Eksodha 39 - Bhiblia Yo Sawuleka

Syambalo sa vaphaxeli

¹ Ngu nguwo ya mxowo wa mkuxe, mxowo wa txiwunguwungu, wo bhilivila, kumahilwe syambalo so sawuleka, asi si fanelako kuambalwa ka mbimo ya mthumo wo sawuleka ni syambalo so katekiswa sa mphaxeli Aroni nga ti Mkoma a nga leletelisa tona ka Mosi.

Txyambalo txa wuphaxeli

² Kumahilwe efodhe ngu nzalama, ni nguwo ya mkungu, ya txiwunguwungu ni yo bhilivila, ni linyu ya lisima yo lukelwa.

³ Nzalama yi to tshulwa yi txi maha tibhande to hehuka, ti bhandiselwa ti txi songa, kasi kukoteka kulukwa ka nguwo yo hehuka ya mkungu, ya txiwunguwungu ni yo bhilivila, ni ka linyu ya lisima, ku txi rungelwa ngu kutshuriselwa ka wutxhari.

⁴ Ku to mahwa singuwana simbidi sa efodhe asi si nga mananiswa si txi vekwa hamakata, asi yi tshanganiswako ngu sona magwito ka yona.

⁵ Se ni libhande li yi nga ti sungwa ngu lona efodhe, ngu txitimwi i ti la lixaka limwelo nayo, i ti lo lukelwa nayo ngu nzalama, la mxowo wa mkungu, mxowo wa txiwunguwungu, wo bhilivila, ni mxowo wa linyu ya lisima yo lukelwa, nga tonti Mkoma a nga leletelisa tona ka Mosi.

⁶ Ku lulamisilwe marigwi a onekisi, me nameketwa sitsaniso sa nzalama, ma txi bhalwa ngu kukenyelwa nga txixambanyo, me bhalwa matina a vanana va ka Israyeli.

⁷ Ma to vekwa txitimwi ka makata a efodhe, kasiku me maha marigwi a txialakanyiso ka vanana va ka Israyeli, nga tonti Mkoma a nga leletelisa tona ka Mosi.

Nguwo ya hakhana

⁸ Kumahilwe txinguwana txa hakhana, mthumo wo tshuriselwa nga efodhe, ngu nzalama, mxowo wa mkungu, mxowo wa txiwunguwungu, mxowo wo bhilivila, ni linyu yo lukelwa ngu kutshuriselwa.

⁹ I ti txa mune wa madhawa o dingana, kambe txi ti mahilwe txi txi petwa; i ti txa mpimo wa dianza dimwedo kulapha ka txona, ni dimwani kuanama, ngako txi di petilwe.

¹⁰ Ku nameketilwe mune wa titxhatxha ta marigwi. Ka litxhatxha lo khata, ku vekilwe dirigwi da rubhi, dimwedo da topazi, dimwedo da karibhukuli;

¹¹ ka litxhatxha la wumbidi, ku vekilwe dirigwi da esmeralidha, da safira, da dhayimana;

¹² ka litxhatxha la wuraru i ti marigwi a jasinto, a agata, a ametista;

¹³ ka litxhatxha la wumune, i ti marigwi a krisolite, a onekisi, ni a jaspe. Ma ti hariketilwe ngu sihariketo sa nzalama.

¹⁴ Marigwi ma mahilwe ngu kulondetelana ka matina a vanana va ka Israyeli, dimwani ni dimwani di ti bhatwe ditina da lixaka limwelo, na ma di bhatwe ngu kukenyelwa, nga ti ku bhaliswako tona ngu txixambanyo, ma txi dingana digumi da tihunzu ni timbidi.

¹⁵ Kumahilwe kambe, ka txinguwana txa hakhana, tiketani to lukelwa nga tingoti, ta nzalama ya yinene.

¹⁶ Kumahilwe kambe sihariketo simbidi sa nzalama ni masinda mambidi a nzalama, otshe masinda a mambidi ma vekilwe ka titshoka ta timbidi ta txinguwana txa hakhana.

¹⁷ Ku to wuletiswa tiketani ta timbidi ta nzalama amu ka masinda mambidi ngu titshokani ka kumbidi ka txinguwana txa hakhana.

¹⁸ Ku to khweketwa titshoka ta timbidi ta tiketani aha ka sihariketo, ti txi sungwa aha ka makata a mambidi a efodhe ngu didhawa da kona da masoni.

¹⁹ Kumahilwe kambe masinda mambidi a nzalama, ve ma veka aha ka titshoka timbidi ta txinguwana txa hakhana, ngu magwito ka kona, ka hafuhi ni efodhe ngu didhawa da mndani.

²⁰ Kumahilwe kambe masinda mambidi a nzalama, aawa ma nga vekwa madhawani ka kumbidi ka makata a efodhe, aha ka didhawa da hahatshi ngu masoni ka kona, hafuhi ni hale ko mananiswa ngu kona, ngu txitimwi ka libhande la efodhe.

²¹ Ku to sungwa txinguwana txa hakhana ngu masinda a txona ka masinda a efodhe ngu lingoti lo hehuka la mxowo wa mkuxe, kasi kutsanisa txinguwana txa hakhana ngu libhande la efodhe, ti to txi si pshwitimuki, madingano ni ti Mkoma a nga leletelisa tona ka Mosi.

Simwani syambalo sa vaphaxeli

²² Ngu msana kumahilwe nguwo ya hombe ya efodhe. Yona yotshe yi ti lukilwe ngu titxhinda ta mkungu.

²³ Se nguwo yiya ya hombe yi ti vekilwe ditshoko hagari ka yona, do nga ditshoko da txikatawu txa txikete. Ditshoko di ti rendeleketwe ngu mrungo wa fita, kasi yi si vharuki.

²⁴ Ngu hahatshi ka nguwo yiya ya hombe ku to rungelwa maromani ngu titxhinda ta mxowo wa mkuxe, ni ta mxowo wa txiwunguwungu ni ta mxowo wo bhilivila ni titxhinda ta linyu yo tshura yo lukelwa,

²⁵ ku rungetwe kambe sisimbzana sa nzalama ya yinene ngu hagari ka maromani, hahatshi ka nguwo ngu kurendelekela kotshe,

²⁶ txisimbzana ni diromani ngu kurendelekela ka didhawa da hahatshi da nguwo ya hombe, ayi yi nga ti ambalwa ka mbimo ya mthumo wa wukhongeli, nga ti Mkoma a nga leletelisa tona ka Mosi.

²⁷ Kumahilwe kambe, syambalo ngu linyu ya yinene, sa Aroni ni vanana vakwe,

²⁸ txigoko txa linyu ya lisima, sigoko so ambalwa ka mbimo ya wukhongeli ni sibhulukwana sa linyu,

²⁹ libhande lo mahwa ngu linyu ya lisima, lo lukwa ngu kutshuriselwa, nga tonti Mkoma a nga leletelisa tona ka Mosi.

³⁰ Ngu msana kumahilwe txiluva txa nzalama, ka yona kubhatwe ngu kukenyelwa, nga ti va bhalisako tona aha ka phera, va txi kha vona: Kusawule ka masoni Mkoma.

³¹ Se va to hariketa ngoti ya mkuxe, ve sunga txitmwi ka mitra, nga ti Mkoma a nga leletisa tona ka Mosi.

Magwito ka mthumo

³² Ngu toneto, mthumo wotshe wa kuaka ditenda do sawuleka ni ditenda da msengeletano wu to hoka magwito. Vanana va ka Israyeli va mahile totshe nga tonti Mkoma a nga leletelisa tona ka Mosi.

³³ Va to tisa ka Mosi ditenda do sawuleka; ditenda da mengeletano ni sotshe simaha sa kona i ku siya: Sihariketo, mapulango, timbalelo, tiphande ni siparako;

³⁴ sitshulelo sa madhowo a tihamba, so pendwa ngu penda yo bhilivila, sitshulelo sa madhowo o txhukwa ni m'jiyo wa nguwo ya txivhikelo;

³⁵ dibhokiso da txitumelelano ni mipakato ya kona, ni txikhalo txa kona txa wuxinji;

³⁶ meza ni sotshe simaha sa kona ni mapawu a mphaxo;

³⁷ phande ya nzalama ya yinene ya malambu, ni totshe tiphande ta malambu ti nga lulamiselwa, sotshe simaha sa kona, ni mtona wa malambu;

³⁸ txiluvelo txa nzalama, mafura o tola ni dibaselo do bhumula; nguwo ya m'jiyo wa ha txikeni ka ditenda;

³⁹ ni txiluvelo txa koporo, ni txibawulelo txa koporo, mipakato, ni sotshe simaha sa kona, mkamba ni txipande;

⁴⁰ m'jiyo wa diguma, tiphande ni siparako sa kona, ni sotshe simaha sa mthumo wa nyumba yo sawuleka, sa ditenda da msengeletano;

⁴¹ syambalo sa wukhongeli asi si ambalwako ka mbimo ya mthumo wo sawuleka, syambalo so sawuleka sa Aroni mphaxeli, ni syambalo sa vanana vakwe sa mthumo wa wuphaxeli.

⁴² Vanana va ka Israyeli va mahile yotshe mithumo, ngu kulondeta totshe ti Mkoma a nga ti leleta ka Mosi

⁴³ Mosi a to xolisisa wotshe mthumo, e wona ti to wu mahilwe ngu kulondeta totshe ti Mkoma a nga leleta tona; sekoko Mosi a to va katekisa.