Amosi 7 - Bhiblia Yo Sawuleka

Txiwoniso txa humbi

¹ Mkoma Txizimu ani wonisile tiya: A to va nga bhanzala ngu mbimo yile mwasi wu khatako kuthunga, msana ka kuva wu di wilisilwe ngu mfumeli.

² Se ku to maheka taku: Ngako va nga ti dyite mwasi wotshe wa ditiko, ani ni ti khani: Mkoma Txizimu, divalela! A na guletiswa kutxani Jakobe kani? Nguko ene m'dotho.

³ Sekoko Mkoma a to tilaya ka tona. Ti na mbi maheka, kuwomba Mkoma.

Txiwoniso txa mndilo

⁴ Mkoma Txizimu anikombisile tiya: Se Mkoma Txizimu a ti huwelela ti taku a lava kuvanga vhilinganya ngu mndilo, e lovisa mkova wo hokoma, e lovisa kambe ni mafu.

⁵ Sekoko ni to khani: Mkoma Txizimu, ema konkuwa: Ana gulekisa kutxani Jakobe kani? Nguko ene m'dotho.

⁶ Se Mkoma a to ti laya ka toneto. Hambi tiya ti na mbi ngadi ti maheka: Kuwombile Mkoma Txizimu.

Txiwoniso txa ngoti ya mpimo

⁷ A ni kombile tiya: Se Mkoma a ti txitimwi ka diguma do guletwa ngu ngoti. A ti ni ngoti kambe amu manzani kwakwe.

⁸ Mkoma a ni gela, a txi khene: U wona txani awe Amosi kani? Se ni ti khani: Ngoti. Sekoko Mkoma a to khene: Wona ta ku ani na veka lingoti hagari ka vathu vangu va Israyeli; na mbi ngadi ni pinda ngu kwawe.

⁹ Kambe makhalo o guleka a Israyeli ma na hoxotwa ni makhalo a vakhongeli va Israyeli ma na loviselwa magwito. Se na wukela nyumba ya ka Jerobhowamu ngu ditxhari.

Amosi ni Amaziya

¹⁰ Sekoko Amaziya, mphaxeli wa Bheteli, a rumisa kugela Jerobhowamu, mfumeli wa ka Israyeli: Amosi a womba-womba kubiha ngu ngawe hagari ka vathu va ka Israyeli; mafu ma na mbi xaniswa ngu mapswi otshe ya a ma wombako.

¹¹ Nguko Amosi a wombisa tiya: Jerobhowamu a na fa ngu ditxhari; se Israyeli a na yiswa hahanze ka ditiko dakwe, a yiswa wukhumbini.

¹² Msana keto, Amaziya a to gela Amosi a txi khene: Tsula awe m'huti, thava u ya ditikoni ka Judha, aniya u na yadya dipawu, aniya u na ya profeta.

¹³ Kambe a ha Bheteli, kukhukhela kuwa kala kupinduka, khu na mbi ngadi u profeta kambe, nguko wukhalo wo sawuleka wa mfumeli ni nyumba ya mfumo.

¹⁴ Amosi a xamula ka Amaziya a txi khene: Ani ni si nga mwanana wa m'profeti, mwendo mprofeti, kambe ni ti m'fuyi wa tihomu, ni mphayi wa mikuwu.

¹⁵ Aniko Mkoma a ni thavisile ka wudyisi wa sifuyo, se ani gela a txi khene: Tsula u ya profeta ka vathu vangu va ka Israyeli.

¹⁶ Kambe engisa dipswi da Mkoma: Awe u womba tiya: Khu na mbi profeta Israyeli, hambi kuwombawomba ngu nyumba ya Isaake.

¹⁷ Ngu toneto, Mkoma a womba tiya: Msikati wako a na geleza a di didhoropani, vanana vako vamahorana ni vanana vako va mazambi, va na wa ngu ditxhari, ditiko dako di na abaniswa ngu ngoti yo songa, awe u na fa ka ditiko do nyenyeza, aniko va Israyeli, ngu ditshuri va na tsuliswa wukhumbini, hahanze ka ditiko dawe.