Ekleziyaste 7 - Bhiblia Yo Sawuleka

Mipimiso madingano ni wutomi

¹ Ndinene kuva ni nduma ya yinene, kupinda mafura o bhumula; ni ditshiku da kufa kupinda ditshiku da kuvelekwa ka m'thu.

² I txhuko kuya nyumbani ka madila, kupinda kuya nyumbani ka m'buso wa hombe, nguko nguho ku wonekako magwito a votshe vathu; se ni vale va hanyako va fanela kutipima timbiluni kwawe.

³ I txhuko xomulo kupinda maseko, nguko mbilu yi basiswa ngu si si thuvikisako khohe.

⁴ Timbilu ta titxhari ti nyumbani ka madila, aniko timbilu ta siphukuphuku ti nyumbani ka litsako.

⁵ I txhuko kuengisa kukawukwa ngu txhari, kupinda kuengisela ndando ya txiphukuphuku.

⁶ Nguko diguwa da kuseka ka txiphukuphuku di fana ni kutuma ka mipa, yi yi dhivelwako hahatshi ka khadi; eto ni tona mbukanganyisi.

⁷ Ngu ditshuri kukhinyavezwa ka bharukisa titxhari, ni kuxavelela ka onha mbilu ya m'thu.

⁸ I txhuko magwito ka timhaka, kupinda makhatoni ka tona; ni kutimisela ngunene kupinda kutiguleta ngu mbilu.

⁹ U nga kuluvete kuhenya moyani kwako, nguko kuhenya kuzumba hagari ka siphukuphuku.

¹⁰ U nge khawe: Ngu kutxani masiku a kale ma nga ti txhuko kupinda awa kani? Nguko eto ngu wutxhari khu na mbi dhuka u ti wotisa.

¹¹ Wutxhari mbunene kufana ni thomba, ka wona va mana txokari avale va wonako ditambo.

¹² Nguko wutxhari mtsudi, kufana ni male i ku mtsudi; aniko wunene wa wutxhari ngu ti taku, wa ninga wutomi ka nyamne wa wona.

¹³ Wonisisa mthumo wa Txizimu; nguko i mani a nga lulametako asi txi nga si maha si di gombonyekile kani?

¹⁴ Tsaka ngu ditshiku da makatekwa, aniko alakanya ditshiku da xomulo; nguko masiku awa, ngu wumbidi wa ona, ma mahilwe ngu Txizimu, kasi ku m'thu asi zivi ti ti no humelela msana kwakwe.

¹⁵ Totshe tiya ni ti woni ka masiku a kukanganyiseka kwangu; ku ni m'thu wo lulama a lovako kululamani kwakwe, ni m'thu wo biha a hanyako masiku o tala ka wubihi wakwe.

¹⁶ U nga ti mahe wo lulama kupinda mpimo, hambi ku ti maha wo txhariha kupinda mpimo; nguko u na ti hoxotela txani upune kani?

¹⁷ U nga ti mahe m'bihi wo pindisa, hambi kuva txiphukuphuku; nguko u na fela txani hahanze ka mbimo yako kani?

¹⁸ Ndinene ku u txi ti veketa eto, kambe u nga thavise dianza dako ka tona; nguko awule a thavako Txizimu wa huluka ka totshe eto.

¹⁹ Wutxhari wa tsanisa txhari, kupinda digumi da vathangeli va manekako didhoropani kumweko.

²⁰ Ngu ditshuri kha ku na m'thu wo lulama txitimwi ka mafu, wo maha ta tinene, asi dhukiko e onha.

²¹ Ni ka kudotho, u nga engisele otshe mapswi ale ma wombwako, kasi ku u si dhuki upfa taku txithumi txako txa kuruketela.

²² Nguko mbilu yako ni yona se yi ti tshanzile ko tala, yi txi awe u ruketete vamwani.

²³ Totshe eto ni wotisete ngu wutxhari, ni txi khani: Ni na mana Wutxhari; aniko wutxhari wu ngadi kule ni nani.

²⁴ Asile si nga ti tshimile si kule; i mani a nga si manako kani?

²⁵ Ni to tshumela ni ningetetela mbilu yangu ka kuziva, ni kuxolisisa, ni kulava wutxhari, ni ditshuri, ni kuziva wuphukuphuku wa kubiha, ni ti to wuphukuphuku ngu xanga.

²⁶ Se ani ni to mana mhaka yo pandisa ngutu kupinda kufa: Wamsikati wule mbilu yakwe i ku likoka ni mlawu, awule manza akwe i ku tingoti; awule i ku mnene masoni ka Txizimu, a na huluka kwakwe; aniko muonhi a na bzwetwa ngu ngene.

²⁷ Wonani ti ni nga ti mana, kuwomba M'gondisi, e xola tximwetxo ni tximetxo, kasi kumana txivangelo,

²⁸ txivangelo txi txi ku ngadi txi xotwa ngu moya wangu, kha na txi mana; hagari ka 1.000 wa vavamna, ni to mana mmweyo, aniko hagari ka votshe vavasikati vava, kha na mana ni wammweyo.

²⁹ Wonani mhaka yi ni nga yi mana dwe, ngu yiya: Txizimu txi vangile m'thu a di lulamile, aniko ene a ti lavete so tala.