Amosi 4 - Bhiblia Yo Sawuleka

¹ Engisani mapswi awa anu vavasikati va Bhasani, mi ku mi mangoni ka Samariya, anu mi xanisaka sisiwana, mi khinyavezako vo pwata, migelako vanyamne vanu mi txi khanu: Wuyisani kheno hi sela.

² A xambanyile Mkoma Txizimu, ngu wusawuleki wakwe, ta ku masiku ma nata txitimwi kwanu, ale va no mi humisa ngu tindowo, ni vanana vanu ngu tindowo to dota ngu tona.

³ Mi na huma ngu lisoko, mmweyo ngu mmweyo, ni ya mi mirinza Hermoni, kuwomba Mkoma.

Israyeli kha lavi kutisola

⁴ Ngonani Bheteli, ndakani mlayo; mi engetela kundaka mlayo mi di Giligali, mixo ni mixo nahetani miphaxo yanu, ngu masiku mararu-mararu, mi neha sa wugumi sanu.

⁵ Mi ningela miphaxo ya kudhumisa ya si so tshumbelwa, mi peka nyiwo ya miphaxo ya kutxhatxheka, mi huwelela; nguko eto ma ti dhunda, anu vanana va ka Israyeli, kuwomba Mkoma Txizimu.

⁶ Ngu mhaka ya eto ni mi ningile kubasiswa ka makwasa, ka otshe madhoropa anu, ni kupwateka ka dipawu, ka otshe makhalo yanu; hambi keto, kha ma hundulukela kwanu, kuwomba Mkoma.

⁷ Hahandze keto, ni mi vhalete nzuma, ku txi ngadi kupwateka mitxima yiraru kuhoka mbimo yo funyela; ni yi nisile ka didhoropa dimwedo ka dimwani ni ka yi nisa; ka thembwe yimweyo yi nite, aniko ka yimwani thembwe kha ya na, kuomile.

⁸ Kambe kutsimbite vapeperuki ka madhoropa mambidi mwendo mararu, va txi ya ka didhoropa dimwani, kasi kuya sela mati, aniko kha va kolwa: Aniko kha ma hundulukela kwangu, kuwombile Mkoma.

⁹ Ni mi pekile ngu moya wo hisa, ni ku mi bhirelisa; siyalo sanu sa tithembweni ni mivhinya yanu, ni sa mikuwu yanu ni sa miolivha yanu, si dyitwe ngu bhandala; hambi keto, kha ma hundulukela kwangu, kuwombile Mkoma.

¹⁰ Ni rumete mtungu kutalwa ni nanu, ku nga va Egipta: Majaha anu ni ma date ngu ditxhari, mahantxhi anu ni malekile me tekwa, kununga ka mabutho anu, ni ku kwetile tithonvuni kwanu; aniko kha ma hundulukela kwangu, kuwombile Mkoma.

¹¹ Vamwani kwanu ni va fuvisile ku nga Txizimu txi nga fuvisa Sodhoma ni Gomora, mi sate ku nga likhuni lo thaviswa ka wuhya: Hambi keto mi ka hunduluka kwangu, kuwombile Mkoma.

¹² Ngu mhaka yeto, ni na kumaha toneto awe Israyeli! Se ngu mhaka ya ti ni no kumaha, ti lulamisele awe Israyeli, kasi kumanana ni Txizimu txako.

¹³ Nguko ngu txona txi bumbaretelako mimango, ni kuvanga moya, txi zivisa m'thu taku ngu ahi maalakanyo a txona, txi mahako ti to mixo yi ve txidema, txi kanda txitimwi ka mafu; Mkoma, Txizimu txa Mabutho a Tiyimbi, ngu dona ditina dakwe.