Eksodha 36 - Bhiblia Yo Sawuleka

¹ Bhezaleli, Oholiyabhe, ni votshe vale va nga ningwa wutxhari ngu Mkoma, va txi va ni wuzivi ni mapimo, va to ta va ta maha mithumo yotshe ya mu nyumbani ko sawuleka, madingano ni sileleto si va nga ningwa ngu Mkoma.”

Miningelo ya vathu

² Mosi a to dhana Bhezaleli ni Oholiyabhe ni votshe vathu va wutxhari avale Mkoma a nga va ninga wuzivi, votshe avale timbilu tawe ti nga va ruma ti to ve ti ningetetela amu ko maha yotshe mithumo.

³ Vona va to amukela, ngu ka Mosi sotshe simaha sa miningelo, asi vanana va ka Israyeli va nga si tisa, kasi ku ta khata kumaha mthumo wa kuaka nyumba ya wukhongeli. Vanana va ka Israyeli va to simama ve tisa miningelo ditshiku ni ditshiku ni mixo, ngu kuranda kwawe.

⁴ Se votshe vavamna vale va nga txi maha mithumo ka wukhalo wo sawuleka, va to leka kuthuma,

⁵ ve tsula ka Mosi va txi ya kha vona: “Vathu va tisa simaha sasingi ngutu kupinda asi si lavekako kasi kumaha mthumo wu Mkoma a nga ruma ti to wu txi mahwa.”

⁶ Sekoko Mosi a to ruma kuhuwelela mthetho ha wugoveloni a txi khene: “Ni wammweyo wamwamna mwendo wamsikati, a nga swe a txi ningela simaha so aka ngu sona ditenda do sawuleka.” Ngu mhaka yeto, vathu va manekile va txi tsimbwa kutisa kambe simaha sa mningelo,

⁷ nguko simaha si si nga ti tshanganisilwe, i ti sasingi ngutu, so pinda asile si nga txi laveka aha ka mthumo wa kuaka.

Kuakwa ka Ditenda Masoni ka Txizimu

⁸ Ngu toneto, totshe titxhari hagari ka votshe avale va nga ti thuma ha kuakani, va to aka ditenda do sawuleka, ve maha mthumo wa lisima, ngu digumi da tinguwo ta linyu yo tshuriselwa, yi lukelwa nguwo ya mkungu, ni ya txiwunguwungu, ni yo bhilivila, ti di ni mifananiso ya makerubhima o rungelwa ngu kutshuriselwa.

⁹ Kulapha ka m'jiyo wumwani ni wumwani i ti ka magumi mambidi ni mtxhanu wa mikono ni yiraru, se kuanama ka wumwani m'jiyo i ti ka mune wa mikono; yotshe mijiyo i ti ya tipimo to fana.

¹⁰ Mtxhanu wa tinguwo toneto ti ti lunganyetilwe ti txi maha yimweyo, ni timwani ta mtxhanu ti txi maha yimwani.

¹¹ Kumahilwe sifundo sa ngoti ya mkungu, ngu tshokani ka m'jiyo wo gwitisa ka mtxawa wo khata; ngu tona eto kambe ni ka tshulu ya m'jiyo wo khata wa mtxawa wa wumbidi.

¹² Ku to mahwa mtxhanu wa magumi a sifundo, ka nguwo yo khata ni mtxhanu wa magumi ya sifundo ka nguwo ya magwito ka ti timwani to rungelwa, na txifundo ni txifundo txi zumba masoni ka txifundo tximwani ni tximwani.

¹³ Kumahilwe kambe mtxhanu wa magumi a sihariketo sa nzalama, aha ku nga tshanganiswa kona mijiyo ngu sihariketo wumwewo ni wumwani; se di mahisilwe eto ditenda do sawuleka.

¹⁴ Ngu msana, kumahilwe kambe mijiyo ya matoya a tiphongo kasi kumaha ditenda do fenengeta txitimwi ka ditenda do sawuleka, kumahilwe digumi da mijiyo ni wumwewo.

¹⁵ Kulapha ka m'jiyo wumwewo ni wumwani i ti ti ka magumi mararu a mikono, se kuanama ka m'jiyo wumwewo ni wumwani i ti ti ka mune wa mikono; mijiyo yiya ya digumi ni wumwewo i ti ti ya tipimo timweto.

¹⁶ Mtxhanu wa tinguwo ti patanisilwe ngu kurungelwa ka didhawa dimwedo, ni timwani ta mtxhanu ni yimweyo ka dimwani didhawa.

¹⁷ Ku vekilwe mtxhanu wa magumi a sifundo ngu magwito ka nguwo yo gwitisa ya tile ti nga pataniswa ngu kurungelwa, ni sifundo sa mtxhanu wa magumi, ngu magwito ka nguwo yo gwitisa ka timwani tinguwo to pataniswa ngu kurungelwa.

¹⁸ Kumahilwe kambe mtxhanu wa magumi a sihariketo sa koporo kasi kumananisa tinguwo, ati to ku txi va i di tximaha tximwetxo.

¹⁹ Kutshuletwe ditenda do sawuleka ngu madhowo a tiphongo o pendwa ngu penda yo bhilivila, ahale txitimwi ka kona ku nga tshulelwa kambe ngu madhowo o hehuka.

²⁰ Mapulango a ditenda do sawuleka ma mahilwe ngu mndonga wa setime, aale ma nga vekwa ngu kuemiswa.

²¹ Dipulango dimwani ni dimwani di ti ni kulapha ka digumi da mikono, ni kuanama ka mkono wumwewo ni hafu.

²² Ka dipulango dimwani ni dimwani ku ti ni tiphingwi timbidi to mananisa ngu tona. Kumahilwe toneto ka mapulango otshe a ditenda do sawuleka.

²³ Ka didhawa da wulambwe kumahilwe mapulango a makumambidi.

²⁴ Ngu hahatshi ka mapulango awa a magumi mambidi ku vekilwe siparako sa mune wa magumi sa silivhela; siparako simbidi hahatshi ka dipulango, ka titshoka timbidi to mananisa ngu tona.

²⁵ Ka didhawa da wumbidi da wuphemba da ditenda do sawuleka, kumahilwe mapulango a magumi mambidi

²⁶ ni siparako sa mune wa magumi sa silivhela, siparako simbidi ngu hahatshi ka dipulango ni dipulango.

²⁷ Ngu msana ka ditenda do sawuleka, ka didhawa da mswa-ditambo, kumahilwe mtxhanu wa mapulango ni dimwedo.

²⁸ Kumahilwe kambe mapulango mambidi a makhona ngu hahatshi ka ditenda do sawuleka;

²⁹ ma di patanile ka didhawa da hahatshi, ngu toneto ma ngadi zumbisile tona kala hagari ka txitimwi ka disinda do khata. Ngu toneto, ti nga maheka ngu mapulango mambidi ka makhona mambidi.

³⁰ Ku ti ti ho mapulango a mtxhanu ni mararu ni digumi da siparako ni mtxhanu ni tximwetxo sa silivhela, siparako simbidi ngu dipulango ni dipulango.

³¹ Kumahilwe mtxhanu wa timbalelo ta mndonga wa setime, ta mapulango a dimwani didhawa da ditenda do sawuleka,

³² mtxhanu wa timbalelo taa mapulango ka didhawa do khata da ditenda do sawuleka, ni mtxhanu wa timbalelo ta mapulango a hahatshi ka ditenda do sawuleka, ngu didhawa da mswa-ditambo.

³³ Mbalelo ya hagari yi ti ti pinda ngu hagari ka mapulango, kukhukhela magwito kala kumwani magwito.

³⁴ Kubhamilwe mapulango ngu nzalama, ni masinda a kona (makhalo a timbalelo) a ma mahile ngu nzalama; se timbalelo nitona a ti txhulete ngu nzalama.

³⁵ Kumahilwe m'jiyo wa mixowo ya mkungu, ni wa txiwunguwungu, ni wo bhilivila, ni wa linyu yo hehuka yo fefelwa, yi rungelwa sikombiso sa makerubhima.

³⁶ Kumahilwe ka wona mune wa tiphande ta mndonga wa setime, ve bhama ngu nzalama; sihariketo sa kona i ti sa nzalama, se ku txi vekwa ka ona mune wa siparako sa silivhela.

³⁷ Kasi kuvhala ha txikeni ka ditenda, kumahilwe m'jiyo ngu matoya a mkungu, a txiwunguwungu, o bhilivila, ni linyu yo tshura yo fefelwa, yi txi tshuriselwa ngu wutxhari.

³⁸ Ve maha tiphande ta kona ta mtxhanu, ni siparako sa kona; kubhamilwe misungo ya kona ni timbalelo ta kona ngu nzalama; siparako sa kona sa mtxhanu i ti sa koporo.