Eksodha 20 - Bhiblia Yo Sawuleka

Milayo ya Digumi

¹ Sekoko Txizimu txi to womba otshe mapswi awa txi txi kha txona:

² “Ani ngani Mkoma Txizimu txako, awule a nga kuhumisa ditikoni ka Egipta, amu ka nyumba ya wukhumbi.

³ U ngave ni simwani sizimu masoni kwangu.

⁴ U nga ti mahele sifananiso so vatwa, hambi txifananiso txa sile si ku txitimwi nzumani, hambi txa sile si ku hahatshi ha mafuni, hambi txa sile si ku mu matini, hahatshi ka mafu.

⁵ U nga si khizamele, u txi si khozela; nguko ani Mkoma, Txizimu txako, ni Txizimu txa txiluse, ni tsayisako vanana ngu mhaka ya sionho sa vatate vawe, kala ka liveleko la wuraru ni la wumune, la vale va ni vengako.

⁶ Kambe na maha wumbilu kala ka liveleko la digumi da mazana, ka vale va ni randako, avale va xayisako milayo yangu.

⁷ U nga sakane ngu ditina da Mkoma Txizimu txako, nguko Mkoma kha na mbi mleka asi m'khawulisi awule a sakanako walo ngu ditina dakwe.

⁸ Alakanya ditshiku da Sabbata, u txi di sawulekisa.

⁹ U na thuma amu ka mtxhanu wa masiku ni dimwedo, u txi maha yotshe mithumo yako.

¹⁰ Aniko ka ditshiku da wutxhanu ni mambidi, ditshiku da Sabbata da Mkoma Txizimu txako. U nga thume mthumo ngu ka dona ditshikudo, awe ni mfana wako, ni dihorana dako, ni txithumi txako txa wamwamna ni txa wamsikati, hambi ni txifuyo txako, ni mpfhumba wule a ku ha m'tini kwako.

¹¹ Nguko ngu mtxhanu wa masiku ni dimwedo, Mkoma a vangile nzuma ni mafu, ni linene, ni sotshe asi si kuho, se a to humulela ngu ditshiku da wutxhanu ni mambidi; ngu mhaka yeto, Mkoma a katekisile ditshiku da Sabbata a txi di sawulekisa.

¹² Thava tate wako ni mame wako kasiku masiku ako ma na engetelwa ka ditiko di u nga ningwa ngu Mkoma, Txizimu txako.

¹³ U nga daye.

¹⁴ U nga mahe wugango.

¹⁵ U nga pe.

¹⁶ U nga lumbete mwakelani wako ngu wufakazi wa makuhu.

¹⁷ U nga navele nyumba ya mwakelani wako; u nga navele msikati wa mwakelani wako, ni txithumi txakwe txa wamwamna mwendo txa wamsikati, ni homu yakwe, ni mbongola yakwe, hambi ni tximwani tximaha txa mwakelani wako.”

Vathu va zumba ni dizowa

¹⁸ Vathu votshe va to engisa kudhuma ka singwalangwanda, kukeluka, kutuma ka mpundu ni kutuvika ka mmango, vathu va to telwa ngu dizowa, va txi manekela kule.

¹⁹ Va to womba ka Mosi, va txi kha vona: “Awe womba-womba ni nathu, hi na engisa; aniko txi nga womba-wombe Txizimu ni nathu, kasi ku hi si fi.”

²⁰ Se Mosi a to khene ka vathu: “Mi nga thaveni. Mkoma a to ta kasi ku ta mi duka, masoni kwanu, kasiku mi txi hambana ni txionho.”

²¹ Vathu va to zumbela kule; Mosi a txi tshuketa aha ka direfu, mtemani, ahale Txizimu txi nga ti kona.

Milayo madingano ni siluvelo

²² Sekoko Mkoma a to khene ka Mosi: U na womba tiya ka vanana va ka Israyeli: “Anu mi ti woni ti to ni wombawombile ni nanu ni di nzumani.

²³ Mi nga ti maheleni simwani sizimu ngu didhawa dangu, mi nga ti maheleni sizimu sa silivhela, hambi sizimu sa nzalama.

²⁴ U na ni akela txiluvelo ngu mafu, txitimwi ka txona u na maha miphaxo yako yo hiswa ni ya kudhumisa, ni timhamba ta tinvuta tako ni ta tihomu tako. Kotshe amu ditina dangu di no alakanywa kona, ni nata kwako ni ta kukatekisa.

²⁵ Ngako u txi ni akela txiluvelo txa dirigwi, u nga mahe ngu dirigwi do vatwa; nguko u txi thumisa txhizelo ka dona, u na yi nyenyezisa.

²⁶ U nga kwele ha digandeloni kwangu ngu sivango, kasi ku wu si woneki wumbwiri wako.”