Eksodha 25 - Bhiblia Yo Sawuleka

Miningelo yoya Ditendani ko Sawuleka

¹ Sekoko Mkoma a to womba ka Mosi, a txi khene:

² “Gela vanana va ka Israyeli va txi tisa msengo. Ni na amukela msengo wa m'thu ni m'thu awu mbilu yakwe yi rumako ku ti maha.

³ Ngu wuwa msengo ni no amukela kwawe: Nzalama, silivhela ni koporo,

⁴ nguwo ya mkuxe ni yo bhilivila, nguwo yo bhilivila ngutu, ni yo hehuka ya disilika ni ya matoya a phongo,

⁵ madhowo a tinvuta o pendwa ngu penda yo bhilivila, didhowo do hehuka, ni mapulango a setime,

⁶ mtona wa malambu, singema sa mafura o tola ni a dibaselo do bhumula,

⁷ marigwi a onekisi ni mamwani marigwi kasi ku ta tsanisa efodhe ni nguwo ya hakhana.

⁸ Va na ni mahele nyumba yo sawuleka, kasiku ani ni sikota kuzumba hagari kwawe.

⁹ Mi na maha nyumba ni sotshe simaha sa kona nga ti ni no kukombisa ngu mfananiso wa kona.”

Dibhokiso da txitumelelano

¹⁰ Se mi na maha dibhokiso ngu mapulango a setime, aale ma ku ni kulapha ka mikono yimbidi ni hafu, ni kuanama ka mkono wumwewo ni hafu, ni kudemba ka mkono wumwewo ni hafu.

¹¹ Se u wu bhama ngu nzalama ya yinene mndani ni hahanze, txitimwi ka yona ka madhawa otshe u na maha ngu nzalama ya yinene, ngu kurendelekisa;

¹² se u na khanda mune wa masinda a nzalama, aale u no ma veka ka mune wa makhona; mambidi ka didhawa dimwedo ni mambidi ka dimwani didhawa.

¹³ U na maha kambe mipakato ya mndonga wa setime, u yi penda ngu nzalama.

¹⁴ U na wuletisa mipakato aha ka masinda a dibhokiso, kasiku wu txi gulwa ngu yona.

¹⁵ Mipakato yi na zumba amu ka masinda a dibhokiso, kha yi na mbi thaviswa ka wona.

¹⁶ Msana keto, u na veka Txifakaziso txi ni no kuninga aha ka dibhokiso.

¹⁷ U na maha kambe txikhalo txa wumbilu txa nzalama ya yinene, txa kulapha ka mikono yimbidi ni hafu, ni mkono wumwewo ni hafu kuanama ka txona,

¹⁸ u na maha makerubhima mambidi a nzalama yo surutetwa, magwito ka txikhalo txa wumbilu.

¹⁹ U na maha dikerubhima magwito ka didhawa dimwedo, ni dimwani dikerubhima magwito ka dimwani didhawa; ngu txiya tximwetxo dwe ni txikhalo txa wumbilu, u na maha makerubhima ka tikasa timbidi ta txikhalo.

²⁰ Makerubhima ma nava ni mabhapi o nawulukela txitimwi, aale ma no vhikela txikhalo txa wumbilu, ngu mabhapi a ona, ma di rendekelanile dimwani ni dimwani.

²¹ U na sanzeka txikhalo txa wumbilu txitimwi ka dibhokiso, ngu mndani ka dona u na veka Txixambanyo txi ni no kuninga.

²² Se konaho ni nata ni ta womba-womba ni nawe txitimwi ka txikhalo txa wumbilu, ngu hagari ka makerubhima mambidi (ma ku txitimwi ka dibhokiso da Txifakaziso), ka totshe ti ni no kuruma kugela vanana va ka Israyeli.”

Meza ya mapawu Masoni ka Txizimu

²³ Ngu msana ka kona u na aka meza ya mapulango a setime; ayile yi no va ni kulapha ka mikono yimbidi, kuanama ka mkono wumwewo, ni kudemba ka mkono wumwewo ni hafu.

²⁴ U na yi bhama ngu nzalama ya yinene, u txi yi bhama ngu kurendelekisa ngu nzalama ya yinene.

²⁵ U na vekela dipulango da kuanama ka dianza, di rendeleka ni meza u tshumela u yi ranganyeta ngu nzalama madhawani ka kona.

²⁶ U na yi mahela mune wa masinda a nzalama, aale u no ma veka amu ka mune wa makhona, aale ma mahwako ngu mune wa minenge ya meza.

²⁷ Hafuhi ka magwito ku nava ni masinda, aale ma no vekwa dimwani masoni ka dimwani, ahale ku no pinda ngu kona mipakato yo gula meza ngu yona.

²⁸ U na maha yona mipakatoyo ya mndonga wa setime, yi txi pendwa ngu nzalama ayi yi no thuma kurwala meza ngu yona.

²⁹ Kambe u na maha timbiya ta kona, ni mikho ya kona, ni magombe a kona, ni siyana sa kona so fenengeta ngu sona; u na si maha ngu nzalama ya yinene.

³⁰ Se txitimwi ka meza u na veka mapawu a mhamba, ma txi va i di txikombiso masoni kwangu, ka yotshe mbimo.

Meza ya malambu

³¹ Kambe u na maha meza ya malambu ngu nzalama yo surutetwa. Hahatshi ka meza ni txitimwi ka yona, ku nava ku di mahilwe kumweko; magombe a kona, siluva sa kona ni mazokoro a kona, si na va i di tximaha tximwetxo.

³² Mtxhanu wa madhavi ni dimwedo ma na humela madhawani ka kona: Madhavi mararu ka didhawa dimwedo ni mambe madhavi a mararu ka dimwani didhawa.

³³ Ka didhavi dimwedo ku nava ku di ni magombe mararu o fana ni txiluva txa almonde txo khata kuhuma ni divhuvhu; ka dimwani didhavi ku nava ni magombe mararu o fana ni txiluva txa almonde txo khata kuhuma ni divhuvhu; ku nava toneto ka mtxhanu wa madhavi ni dimwedo o humela aha ka dilambu.

³⁴ Aniko meza ya malambu yi na va ni mune wa magombe, o fana ni txiluva txa almonde, siluva sa kona, ni mavhuvhu a kona;

³⁵ ni txiluva txo khata kuhuma ngu hahatshi ka madhavi ale amambidi; ni txiluva tximwetxo txo kuhuma ngu ka mamwani madhavi a mambidi; ni tximwani txiluva kambe txo kuhuma ngu hahatshi ka madhavi a mambidi; ku nga va ku txi mahisa toneto ngu ona madhavi awa a mtxhanu ni dimwedo, ha mezani ka malambu.

³⁶ Siluva so khata kuhuma, ni madhavi, si na va i di tximaha tximwetxo; sotshe si na va txiya tximwetxo, so mahwa ngu nzalama yo surutetwa.

³⁷ U na yi mahela mtxhanu wa malambu ni mambidi, ale ma no turiselwa, me woninga masoni ka wona.

³⁸ Sipfhupetiso sa kona ni tikhadi ta kona si na va i di sa nzalama ya yinene ngutu.

³⁹ Ngu talenta ya nzalama ya yinene ngutu ku na mahwa meza ya malambu ni sotshe simaheso.

⁴⁰ Wonisisa koko, u maha madingano ni zumbelo ya kona nga tona ti u nga kombwa tona mmangoni.