati wakwe Esteri: I mani eneyo kani? Niku ahani eneyo wa mbilu yo mkujetela kumaha eto, kani?

⁶ Se Esteri a to khene: M'thu, mxanisi ni mlala ngene m'bihi wuwa Hamani! Sekoko Hamani a to dhuka masoni ka mfumeli ni ka msikati wa mfumeli.

⁷ Se mfumeli, a to khukha m'busoni ka hombe ka vhinya a di henyile eya thembweni ka nyumba ya wukoma; se Hamani a to khukha a txi ema, e khongotela msikati wa mfumeli Esteri ti to e hulukisa wutomi wakwe; nguko a ti woni ti to mfumeli a lava ku mmahela to biha.

⁸ A di khukhile koko mfumeli ngu thembweni ka nyumba ya wukoma e wuya nyumbani ka m'buso wa hombe wa vhinya, Hamani a ti ti khizamile ewa ngu khohe hahatshi ka txikhalo txile Esteri a nga ti ka txona. Sekoko mfumeli a to khene: Ina a lavile kukurumeta msikati wa mfumeli masoni kwangu, nyumbani muwa kani? Ngako di ti humile dipswido ngu txitsofuni ka mfumeli, va to fenengeta khohe ya Hamani.

⁹ Sekoko Haribhona, mmweyo wa mithenwa yile yi nga ti thumela mfumeli, a to khene: Wonani, phande ya mtxhanu wa magumi a mikono ya kulapha, yile Hamani a nga ti ti yi kelelete Moridhekayi, yile a nga zivisa mfumeli, yi hafuhi ka m'ti wa Hamani. Sekoko mfumeli a to khene: Mtxikiteni ka yona ene Hamani.

¹⁰ Hamani koko va to mtxikita ka phande yile ene a nga ti yi longisete Mordhekayi. Sekoko kuhenya ka mfumeli ku to boxa.