Amosi 5 - Bhiblia Yo Sawuleka

Vathu va dingana kutisola

¹ Engisani mhaka yi ni yi wombako, ya txidilo hagari kwanu, awe nyumba ya Israyeli.

² Dihorana do tuma da Israyeli di wite, di na mbi ngadi di wuka kambe: A tsukutwe ditikoni kwakwe, kha ngaho awu aku na mu wusa.

³ Nguko Mkoma Txizimu a womba tiya: Ka didhoropa di kuhumako 1.000, ku na vekiswa dizana, se ka dile kuhumako dizana, ku na vekiswa digumi, ka nyumba ya ka Israyeli.

⁴ Mkoma a womba tiya ka va Israyeli a txi khene: Ni laveni mi na hanya.

⁵ Kambe mi nga laveni Bheteli, mi nga engete mi ta kambe ka Giligali, mi nga pindeni ngu Bherisebha, nguko kha ditshuri Giligali a na yiswa wukhumbini, se Bheteli a na sala asi na txilo.

⁶ Lavani Mkoma mi na hanya, kasi ku si rinzwi mndilo ka nyumba ya ka Josefa, wu txi yi tshokomisa, ku si maneki ni wammweyo Bheteli, wa ku yi tima.

⁷ Anu mi phinduketako wunene ngu mbiti, ni kurinza hahatshi wululamo.

⁸ Lavani wu a nga maha Mtxhanu wa tinyeleti ni timbidi ni Oriyoni, a phemberusa txidema txi maha kuwonekela ka mixo, e tshumela e phemberusa mitshikari yiva wusiku a wu a dhanako mati a linene e ma theletela txitimwi ka mafu; ditina dakwe i Mkoma.

⁹ Ngene a wu a lovisako vathu va mtamo, a lovisako ni miti ya vona ya mikhokhola.

¹⁰ Va venga wu a emako ni to lulama habanza, ni kunyenya wu a wombawombako ditshuri.

¹¹ Ngu koneho a ku mi kandako txisiwana, ka txona mi lava nduwo ya fulaho, mi na aka tinyumba ngu marigwi o vatwa, kambe kha mi na mba zumba ka tona: Mi na phaya mivhinya yo tsakisa, kambe mi na mbi sela vhinya ya kona.

¹² Nguko na tiziva taku mbwa wungi wuhambunyeti wanu, sionho sanu nzingi ngutu. Mi xanisa wo lulama, mi tumela kuxawa, mi tshumeta vo mbi na txilo ha txikeni.

¹³ Ngu toneto, awu a ku ni mapimo a na malala, ka yona mbimo yile, nguko mbimo yi na va yi di bihile.

¹⁴ Lavani wunene i si nga wubihi, ti to mi hanya, koneho Mkoma, Txizimu txa Mabutho a Tiyimbi, a na va ni nanu, nga ku mi wombako.

¹⁵ Vengani wubihi, mi randa wunene, vekani wululamo ha banza kutilava Mkoma, Txizimu txa Mabutho a Tiyimbi, txi na pfela wusiwana masalelwa ya Josefa.

¹⁶ Ngu toneto, a womba tiya Mkoma, Txizimu txa Mabutho a Tiyimbi, Mkoma: Ka otshe magondo ku nava ni kudila: Ni ka sotshe sigava va na kha vona: Yowe! Yowe! Kambe va na dhana m'dimi kuya dila, ni ku ta dila ka vale va zivako madilelo.

¹⁷ Ka totshe tithembwe ta mivhinya ku nava ni txidilo, nguko na pinda ngu hagari kwako kuwomba Mkoma.

Ditshiku da Mkoma

¹⁸ Dikhombo ka va va navelako ditshiku da Mkoma! Mi di lavela txani ditshiku di da Mkoma kani? Inava txidema, i si nga da kuwonekela.

¹⁹ Ku nga m'thu wo tutuma masoni ka ngonyamo, se eya tshangana ni txikakaka, mwendo ku nga o wulela nyumbani, e veka diwoko hadisetani, se e lumwa ngu mnyoka.

²⁰ Kha di na mbi va txidema ditshiku da Mkoma, i si nga kuwonekela kani? Ku na mbi va ku di tshangani txidema ni kuwonekela kani?

Wululamo na i si nga miphaxo

²¹ Na venga, na txhipisa mibuso yanu, ni mitshangano yanu ya hombe, nguko kha si ni tsakisi ni kakumweko.

²² Hambi ni txo ni ninga miningelo, ni miningelo ya sakudya, na mbi tsaka ngu sona, kambe na mbi wonetela miningelo ya sihari sanu.

²³ Tshuketisani kule diguwa da tindando tanu, kha ni na mbi engisa mpfumawulo wa sivetaveta sanu.

²⁴ Wunene wa tutuma nga mati, ni wululamo ku nga mnambo wa kwa mbi phwha.

²⁵ Mi ni ningile mphaxo ni miningelo txiwulani, ka mune wa magumi a malembe, anu vanana va ka Israyeli kani?

²⁶ Txo khata mi tekile ditenda da Moloke wanu, ni txiluvelo txa sifaniso sanu, ni nyeleti ya txizimu txanu, mi nga ti mahela mipune.

²⁷ Aniko, na mi tshutisa wukhumbini na i si nga Dhamasku, Kuwomba Mkoma, a wu ditina dakwe i ku Txizimu txa Mabutho a Tiyimbi.