Eksodha 18 - Bhiblia Yo Sawuleka

Jetro a txi endela Mosi

¹ Jetro, mphaxeli wa Midhiyani, msade wa Mosi, a to engisa totshe ti Txizimu txi nga maha ka Mosi ni ka Israyeli, i ku vathu va txona; ngako Mkoma a nga ti humisile Israyeli ngu Egipta.

² Se Jetro, msade wa Mosi, a to teka Zipora msikati wa Mosi, awule a nga ti mtshumetile a txi tsula kwawe.

³ Ni vanana vakwe vavambidi va vafana, avale mmweyo wawe a nga ti dhanwa ku i Gerisoni, nguko a ti khene: “Ni mluveli ditikoni ka vane.”

⁴ Ani mmwenyane i ti Eliyezeri, nguko a ti khene: “Txizimu txa tate wangu, txi ni hulukisile ka ditxhari da Faro.”

⁵ Jetro, msade wa Mosi, a manekile a txi tsula ni vanana ni msikati wa Mosi, aha a nga ya manana nayo txiwulani, mmangoni ka Txizimu, ahale a nga ti govile kona.

⁶ A to womba ka Mosi a txi khene: “Ani Jetro msade wako, ni ta kwako, ni msikati wako ni vanana vako vavambidi.”

⁷ Sekoko Mosi a to huma e hingeta msade wakwe, a txi ya khizama masoni kwakwe e mpswopswa, va to khambana thenga, se ve wulela ditendani.

⁸ Se Mosi a to xawutela ka tate wakwe ngu ka msikati wakwe, totshe ti Mkoma a nga ti maha ka Faro ni ka Vaegipta, ngu mhaka ya va ka Israyeli, kumweko ni sotshe sikarato si va nga si mana dipfhumbani kwawe, asi ene Mkoma a nga va hulukisa ka sona.

⁹ Jetro a to maneka a txi tsaka ngutu ngu wotshe wunene wu Mkoma a nga wu maha ka va ka Israyeli, a nga va hulukisa manzani ka Vaegipta.

¹⁰ Se Jetro a ti khene: “A na bongwe Mkoma, wule a nga mi hulukisa manzani ka Vaegipta, ni manzani ka Faro, ni ku a nga hukulukisa vathu wukhumbini ka Vaegipta.

¹¹ Se konkuwa na tiziva ati to Mkoma mbwa hombe kupinda sotshe sizimu, nguko a mahile ti to kotshe kubiha ku txi wa txitimwi kwawe.”

¹² Sekoko Jetro, msade wa Mosi, a to teka mningelo wo hiswa ni mphaxo, a txi tsula naso ka Txizimu; Aroni ni otshe madhota a ka Israyeli va tile ve ta dya mapawu kumweko ni msade wa Mosi, masoni ka Txizimu.

Mosi e sawula vo m'vhunetela

¹³ Se ku to maheka ati to, mangwanani ka kona, Mosi a to khalahatsha kasiku e thethisa vathu; vathu va manekile va di emile masoni kwakwe Mosi a txi vathethisa, kukhukhela mixo kala di txi swa.

¹⁴ Se msade wakwe, ngako a di woni totshe ti a nga txi ti maha kumweko ni vathu, a to womba a txi khene: “Nda txani eto u mahako ka vathu kani? Ngu kutxani u txi khalahatsha wekha, na vathu votshe va di emile masoni kwako, kukhukhela mixo kala kuswani ka ditambo kani?”

¹⁵ Sekoko Mosi a to khene ka msade wakwe: “Nguko vathu va ta kwangu kasi ku wotisa ti to Txizimu txi womba txani ngu timhaka tawe.

¹⁶ Ngako m'thu a di ni timhaka, ata kwangu, kasiku ni txi ta thethisa mmwani ni mmwani, se ni txi va kombisa milayo ya Txizimu ni mithetho ya kona.”

¹⁷ Kambe tate wa Mosi ngu ka msikati wakwe, a to khene kwakwe: “Hi nga tinene eto u mahako.

¹⁸ Ngu ditshuri u na karala ngutu, awe ni vathu vava u ku navo, nguko mthumo wa nemela ngutu kwako; khu na kusikota ku wu thuma wekha.

¹⁹ Konkuwa, engisa, mlayo wu ni kugelako, kasiku Txizimu txi txi va ni nawe: Emela vathu masoni ka Txizimu, u txi kombisa timhaka tawe ka Txizimu.

²⁰ Va gondise mithetho ni milayo, va mahe va txi ziva nzila yi yi ku ni fanelo, ati va felako ku ti londeta ni ku ti maha.

²¹ Aniko sawula hagari ka vathu, majaha ale ma ku ni mapimo, va thavako Txizimu, vo lulama, va nyenyanako ni dibhindu do mbi lulama, u txi va emisela kuva vathangeli va 1.000 wa vathu, vathangeli va dizana, vathangeli va mtxhanu wa magumi, ni vathangeli va digumi.

²² Vona va na thethisa vathu ka yotshe mbimo. Timhaka ta hombe va na ti tisa kwako, aniko totshe timhaka ta tidotho vona va na thethisa va txi ti heta. Ngu toneto, ti no ku hehukisela, nguko vona va na rwala mthumo kumweko ni nawe.

²³ Ngako u txi ti maha toneto, ni Txizimu txi txi kuruma, u na sikota kutsana; ngu kumaha keto, votshe vathu vava, va na tshumelela mitini kwawe ngu kuthutha.”

²⁴ Se Mosi a to engisa dipswi da msade wakwe, a txi maha totshe ti a nga mkombisa.

²⁵ Mosi a to sawula, ka votshe va ka Israyeli, vavamna va mapimo, a txi va veka kuve vathangeli va vathu: Vathangeli va digumi da mazana, vathangeli va dizana, vathangeli va mtxhanu wa magumi, ni vathangeli va digumi.

²⁶ Vona va ti thethisa vathu ka yotshe mbimo. Timhaka to karata va txi ti yisa ka Mosi, ati ta tidotho va txi ti lamula vona.

²⁷ Sekoko Mosi a to satisana ni msade wakwe, se a txi tsula ditikoni kwawe.