Ekleziyaste 1 - Bhiblia Yo Sawuleka

Wutomi mbukanganisi

¹ Mapswi a m'gondisi, mwana Dhavhidha, mfumeli wa Jerusalema.

² Wukanganyisi wa wukanganyisi! Kuwomba m'gondisi, wukanganyisi wa wukanganyisi! Sotshe mbukanganyisi.

³ A bhindula txani m'thu ka mthumo wakwe wotshe, awu a wu mahako hahatshi ka ditambo kani?

⁴ Liveleko la pinda, li txi ta limwani; aniko mafu ma zumba ngu ha ku si gwitiko.

⁵ Se ditambo da huma, di tshumela diswa, di tshumelela wukhaloni ka dona, amu di nga huma ngu kona.

⁶ Moya wu pekela wulambwe, wu jika wu ya wuphemba, wu horolokela ka otshe madhawa, wu tshumela kambe wu horolokela.

⁷ Sotshe sinambwana siya lineneni, hambi keto, linene kha li tali; aha minambo yi khukhelako kona yi tshumela yiya koneho.

⁸ Sotshe siya sa karalisa ngutu, aha ko khangaho wo a nga sikota kutxhamusela; maso kha ma kolwi ngu kuwona, hambi tinzeve kha ti kolwi ngu kuengisa.

⁹ Atile ti nga ti tiho, ngu toneto ti no vaho; ni tile ti nga mahwa, eto ti na tshumela ti mahwa; nguko kha ku na txa txiphya hahatshi ka ditambo.

¹⁰ Txiho txokari txo dingana kuwombwa: Wona, atxi nja txiphya kani? Txi ti tiho kaleko, na athu hi sanzi kuvaho.

¹¹ Kha ku na txialakanyiso txa timhaka tile ti nga pinda; hambi txa sile si no vaho, ni sona kha si na mbi va ni txialakanyiso, ka vale va nota ngu msana.

Ati ti ziwako ngu Txhari

¹² Ani m'gondisi, ni ti ti mfumeli wa va ka Israyeli, kona Jerusalema.

¹³ Se ni to ningetetela mbilu yangu kuxolisisa ni kuthumisa wutxhari wangu, kasi kuziva totshe ti ti mahekako hahatshi ka nzuma; mthumo wu Txizimu txi nga wu ningela ka vanana va vathu mbwo nemela, kasi kuva txi wu maha.

¹⁴ Ni to wonisisa yotshe mithumo yi yi mahwako hahatshi ka ditambo, se ni wona ti to totshe mbukanganyisi, ni kuxaniseka ka moya.

¹⁵ Atxile txi nga gombonyeka, kha txi na kululamiswa, ni txile txi pwatekako kha txi sikoti kubalwa.

¹⁶ Ani ni to womba mbiluni kwangu ni txi khani: Wona taku ni ti kulisile, kambe ni ti manete wutxhari, ka votshe vale va nga maneka Jerusalema, ni sanzi ku va ho ani; ngu ditshuri, mbilu yangu yi ningilwe wutxhari ni mapimo ngu mtalo.

¹⁷ Se ni to ningetetela mbilu yangu kuziva wutxhari, ni kuziva lihuhe ni wuphukuphuku, se ni wona taku, eto ni tona ngu xanisa moya.

¹⁸ Nguko amu ka wutxhari wawungi ku ni kukarala ngutu; se awule a andisako wuzivi a andisa mthumo.