Eksodha 38 - Bhiblia Yo Sawuleka

Txiluvelo txa miphaxo ya kuhiswa

¹ Se a to maha txiluvelo txa mphaxo wo hiswa ngu mapulango a mndonga wa setime, txa mtxhanu wa mikono ya kulapha, ni yimwani mtxhanu wa mikono ya kuanama, i ti txa mune wa madhawa o fana, kambe txi ti ti ni mikono yiraru ya kudemba.

² Ka makhona a mune a mahile titxheho; ti nga ti patani ni txiluvelo; se e bhama ngu koporo.

³ A to maha sotshe simaha sa txiluvelo, simaha so theletela dikhuma, mafoxola, mikamba ni so thavisa makala ngu sona; sotshe simaha siya i ti so mahwa ngu koporo.

⁴ A to maha txihiselo txa koporo aha ka txiluvelo, txo nga finiselo, a txi veka ngu hahatshi ka tinzeve ta txiluvelo, kukhukhela hahatshi kala ka hafu ya kudemba ka txiluvelo.

⁵ A to nyivilikisa mune wa masinda ma txi bethelwa ka mune wa titshoka ta txiluvelo txa koporo, kasi kumaha o amukela mipakato.

⁶ A to maha mipakato ya mapulango a setime, a txi yi bhama ngu koporo.

⁷ A to wuleta mipakato amu ka masinda, ka didhawa dimwani ni dimwani ka txiluvelo, kasi kurwala ngu yona. Txiluvelo i ti txa diphanga ngu mndani.

Mkamba wa koporo

⁸ A to maha mkamba wa koporo, ni txipande txa kona txa koporo, ngu sibuko sa vavasikati vale va nga ti thuma ha txikeni ka ditenda da msengeletano.

Diguma da Ditenda Masoni ka Txizimu

⁹ A to maha diguma ngu didhawa da wulambwe, mijiyo ya kona ya diguma i ti ti ya linyu yo hehuka yo somborotelwa ya dizana wa mikono.

¹⁰ Tiphande ta kona ta magumi mambidi ni siparako, sa kona sa magumi mambidi i ti sa koporo, sihariketo sa tiphande ni siparako sa kona i ti sa silivhela.

¹¹ Ka didhawa da mswa-ditambo, ku ti ti ni mijiyo ya mtxhanu wa magumi a mikono; ti ni mijiyo ya dizana wa mikono; tiphande ta kona ta magumi mambidi ni siparako sa kona sa magumi mambidi i ti sa koporo, sihariketo sa tiphande ni timbalelo ta kona i ti sa silivhela.

¹² Ka didhawa da mswa-ditambo, ku ti ti ni tinguwo ta magumi mambidi a mametru ni mtxhanu, ni tiphande ta digumi ni siparako sa digumi. Sihariketo ni tiphande ni timbalelo ta kona i ti sa silivhela.

¹³ Ka didhawa da wutxani mijiyo i ti ti ya mtxhanu wa magumi.

¹⁴ Mijiyo ya kona ya ha txikeni, i ti ti ya digumi da mikono ni mtxhanu; ni tiphande ta kona ta tiraru, ni siparako sa kona sa siraru.

¹⁵ Ka dimwani didhawa da txike txa diguma, ka otshe madhawa a mambidi, i ti ti mijiyo ya digumi da mikono ni mtxhanu; ni tiphande ta kona ta tiraru, ni siparako sa kona sa siraru.

¹⁶ Yotshe mijiyo yi nga ranganyeta diguma, i ti ti ya linyu yo hehuka yo somborotelwa.

¹⁷ Siparako sa tiphande i ti sa koporo, sihariketo sa tiphande ni timbalelo ta kona, si di bhamilwe ngu silivhela. Sifenengeto sa misungo ya kona i ti sa silivhela. Totshe tiphande ta digumi ti ti tshanganisilwe ngu timbalelo ta silivhela.

¹⁸ Se m'jiyo wa txike txa diguma i ti ti wo mahwa ngu mluki, wa nguwo ya mkuxe, yo txiwunguwungu, yo bhilivila, ya linyu yo hehuka yo somborotelwa; kulapha ka kona i ti ti ka magumi mambidi a mikono, ni kudema, ka kuanama ka mtxhanu wa mikono. Masoni ka mijiyo ya diguma.

¹⁹ Ku ti ti ni mune wa tiphande, ni mune wa siparako so mahwa ngu koporo, sihariketo i ti sa silivhela, ni sifenengeto sa misungo ya kona ni timbalelo ta kona i ti sa kubhamwa ngu silivhela.

²⁰ Otshe masinda a kona a ditenda do sawuleka ni diguma da kona, i ti sa koporo.

Sikete si si nga thumiswa ka Ditenda Masoni ka Txizimu

²¹ Ngu yiya txhatxhameto ya simaha sa kuaka ngu sona, asile si nga thumiswa ha kuakani ka ditenda do sawuleka, i ku nyumba ya wufakazi, ayi yi nga akwa ngu va ka Levhi, ngu kuleletelwa ngu Mosi, na va txi thangelwa ngu Itamari, mwanana wa mphaxeli Aroni.

²² Bhezaleli, mwana Uri, mwana Huri, wa lihunzu la ka Judha, a mahile totshe ati Mkoma a nga leleta Mosi.

²³ Ene a txi vhunwa ngu Oholiyabhe, mwana Ayizamake, wa lihunzu la ka Dhani, wo txhariha amu ka mavato, ni kutshurisa, ni ku rungela nguwo ya mxowo wa mkungu, ni wa txiwunguwungu, ni wo bhilivila ni linyu yo tshura yo lukwa.

²⁴ Mtengo wotshe wa nzalama ayi yi nga thumiswa ha ku akani ka nyumba yo sawuleka, nzalama yi yi nga maneka ngu msengo, i ti ya magumi mambidi ni mtxhanu ni mune wa titalenta, ni 730 wa maxekele, madingano ni mpimo wa dixekele da nyumba yo sawuleka.

²⁵ Silivhela yi yi nga maneka hagari ka vathu va msengeletano, avale va nga bhalelwa, i ti ti ya titalenta ta dizana, ni 1.775 wa maxekele, madingano ni mpimo wa dixekele da nyumba yo sawuleka.

²⁶ M'thu mmwani ni mmwani a to humisa hafu ya dixekele madingano ni mpimo wa dixekele da nyumba yo sawuleka. Votshe va va nga balwa va to sengisa toneto, kukhukhela ka va va tanga ya magumi mambidi a malembe ni kuya masoni. Mtengo wawe i ti 603.550 wa vavamna.

²⁷ Se titalenta ta dizana ta silivhela, ti to nyivilikiswa, kasi kumaha siparako sa nyumba yo sawuleka, ni makhato a m'jiyo; siparako sa dizana si dingana titalenta ta dizana, mwendo, talenta yimweyo ngu txiparako tximwetxo,

²⁸ ngu maxekele awa ma nga sala a 1.775, va to maha ngu ona sihariketo sa tiphande ni sifenengeto sa kona ni timbalelo ti ti tshanganisako tiphande ta kona.

²⁹ Se koporo ya mningelo yi tshanganisile mtxhanu wa magumi ni mambidi a titalenta, ni 2.400 wa maxekele.

³⁰ Ngu koporo kumahilwe mitshunzuti ya txike txa ditenda da msengeletano, txiluvelo txa koporo ni simaha sotshe sa txiluvelo,

³¹ ni makhato a diguma ngu madhawani, ni makhato a ditimba da diguma, ni totshe tiphande ta nyumba yo sawuleka, ni totshe tiphande da diguma ngu madhawani.