Esteri 5 - Bhiblia Yo Sawuleka

Esteri e ramba mfumeli ni Hamani ka m'buso wa hombe

¹ Ku to maheka koko tito, ka ditshiku da wuraru, Esteri e ambala syambalo sakwe sa wufumeli, se eya ema mndani ka muhubhe wa nyumbani ka mfumeli, ngu masoni ka nyumba ya mfumeli; kambe mfumeli a ti ti khalahatshile ha txikhaloni txakwe txa wukoma, nyumbani ka wukoma, masoni ka txike txa nyumba.

² Se ku to maheka taku, mfumeli a di woni msikati wakwe Esteri, a di emile mu ka muhubhe, wamsikati a to mana dithomo masoni ka mfumeli; kambe mfumeli a to xungameta Esteri ngu ndonga ya nzalama, a ngadi nayo manzani kwakwe, se Esteri a to tshuketa eya gwesa tshoka ya ndonga.

³ Sekoko mfumeli a to khene kwakwe: Njintxani u ku natxo awe msikati wangu Esteri, niku mwendo njikombelo muni u ku natxo kani? Hambi hafu ya mfumo ni na kuninga.

⁴ Se Esteri a to khene: Ngako ti txi woneka i di tinene ka mfumeli, a nate mfumeli ni Hamani nyamsi ka m'buso wule ni nga lulamisela mfumeli.

⁵ Sekoko mfumeli a to khene: Kuluvetani mi dhana Hamani, ti to e maha ti Esteri a nga ruma tona. A di tile koko mfumeli ni Hamani ka m'buso wule Esteri a nga ti ti wu lulamisete,

⁶ mfumeli a to khene ka Esteri, m'busoni ka vhinya: Ngu txihi txikombelo txako kani? Se ni na kuninga. Ngu kuhi kuvilela kwako kani? Ni na kuninga, hambi i di hafu ya mfumo.

⁷ Sekoko Esteri a to xamula, a txi khene: Txikombelo txangu ni kuvilela kwangu ngu siya:

⁸ Ngako ni di mani dithomo masoni ka mfumeli, ni kungako mfumeli a txi ti wona kha kwati ku ni xamula txikombelo txangu ni kuvilela kwangu, a nate mfumeli ni Hamani ka m'buso wa hombe, awu ni no mi lulamisela, se mangwana ni na maha madingano ni kuruma ka mfumeli.

Txikungo txa Hamani txo wukela Mordhekayi

⁹ Sekoko ka ditshiku dile Hamani a to huma a di tsakile kambe a di ni mtamo; kambe mbimo yile Hamani a nga wona Mordhekayi ha txikeni ka mfumeli, na asi khukhi hambi ku ti zinginisa masoni kwakwe, sekoko Hamani a to tala ngu kuhenyela Mordhekayi.

¹⁰ Kambe Hamani a to ti ñola, e tsula m'tini kwakwe; se a to rumisa kuya dhana vangana vakwe, ni msikati wakwe Zeresi.

¹¹ Se Hamani a to va xawutela wudhumo wa tithomba takwe, ni kutala ka vanana vakwe, ni totshe tile mfumeli a ngadi mkulisile ka tona, ni tile a nga ti m'guletisile tona txitimwi ka vathangeli, ni ka sithumi sa mfumeli.

¹² A to khene kambe Hamani: Msikati wa mfumeli ene Esteri ni ka kudotho kha ramba mmwani m'thu kuta ni mfumeli ka m'buso wule a nga ti wu lulamisete, hahanze kwangu; ni mangwana kambe, ni rambilwe ngu ngene kumweko ni mfumeli.

¹³ Kambe totshe eto kha ti ni tsakisi, ngako ni txi wona Mujudha wule Mordhekayi a di khalahatshile ha txikeni ka mfumeli.

¹⁴ Sekoko msikati wakwe Zeresi ni votshe vangana vakwe va to kha vona kwakwe: Ku na kelelwe phande ya kulapha ka mtxhanu wa magumi a mikono, se mangwana na gela mfumeli taku Mordhekayi e txikitwa ka yona, sekoko u wulela u di tsakile ni mfumeli ka m'buso wa hombe. Se txikungo etxo txi wonekile i di txatxinene ka Hamani, a to rumisa ti to yi kelelwa phande.