Ekleziyaste 11 - Bhiblia Yo Sawuleka

Silayelo sa sinene

¹ Rinza dipawu dako txitimwi ka mati, nguko msana ka masiku amangi, u na di mana.

² Abanisela ngu makhalo a mtxhanu ni mambidi, mwendo mtxhanu ni mararu, nguko khu zivi dikhombo di di no humelela ha mafuni.

³ Ngako marefu ma di ngadi tate ngu mati, ma na ma tshakunuta ha mafuni, ni kungako mndonga wu txi wela didhawa da wuphemba mwendo da wulambwe, ka wukhalo wule mndonga wu no wela kona, wu na zumba kona eho.

⁴ Awu a wonetelako moya kha na mbi phaya, ni wule a wonetelako marefu kha na mbi funyela.

⁵ Nga ha u si ziviko nzila ya moya, hambi ni ti ma wumbiswako tona marambu mndani ka wu a ku ni txirumbu, ngu toneto, khu yi zivi mithumo ya Txizimu, txi txi vangako sotshe somaha.

⁶ Phaya mbewu yako i di ngadi mixo, se ni mitshikari, u nga khalahatshe ngu mawoko, nguko khu ti zivi to ku na mila yihi; mwendo ku na mila yiya, mwendo yile, mwendo kambe ti na mila ngu wumbidi wa tona.

⁷ Ngu ditshuri, kuwonekela ka tshamba, kambe maso ma tsaka ngu kuwona ditambo.

⁸ Ngako m'thu a txi hanya malembe o tala, se e tsaka mndani ka ona otshe, a na alakanye masiku a txidema, nguko ma nava amangi. Totshe ti ti humelelako mbukanganyisi.

Silayelo ka vavaphya

⁹ Awe wamphya, tsakela wuphya wako, kambe mbilu yako yi na tsake ka masiku a wuphya wako, se tsimbila ngu tinzila ta kudhunda ka mbilu yako, ni ti ti tsakisako maso ako; wa tiziva kambe taku, ka sotshe siya Txizimu txi na ku lamula.

¹⁰ Thavisa koko kukarateka ka mbilu yako, u hambana ni kuxaniseka ka nyamani kwako, nguko wanana, ni wujaha mbukanganyisi.