Eksodha 2 - Bhiblia Yo Sawuleka

Kuvelekwa ka Mosi

¹ Wamwamna wokari wa nyumba ya ka Levhi, a to ya teka msikati wa nyumba ya ka Levhi.

² Wamsikatiyo, a to mana txirumbu e veleka mwanana wa mfana, ngako a di woni ti to mwanana wa kona mbwo tshura, a to msisa ngu txipimo txa mitxima yiraru.

³ Ngako a nga mbi sikota ku msisa mbimo yo lapha, a to teka disexita da milala e di kopola ngu dibumba ni mraka, se e sisa ka dona mwanana, eya di pfhomeka mu ka makhagala, likasani ka mnambo.

⁴ Se ndiyakwe mwanana wule wa mfana a ti ti dingilila a di kule nyana, a txi wonetela ati ti no humelela kwakwe.

⁵ Se mwanana wa Faro wa dihorana, a to relela eya mnamboni, kasiku eya samba, na kuve sithumi sakwe sa vavasikati si ti tsimbila-tsimbila likasani ka mnambo. Konako a to wona disexita hagari ka makhagala, e ruma mmweyo wa sithumi sakwe, ti to eya di teka.

⁶ A to di tula, e wona mwanana: I ti mwanana wa mfana a nga txi dila. Nguko mxanisekela, a to womba, a txi khene: “Awuwa i mwanana wa mfana, wa Muhebheru!”

⁷ Sekoko ndiya ya mwanana wule wa mfana a to khene ka mwana Faro wa dihorana: “Wa ti lava ti to ni tsula ni ya kudhanela wamsikati wa Muhebheru, awu a nota kuwunjela mfana wuwa kani?”

⁸ Se mwanana wa Faro wa dihorana a to mxamula, a txi khene: “Tsula.” Se awule wa dihorana a to tsula a txi ya dhana mame wa mwanana.

⁹ Sekoko mwanana wa Faro wa dihorana a ti khene kwakwe: “Teka mfana wuwa u txi ya muwunja e kula; ni nata kuninga hakhelo ya kona.” Se awule wamsikati a to teka mwanana wule wa mfana eya muwunja.

¹⁰ Se mbimo yi mfana a nga kula, a to mteka e m'heleketa ka mwanana wa Faro, awule a nga ya mu amukela, e mmaha mwanana wakwe; se a to mraya ditina daku i Mosi, a txi khene: “Nguko ni m'humisile matini.”

Mosi e tutuma ditikoni ka Egipta

¹¹ Ka masiku oneyo, Mosi i di wa hombe a to huma kasiku eya wona va ka kwawe; ahale a nga wona mathumelo awe o nemela, txitimwi kwawe; a to wona kambe Muegipta wokari a nga txi peka mmweyo wa mwanawe wa Muhebheru.

¹² Se Mosi a to rumaruma kheno ni kheno, asi woni m'thu hafuhi, a to daya Muegipta wule, e mtumbeta mafuni.

¹³ Mangwanani ka kona, a to engeta a txi huma aha a nga ya wona majaha mambidi a Vahebheru va txi lwa, ene a to angula wule a nga vhuka mkwawe a txi khene: “Ngu kutxani u txi peka mwananu kani?”

¹⁴ Ene a to xamula a txi khene: “I mani a nga kuveka kumaha wa hombe, ni mthethisi hagari kwathu kani? Se u lava ku ni daya nani, nga kule nyamnova u nga daya Muegipta kani?” Sekoko Mosi a to dhuka, a txi khene: “Mhaka yi zivilwe!”

¹⁵ Faro a di engisile mhakeyo, a to ruma ti to Mosi a txi ñolwa kasi ku e m'daya. Aniko Mosi a to thava masoni ka Faro, e tsula ditikoni ka Midhiyani, amu a nga ya zumba hafuhi ni txisima.

¹⁶ Se Jetro, mphaxeli wa Midhiyani a ti ni mtxhanu wa vanana ni vambidi vamahorana. Vona va to ya kuya reka mati, ve tata mikawu kasi kuninga mitxhambi ya tate wawe yi sela.

¹⁷ Sekoko kutota vadyisi va txi ta va tutumisa hale; kambe Mosi a to khukha, a txi va emela, e ninga mati mitxhambi yawe yi sela.

¹⁸ Vona va to tshumela ve tsula ka tate wawe, awu a nga ya va wotisa, a txi khene: “Ngu kutxani nyamsi mi kuluveta kuwuya kani?”

¹⁹ Vona va to xamula va txi kha vona: “Wamwamna wokari wa Muegipta a hi emete ka vadyisi, a txi hi vhuna kambe kureka mati, aawa mitxhambi yathu yi nga sela.”

²⁰ Tate wawe Jetro a to va wotisa, a txi khene: “Ahani ene kani?” Mi mlekete txani a txi tsula eyo wamwamna kani? M'dhaneni e ta dya sakudya ni nathu.

²¹ Mosi a to tumela kuzumba m'tini ka Jetro, awu a nga ninga Mosi, Zipora, mwanana wakwe wa dihorana kasiku e tekana nayo.

²² Sekoko Zipora a to veleka mwanana wa mfana, awu ene Mosi a nga mraya ditina daku ngene Gerisoni, nguko a ti khene: “Ni mluveli ditikoni ka vane.”

²³ Ku to maheka taku, msana ka masiku awa, a txifa mfumeli wa Egipta; vanana va ka Israyeli va to maneka va di kuxuphekani ka hombe, ngu mhaka ya wukhumbi wawe; va to dila, se huwa yawe yi to kwela yi txi hoka ka Txizimu.

²⁴ Se Txizimu txi engisile kudila kwawe, Txizimu txi to alakanya txitumelelano txi txi nga txi maha ni Abrahamu, ni Isaake ni Jakobe.

²⁵ Se Txizimu txi woni wukhumbi wa vanana va ka Israyeli, Txizimu txi to va pfela wusiwana.