Ekleziyaste 4 - Bhiblia Yo Sawuleka

¹ Msana keto, ni to engeta ni wona sotshe sixaniso si si mahekako hahatshi ka ditambo; se ni to wona mirongo ya vale va xaniswako, ni ya vale va pwatako mthaveleli; kambe mtamo wu ti ti ka didhawa da vaxanisi vawe; aniko vona va si nga ni mthaveleli ni wammweyo.

² Ngu mhaka yeto, ni dhumisa vale va nga fa, kupinda vale va ku ngadi va txi hanya.

³ Kambe awule i ku txhuko kupinda votshe, ngu wule a sanzi kuvelekwa; a nga mbi wona mithumo yo biha yi yi mahekako hahatshi ka ditambo.

⁴ Kambe ni to wona ti to wotshe mthumo, ni kotshe ku ti ningela kuthumani, si tisa kubavelwa ka m'thu, ngu mwakelani wakwe. Eto ni tona mbukanganyisi, ni kuxaniseka ka moya.

⁵ Txiphukuphuku txi khutarela mawoko a txona, txidya nyama ya mmidi wa txona.

⁶ I txhuko dianza dimwedo do tala ngu kuthutha, kupinda manza mambidi o tala ngu mthumo ni kuxaniseka ka moya.

⁷ Ni to tshembereka kambe ni wona wukanganyisi hahatshi ka ditambo.

⁸ Ku ni m'thu mmweyo i ku ekha, kha ku na wa wumbidi; ina, ene kha na mwanana mwendo ndiya; hambi keto, wotshe mthumo wakwe kha wu nga ni magwito, hambi maso akwe kha ma kolwi ngu thomba; kha wombi ku khene: Ni thumela mani ani, ni txi ti tona makatekwa kani? Eto ni tona mbukanganyisi, kambe mthumo wo karata.

⁹ I txhuko kuva vambidi kupinda mmweyo, nguko va ni txhatxhazelo ya yinene ka mthumo wawe.

¹⁰ Nguko ku txiwa mmweyo, a na wuswa ngu mmwani; aniko dikhombo ka wule a ku ekha; nguko a txiwa, kha na mbi mana wo muwusa.

¹¹ Ngako va txi otela i di vambidi va futumetana; aniko wammweyo dwe, a na futumelisa kutxani kani?

¹² Se ngako wokari a txi lava kulwa ni mmweyo wawe, va na mlwisa ngu wumbidi wawe; kambe dijoke do petwa kuraru, kha di kuluveti kubhenuka.

¹³ I txhuko dijaha di i ku txisiwana di di txharihile, kupinda mfumeli wo kumba wa txiphukuphuku, awule asi tumeliko kukawukwa.

¹⁴ Nguko mmwani a huma ngu mkorani a txi ya fuma; ina, awule a nga velekwa i di txisiwana mfumoni kwakwe.

¹⁵ Ni to wona votshe vo hanya va txi tsimbila hahatshi ka ditambo, kumweko ni dijaha dile di no zumba ka wukhalo wa mmwani.

¹⁶ Votshe vathu kha va nga ni magwito, votshe vale a va fumako; ni ka kudotho, tiveleko takwe, kha ti na mbi mtsakela. Ngu ditshuri eto ni tona mbukanganyisi, ni kuxanisa moya.