Esteri 3 - Bhiblia Yo Sawuleka

Hamani a maha txikungo txo lava kuheta Vajudha

¹ Msana keto, timhaka, mfumeli Asuwero a to kulisa Hamani, mwana Hamedhata, muagagi, se e m'guleta; e m'veka ka wukhalo txitimwi ka votshe vathangeli vale a nga ti navo.

² Se sotshe sithumi sa mfumeli, sile si nga ti ha txikeni ka mfumeli, si ti nama si khizama masoni ka Hamani; nguko a ti wombisile toneto mfumeli ngu Hamani; kambe Mordhekayi asi nami hambi kukhizama.

³ Sekoko sithumi sa mfumeli, sile si nga ti ha txikeni ka mfumeli, si to kha sona ka Mordhekayi: Ngu kutxani u ndaka mlayo wa mfumeli kani?

⁴ Se ku to maheka koko taku, va di m'gete toneto, ditshiku ni ditshiku, kambe ene asi va engisi, va to ya zivisa Hamani, kasi kuwona ti to mwendo Mordhekayi a na tsanisa mapswi akwe, nguko a ti ti va gete ti to ene Mujudha.

⁵ Ngako Hamani a di woni koko ti to Mordhekayi kha nami, kambe kha mkhizami masoni kwakwe, Hamani a to tala ngu kuhenya.

⁶ Kambe Hamani a to wona ti to kha ti na mbi vhuna txilo kudaya Mordhekayi ekha (nguko va ti ti mkombile vathu va Mordhekayi); Hamani koko a to lava kuhoxota votshe Vajudha, vale va nga ti ti ho ka wotshe mfumo wa Asuwero, maxaka a Mordhekayi.

⁷ Ngu mtxima wo khata (i ku mtxima wa Nisani), ka dilembe da wugumi ni mambidi da mfumeli Asuwero, va to xaxuva Puri, i ku xolo, masoni ka Hamani, ditshiku ni ditshiku ka mtxima ni mtxima, kala ka mtxima wa wugumi ni yimbidi, i ku mtxima wa Adhari.

⁸ Se Hamani a to khene ka mfumeli Asuwero: Ku ni vathu va nga hangalaka, ve abanela ngu matiko otshe a hombe, a mfumo wako, vathu vava milayo yawe yi hambanako ni milayo ya votshe vathu, va si londetiko milayo ya mfumeli; ngu kumaha keto, kha ti vhuni txilo ku mfumeli e va leka ve zumba.

⁹ Ngako ti txi woneka kha kwati ka mfumeli, ku na bhalwe ti to va na dawe; se ani ni na ningela 10.000 wa titalenta ta silivhela, manzani ka vale va no maha mthumo, kasi kuveta ti veka amu ka tithomba ta mfumeli.

¹⁰ Sekoko mfumeli a to thavisa phera ya manzani kwakwe e ninga Hamani, mwana Hamedhata, muagagi, mlala wa Vajudha.

¹¹ Se mfumeli a txi khene ka Hamani: Ni kuninga silivhela yiya ni vathu vava, kasi ku u maha ngu vona, ati ti tsakisako masoni kwako.

¹² Sekoko vamabhalani va mfumeli va to dhanwa ngu mtxima wo khata, ka ditshiku da digumi ni mararu, se ve ta bhala madingano ni totshe tile Hamani a nga ruma tona ka vathangeli va mfumeli, ni ka vathangeli va matiko a hombe, ni ka vathangeli va vathu ni vathu; se ditiko dimwani ni dimwani da hombe madingano ni mabhalelo a dona, ni ka vathu ni vathu madingano ni lidimi lawe; ti to bhalwa ngu ditina da mfumeli Asuwero, ti tsaniswa ngu phera ya mfumeli.

¹³ Se mapapilo me rumelwa ngu dianza da sirumwa ka otshe matiko a mfumeli, kasi kuxasela ni kudayela votshe Vajudha, kukhukhela ka mfana kala ka txikosana, vanana ni vavasikati ngu ditshiku dimwedo, da digumi ni mararu ka mtxima wa wugumi ni yimbidi (i ku mtxima wa Adhari), ve handa ni tithomba ta kona.

¹⁴ Se dipapilo dimwedo di nga bhalwa, kasi kuzivisa mlayo wule ka ditiko dimwani ni dimwani da hombe, di to rumelwa ka votshe vathu, kasi kuve maneka va di ti lulamisete ka ditshiku dile.

¹⁵ Ngu kuleleta ka mfumeli, sirumwa koko si to huma ngu kututuma, se mlayo wu huwelelwa mkhokholani ka Susani; se mfumeli kumweko ni Hamani va to khalahatsha ve sela; kambe didhoropa da Susani di to tala ngu pfilu-pfilu.