Amosi 6 - Bhiblia Yo Sawuleka

Kutsayiswa ka Israyeli

¹ Dikhombo ka va va humulako Siyoni, ni va va tipfako va di zumbisekile mmangoni ka Samariya, va ku ni ditina hagari ka matiko o khata, ni vale vatako nyumbani ka Israyeli.

² Pindani ngu Kalini mi wona, ngu niya, tsulani ka Hamati wa hombe; mi gwita mi relela mi ya Gati ka Vafilista: Mi nava vatxhuko kupinda mifumo yiya kani? Mwendo i nava ya hombe mihingano yakwe kupinda mihingano yanu kani?

³ Anu mi kulisako ditshiku do biha, mi ya ka wukhalo wo thisa.

⁴ Mi otelako ka mibhedhu ya makwasa a tinzofu, mi ti gwimba ha matahoni kwanu, mi dya tinvuta ta mitxhambi, ni marole ya hagari ka mitxhambi;

⁵ mi embelela ngu mpfumawulo wa harpa, mi ti mahela sitxaya txaya sanu so embelela ku nga Dhavhidha:

⁶ Mi selako vhinya ngu magombe, mi tola mafura a lisima, kambe mi ka pandiseki ngu ku wa ka Josefa:

⁷ Ngu koneho, konkuwa, mi na ya wukhumbini, ku va vo khata va ku na maha tikhumbi, se mi na gwita ni mibuso ya mipipi.

⁸ A xambanyile Mkoma Txizimu, ngu dihika dakwe, Mkoma, Txizimu txa Mabutho a Tiyimbi, a khene: Na nyenya kutikulisa ka va ka Jakobe, ni venga ni tinyumba tawe ta wukoma; na ningela didhoropa ni sotshe si si ku ka dona.

⁹ Se ku na maheka taku, ku txi sala digumi da vavamna ka m'ti, va na fa.

¹⁰ A wu a no teka sirumbi mwendo awu a no wu hisa, taku e teka marambu e huma nawo nyumbani, a na gela awule a ku magwito ka nyumba a txi khene: Kha ku nga ni m'thu. Se ene a na khene: Malala, nguko hi nga thuke hi gwesa ditina da Mkoma.

¹¹ Wonani taku Mkoma wa ruma, m'ti wa hombe wu na khundumuselwa, se m'ti wa wudotho wu na bhandekela.

¹² Ina mahantxhi ma nga tutuma marigwini kani? Mi nga kudima ngu tihomu kani? Ngu kutxani mi hindula wulamuli wa wunene ngu wubihi, ni mihando ya wululamo ngu wukanganyisi kani?

¹³ Anu mi ti tsakiswako ngu ta walo, anu mi ku khanu: Ina athu kha ha ti maha tindena ngu mtamo wathu kani?

¹⁴ Nguko wonani taku ni na wusa vathu hagari kwanu, anu va nyumba ya ka Israyeli, kuwomba Mkoma, Txizimu txa Mabutho a Tiyimbi, ava va no mi khozisa, kukhukhela txidingeni ka Hamati, kala ka txinambwana txa libalani.